Ti Panangmatmat ti Biblia

Masapul Kadi a Napanglaw Dagiti Kristiano?

NAMINSAN, kinuna ni Jesus iti maysa a nabaknang nga agkabannuag nga agturay a nasken nga ilakona amin dagiti sanikuana ket itedna kadagiti napanglaw. Kuna ti salaysay a nalidayan ti lalaki iti imbaga ni Jesus ket sileleddaang a pimmanaw, “ta ik-ikutanna idi ti adu a sanikua.” Kalpasanna, kinuna ni Jesus kadagiti adalanna: “Anian a nakarigrigatto a banag kadagidiay addaan kuarta ti sumrek iti pagarian ti Dios!” Innayon ni Jesus: “Ti maysa a kamelio nalaklaka a lumsot iti abut ti dagum ngem iti maysa a nabaknang a tao a sumrek iti pagarian ti Dios.”​—Marcos 10:21-23; Mateo 19:24.

Ania ti kayat a sawen ni Jesus? Saan kadi a mabalin a paggiddanen ti kinabaknang ken pudno a panagdayaw? Pakabasolan kadi dagiti Kristiano no adda kuartada? Kalikaguman kadi ti Dios nga agbiagda a napanglaw?

Awaten ti Dios ti “Amin a Kita ti Tattao”

Idi un-unana, saan a kinalikaguman ti Dios nga agbiag a napanglaw dagiti Israelita. Usigenyo: Idi nagnaed dagiti tattao iti daga a naited kadakuada, nagtalon ken nagnegosioda tapno adda pagbiagda ken dagiti patpatgenda. Ti kasasaad ti ekonomia, paniempo, salun-at, wenno abilidad nga agnegosio ket nakaapektar iti balligi ti panagreggetda. Dagiti linteg ni Moises binilinna dagiti Israelita nga agbalinda a mannakipagrikna no adda marigatan ken pumanglaw. (Levitico 25:35-40) Iti kasumbangirna, adda dagiti bimmaknang. Ni Boaz, a maysa a lalaki nga addaan pammati a nagbalin a kapuonan ni Jesu-Kristo, ket nadeskribir kas “lalaki a mannakabalin iti kinabaknang.”​—Ruth 2:1.

Kasta met laeng ti kasasaad idi panawen ni Jesus.  Iti pannakipatangna iti baknang a nadakamat itay, saan a panggep ni Jesus nga iparegta ti panagbiag a napanglaw. Imbes ketdi, adda napateg nga isursurona. Iti panangmatmat ti tao, mabalin a kasla imposible kadagiti nabaknang ti mangipakita iti kinapakumbaba ken mangawat iti pamay-an ti Dios iti pannakaisalakan. Ngem kinuna ni Jesus: “Kadagiti tattao di mabalin daytoy, ngem iti Dios amin a bambanag mabalin.”​—Mateo 19:26.

Inawat ti kongregasion Kristiano idi umuna a siglo ti “amin a kita ti tattao.” (1 Timoteo 2:4) Adda dagiti nabaknang, adda nanam-ay ti biagda, ken adu ti nakurapay. Adda dagiti nakaurnong iti kinabaknang sakbay a nagbalinda a Kristiano. Ti dadduma ket mabalin a bimmaknang idi agangay gapu iti nasayaat a kasasaad ken kinalaingda a mangngeddeng iti panagnegosio.

Kasta met iti timpuyog dagiti Kristiano ita, adda dagiti tattao a nagduduma ti kasasaadda iti ekonomia. Ikagkagumaanda amin a suroten ti panangiwanwan ti Biblia maipapan iti kuarta, agsipud ta ti materialismo maapektaranna ti siasinoman. Ti leksion nga insuro ni Jesus maipapan iti baknang nga agkabannuag nga agturay ti mamakdaar iti tunggal Kristiano iti nabileg nga impluensia ti kuarta ken sansanikua.​—Marcos 4:19.

Pakdaar Kadagiti Nabaknang

Nupay saan a kondenaren ti Biblia ti kinabaknang, kondenarenna ti panagayat iti kuarta. Kinuna ti mannurat ti Biblia a ni Pablo: “Ti ayat iti kuarta isu ti ramut dagiti amin a kita ti makadangran a bambanag.” Kinunana a “nayaw-awan ti sumagmamano manipud iti pammati ket sinalputda ti intero a bagbagida iti adu nga ut-ot” idi binaybay-anda dagiti naespirituan a pagimbaganda gapu iti tarigagayda a bumaknang.​—1 Timoteo 6:10.

Makapainteres ta nangipaay ni Pablo kadagiti espesipiko a bilin kadagiti nabaknang. Kinunana: “Ibilinmo kadagidiay babaknang itoy agdama a sistema ti bambanag a saanda koma a napalangguad, ken isadagda ti namnamada, saan nga iti pagduaduaan a kinabaknang, no di ket iti Dios, a sibabaknang a mangipaay kadatayo iti amin a bambanag a pagragsakantayo.” (1 Timoteo 6:17) Ipasimudaag daytoy nga adda peggad nga amangan ta agbalin a napalangguad dagiti nabaknang ken ipapanda a nangatngatoda ngem iti sabsabali. Kasta met a mabalin a mapanunotda a makaited ti kinabaknang iti pudno a kinatalged​—banag a ti laeng Dios ti naan-anay a makaipaay.

Dagiti nabaknang a Kristiano ket masaluadan kadagitoy a peggad babaen ti panagbalinda a “nabaknang iti nasayaat nga ar-aramid.” Karaman kadagitoy nga ar-aramid ti panagbalin a “naparabur, sisasagana a mangiranud,” a mangipaay iti naparabur a tulong kadagidiay agkasapulan. (1 Timoteo 6:18) Mabalin met nga usaren dagiti nabaknang ken nakurapay a Kristiano ti dadduma a sanikuada a mangisaknap iti naimbag a damag ti Pagarian ti Dios, nga isut’ maysa a kangrunaan a pakaseknan dagiti pudno a Kristiano ita. Daytoy a kinamanagparabur ipamatmatna ti umiso a kababalin no maipapan kadagiti material a sanikua ken iyadanina ti maysa ken ni Jehova a Dios ken ni Jesu-Kristo, a mangay-ayat kadagiti naragsak a mangted.​—Mateo 24:14; Lucas 16:9; 2 Corinto 9:7.

Dagiti Napatpateg a Banag

Nalawag a saan a maikalikagum kadagiti Kristiano nga agbalinda a napanglaw. Ngem nasken a saanda met a “determinado a bumaknang.” (1 Timoteo 6:9) Agtrabahoda a siaanep tapno maaddaanda laeng iti rasonable a pagbiag. Nagduduma ti magapuananda a balligi, depende iti nagduduma a makagapu ken sistema ti ekonomia iti lugarda​—Eclesiastes 11:6.

Aniaman ti pinansial a kasasaadda, ikagumaan koma dagiti Kristiano a ‘siguraduen ti napatpateg a bambanag.’ (Filipos 1:10) Babaen ti panangipangpangrunada kadagiti naespirituan ti pategna a banag, ‘sitatalged nga agur-urnongda maipaay iti bagbagida iti nasayaat a pamuon maipapan iti masanguanan, tapno mapetpetanda a sititibker ti pudpudno a biag.’​—1 Timoteo 6:19.