Nawayawayaan iti Biag a Napno iti Gura

KAS INSALAYSAY NI JOSÉ GOMEZ

NAIPASNGAYAK idi Setiembre 8, 1964, idiay Rognac, maysa a bassit nga ili iti abagatan ti Francia. Gypsy a taga Andalusia dagiti dadakkel ken apongko, a naipasngay idiay Algeria ken Morocco, Makin-amianan nga Africa. Kas gagangay iti kultura dagiti Gypsy, ti pamiliami ket dakkel a pamilia dagiti agkakabagian.

Naranggas ni tatangko. Maim-imatangak idi ti panangdangranna ken ni nanang idi ubingak pay. Nagangayanna, inkeddeng ni nanangko ti makidiborsio​—desision a manmano nga aramiden dagiti Gypsy. Innalanak, ti adingko a lalaki, ken ni manangko ket impannakami idiay Belgium, a sadiay a nagbiagkami a sitatalna iti simmaganad a walo a tawen.

Ngem nagbalbaliw ti kasasaad. Kayatmi a makita ni tatangmi, isu nga impannakami ni Nanang idiay Francia ket naikaykaysakami manen ken ni tatangmi. Narigatanak iti pannakipagnaedmi manen ken ni Tatang. Idiay Belgium, simmurotkami ken ni Nanang iti sadinoman. Ngem kada tatang, lalaki ti rumbeng a kapulapol ti lalaki. Matmatanda ti bagbagida a malalaki, a dagiti lalaki ti addaan iti amin a kalintegan ket dagiti babbai ti mangaramid iti amin a trabaho. Kas pagarigan, idi pinadasko a tulongan ti ikitko nga agkalunkon ken aginnaw kalpasan ti pangrabii, inawagannak ni ulitegko iti bakla. Iti pamiliana, talaga a babbai laeng ti aginnaw. Idi agangay, naimpluensiaanak iti kasta a panagpampanunot.

Di nagbayag, nagbanag manen a nakapimpiman ni nanangko gapu iti kinaranggas ni Tatang. Namin-adu nga idi pinadasmi ti bumallaet, naglibaskami ken ni adingko iti tawa tapno dinakami makabil ni Tatang. Nairaman met ni manangko. Kas resultana, kanayon idi nga awanak idiay balay. Idi agtawenak iti 15, awan ti direksion ti biagko.

Idi agangay, nagdinamag ti panagbalinko a naranggas. Pagaayatko ti agbalin a maton. No dadduma, gagaraek a kariten dagiti agkabannuag a lallaki, ngem manmano dagiti mangtutop kaniak​—nangruna ta masansan nga armadoak iti imuko wenno kawar. Di nagbayag, agtakawak metten iti lugan santo ilakok. Adda gundaway a basta puorak dagitoy ket maragsakanak a mangbuya kadagiti bombero bayat a sebsebanda ti apuy. Simmaruno ti panangserrekko kadagiti paglakuan ken bodega tapno agtakaw. Sumagmamano a daras a natiliwak. Kada matiliwak, ikararagko a tulongannak ti Dios!

Wen, mamatiak iti Dios. Idi addakami idiay Belgium, simrekak iti maysa a narelihiosuan nga eskuelaan. Isu nga ammok a dakes ti ar-aramidek. Ngem ti panamatik iti Dios ket awan ti aniaman nga epektona iti kababalinko. Ti ammok laeng a kasapulan ket agkiddaw a mapakawan ti basolko, ket umanayen dayta.

Idi 1984, nasentensiaanak iti 11 a bulan a pannakaibalud gapu iti panagtakaw. Naibaludak iti Baumettes Prison, idiay Marseilles. Sadiay a pinatatok ti nadumaduma a paset ti bagik. Iti maysa a tato, mabasa ti “gura ken panagibales.” Imbes a mabalbaliwan  ti kinataok, impalubosko a pakaruen ti pagbaludan ti gurak iti autoridad ken iti kagimongan. Idi mawayawayaanak, kalpasan ti tallo laeng a bulan a pannakaibaludko, ad-adda a kimmaro ti gurak. Ngem nabalbaliwan ti panagbiagko gapu iti maysa a trahedia.

Panagibales ti Nagbalin a Kalatko

Adda sabali a Gypsy a pamilia a nakaapa ti pamiliami. Inkeddengmi kadagiti ulitegko a rauten ida tapno malpasen ti parikut. Agpada nga armado ti dua a pamilia. Iti napasamak a panagsango, napaltogan ket napapatay ni ulitegko a Pierre ken ti maysa a kasinsin ni tatangko. Matuokanak unay isu napanak iti kalsada, a nakaiggem iti paltog, a sipupungtot ken aglaaw-laaw. Ngem naikagumaan ti maysa kadagiti ulitegko nga agawen ti paltog kaniak.

Naladingitanak unay gapu iti ipapatay ni Uliteg Pierre, nga imbilangko kas ama. Nagpanesak sigun iti kostumbre dagiti Gypsy. Saanak a nagibarbas wenno nangan iti aniaman a karne iti adu nga aldaw. Diak nagbuya iti telebision wenno dimngeg iti musika. Insapatak nga ibalesko ti ipapatay ni ulitegko, ngem di impalubos dagiti kakabagiak a maaddaanak iti paltog.

Idi Agosto 1984, naawatak nga agsoldado. Idi agtawenak iti 20, nagpasalistaak kas kameng ti armada ti United Nations a mangtagtaginayon iti talna idiay Lebanon. Sinangok ti peggad a pumatay wenno mapapatay. Iti dayta a tiempo, agsigsigarilioak iti adu a marihuana. Malaksid a kasla makapasalun-at, kasla awan ti mabalin a mangdangran kaniak gapu iti epekto ti droga.

Naglaka ti mangala iti armas idiay Lebanon, isu nga inkeddengko ti mangipatulod kadagiti igam tapno adda usarek idiay Francia a mangituloy iti planok nga ibales ti napasamak iti ulitegko. Gimmatangak iti dua a pistol ken bala iti maysa a residente. Winarwarko dagiti paltog, indulinko iti dua a radio, sa impaw-itko idiay balaymi.

Dua laeng a lawas sakbay nga agngudo ti panagsoldadok, naglangankami kadagiti tallo a kakaduak iti trabahomi. Idi nagsublikami iti kuartelmi, impupokdakami. Iti pagbaludan, nakapungtotak iti kasta unay ket rinautko ti maysa a guardia. Diak maawat a tagibassitennak ti maysa a payo​—maysa a saan a Gypsy. Iti simmaganad nga aldaw, adda manen nakarangetko a maysa nga opisial. Naibaludak iti Montluc Prison, idiay Lyons, agingga a naturpos ti panagsoldadok.

Nasarakak ti Wayawaya​—Iti Pagbaludan

Iti umuna nga aldawko idiay Montluc Prison, sibabara a kinablaawannak ti maysa a makaay-ayo nga agkabannuag a lalaki. Naammuak a maysa a Saksi ni Jehova ken naibalud agraman ti dadduma a kapammatianna gapu laeng ta dida agimet iti igam. Nasdaawak. Tinarigagayak nga ammuen ti ad-adu pay.

Naammuak nga addaan dagiti Saksi ni Jehova iti pudno a panagayat iti Dios, ken magustuak ti nangato a moral a pagalagadanda. Kaskasdi nga adu ti saludsodko. Kas pagarigan, kayatko a maammuan no dagiti natay makasaoda dagiti sibibiag babaen ti tagtagainep, kas iti patpatien ti adu a Gypsy. Intukon ti maysa a Saksi nga agnagan Jean-Paul nga iyadalannak iti Biblia, a mausar ti libro a Mabalinyo ti Agbiag nga Agnanayon iti Paraiso a Daga. *

Sigagagar a binasak ti libro iti nagpatnag, ket nagutugotak unay iti nabasak. Nasarakak ti wayawaya iti pagbaludan! Idi mawayawayaanakon iti pagbaludan, nagluganak iti tren a nagawid, a napno ti bagko kadagiti naibasar iti Biblia a publikasion.

Tapno masarakak dagiti Saksi iti lugarmi, napanak iti Kingdom Hall idiay Martigues. Intuloyko ti nakipagadal iti Biblia ken ni Eric, maysa nga agkabannuag nga amin-tiempo a ministro. Iti uneg ti sumagmamano nga aldaw, insardengko ti agsigarilio, ken diak nakisinnarak kadagiti sigud a kakaduak nga agar-aramid iti krimen. Desididoak nga agtignay maitunos iti Proverbio 27:11, nga agkuna: “Agmasiribka, anakko, ket pagrag-oem ti pusok, tapno makaipaayak iti sungbat iti daydiay mangrurrurod kaniak.” Nariknak a ni Jehova ket maysa a naayat nga Ama a tarigagayak nga ay-aywen.

Ti Rigat ti Panagbalbaliw

Narigatanak a nangyaplikar kadagiti Nakristianuan a prinsipio. Kas pagarigan, nagdrogaak manen iti sumagmamano a lawas. Ngem ti kangrunaan a pakarigatak isu ti panangiwaksik  iti tarigagayko nga agibales. Saan nga ammo ni Eric a kanayon nga agitugotak iti paltog, ken plamplanuek no kasanok a mabales dagiti nangpapatay iti ulitegko. Adda dagiti rabii a nagpatpatnag a sinapsapulko ida.

Idi imbagak dayta ken ni Eric, inggunamgunamna a saanak a maaddaan iti nasayaat a relasion iti Dios no agusarak iti igam ken ikagkagumaak ti agibales. Masapul nga agdesisionak. Sipapasnek a minennamennak ti pammagbaga ni apostol Pablo iti Roma 12:19: “Dikay ibalesan ti bagbagiyo, dungdungnguen, no di ket ipaayanyo ti lugar ti pungtot.” Daytoy, agraman ti naimpusuan a panagkararag, ti timmulong kaniak tapno makapagteppelak. (Salmo 55:22) Kamaudiananna, insardengkon ti agimet iti paltog. Idi Disiembre 26, 1986, kalpasan ti panagadalko iti Biblia iti makatawen, insimbolok ti dedikasionko ken ni Jehova babaen ti panagbautisarko.

Naragsakan ti Pamiliami

Dagiti panagbalbaliw iti kababalinko ti nangparegta kadagiti dadakkelko nga agadalda iti Biblia. Nagkasar manen ti dadakkelko, ket nabautisaran ni nanang idi Hulio 1989. Idi agangay, ti sumagmamano pay a kameng ti pamiliami ti immawat iti mensahe ti Biblia ken nagbalinda a Saksi ni Jehova.

Idi Agosto 1988, inkeddengko ti agbalin nga amin-tiempo a ministro. Idi agangay, nagayatak ken ni Katia, maysa a balasang iti kongregasionmi. Nagkasarkami idi Hunio 10, 1989. Adda pakarigatan iti immuna a tawen ti panagasawami, agsipud ta adda pay masapul a balbaliwak iti kababalinko kadagiti babbai. Narigatanak a mangyaplikar iti sasao iti 1 Pedro 3:7, a mangparparegta kadagiti assawa a lallaki a padayawanda dagiti assawada. Kanayon nga inkararagko a mapabilegak a mangiwaksi iti kinatangsitko ken mangbalbaliw iti panagpampanunotko. In-inut a simmayaat ti kasasaadmi.

Nasaem pay laeng kaniak ti ipapatay ti ulitegko, ken no dadduma, diak magawidan nga agarubos ti luak no mapampanunotko dayta. Tepteppelak ti riknak gapu iti malaglagipko a pannakapapatayna. Adu a tawen, uray kalpasan ti panagbautisarko, nagamakak di la ket ta masalawko dagiti kameng ti pamilia a nakaapa idi ti pamiliami. Ania ti aramidek no rautendak? Rimbawannak ngata ti dati a kababalinko?

Naminsan, nagpalawagak iti kabangibang a kongregasion. Nakitak sadiay ni Pepa a kabagian dagiti lallaki a nangpapatay iti ulitegko. Idi makitak, talaga a nasubok ti Nakristianuan a personalidadko. Ngem nagteppelak. Idi aldaw ti panagbautisar ni Pepa, inarakupko ken kinablaawak gapu iti pangngeddengna nga agserbi ken ni Jehova. Iti laksid ti amin a napasamak, inawatko kas naespirituan a kabsatko.

Inaldaw nga agyamanak ken ni Jehova ta tinulongannak a mawayawayaan iti biag a napno iti gura. Ania koma ti nagmamaayak ita no saan a gapu iti kinamanangngaasi ni Jehova? Agyamanak kenkuana ta tagtagiragsakek ti naragsak a biag ti pamilia. Adda met namnamak iti masanguanan​—maysa a baro a lubong nga awanan iti gura ken kinaranggas. Wen, mamatiak unay a matungpalto ti kari ti Dios: “Pudno nga agtugawdanto, tunggal maysa iti sirok ti puon ti ubasna ken iti sirok ti kayona a higos, ket awanto ti asinoman a mamagpigerger kadakuada; ta ti mismo a ngiwat ni Jehova ti buybuyot sinaona dayta”​—Mikias 4:4.

[Footnote]

[Ladawan iti panid 19]

Addaak iti armada ti United Nations a mangtagtaginayon iti talna idiay Lebanon, 1985

[Ladawan iti panid 20]

Kaduak ni Katia ken ti babbaritok a da Timeo ken ni Pierre