“Pannakaadikto” iti Cell Phone

BABAEN TI MANNURAT TI AGRIINGKAYO! IDIAY JAPAN

“AGRARAIRAN ti Pannakaadikto iti Cell Phone,” kuna ti paulo ti damdamag iti The Daily Yomiuri iti Japan. Pannakaadikto? “Ibilbilangen dagiti agtutubo a paset ti bagida dagiti cell phone ket mabalin a matarantada pay ketdin no dida awit ti cell phone-da,” kinuna ti diario. Gapu ta maamakda a mayadayoda iti sabsabali, adu ti silulukat dagiti cell phone-da iti amin a tiempo, iti sadinoman nga ayanda. No “awan ti maawatda nga aniaman a mensahe, madanagan ken marurodda, ket mariknada nga awan ti mangikankano kadakuada.” Daytoy ti manggutugot kadakuada a mangsungbat a dagus iti amin a maawatda a mensahe, uray di rumbeng a sungbatanda.

Siempre, mabalin nga adda pagimbagan dagiti cell phone. Kinapudnona, napaneknekan a napateg dagitoy kadagiti panawen ti emerhensia. Saan met a dakes uray ti kadawyan a panagusar iti dayta, no la ket ta natimbeng ti panagusar. Ngem kuna ti dadduma nga autoridad a mabalin a madangran ti kadawyan a laing a makikomunikar gapu iti “pannakaadikto” iti cell phone. Madanagan ti maysa a maestra ti segundaria idiay Osaka ta gapu iti cell phone, “marigrigatanen dagiti ubbing a mangilasin kadagiti ebkas ti rupa, kababalin ken tono ti boses ti dadduma a tao. Maysa a resulta daytoy ket ti ikakaro ti kinaagresibo dagiti ubbing, agraman ti di panangikankano iti rikrikna ti dadduma,” kinuna ti diario.

Inngudo ti artikulo: “Kasla di maliklikan ti ikakaronto ti panagpannuray dagiti ubbing kadagiti cell phone. Ti kakaisuna a pamuspusan tapno mapabassit dagiti dakes nga epekto daytoy a pagannayasan isu ti panangsigurado a mangipakita dagiti nataengan iti nasayaat a pagwadan iti panagusarda kadagiti cell phone.”