Manipud Kadagiti Agbasbasa

Panagsurbey Nagustuak ti artikulo a “Panagsurbey​—Ania Dayta?” (Hunio 8, 2002) Agpadakami ken lakayko nga inspektor ti estado iti panangaramid kadagiti kalsada. Inaldaw a trabahomi ti panagsurbey. Naragsakanak a makaammo iti pakasaritaanna, ket ti panangitampokyo iti Proverbio 22:28 pinagbalinna dayta a naisangsangayan unay. Nupay ammok nga ilustrasion laeng dagiti ladawan, kayatko a dakamaten a sipapasnek nga idagadagmi nga agaruat koma dagiti amin a surbeyor kadagiti kawes ken dadduma pay nga alikamen a mamagbalin kadakuada a natalged. No agaruatda kadagita, nalaka ida a makita, yantangay masansan nga agtrabahoda iti igid ti kalsada a mataltallikudanda dagiti aglabas a lugan. Pagyamanan iti napnuan impormasion nga artikulo!

C. S., Estados Unidos

Gubat Naragsakanak a nakabasa iti “Ti Panangmatmat ti Biblia: Anamongan Aya ti Dios ti Pannakigubat?” (Mayo 8, 2002) Maseknanak iti dayta a banag agsipud ta maysaak kadagiti Saksi ni Jehova ket iti panangaskasabak, adda dagidiay nagsaludsod kaniak no apay a nakigubgubat idi ti nagkauna a nasion ti Israel. Inkarigatak nga inlawlawag dayta, ngem awan ti umdas nga impormasion a maidatagko. Nakasimsimple ken makakombinsir daytoy nga artikulo! Insuratko dagiti amin a punto a mabalinko nga usaren iti aniaman a kanito. Talaga a kasapulanmi dagiti kasta nga artikulo!

V. S., Russia

Maysaak a drayber ti tangke idi Gubat Sangalubongan II. Kinabigatanna kalpasan ti panangsakupmi iti maysa nga estratehiko a turod, adda altar a nabangon iti kataltalonan. Malaglagipko dagiti tallo a tripulante ti tangke a nagparintumeng iti sanguanan ti altar ken bembendisionan ti padi. Di nagbayag kalpasan dayta, napapatay dagiti tallo a tripulante ti tangke idi rinautdakami dagiti kabusor. Nagbalinkami ken baketko a Saksi ni Jehova idi 1957, ket ammomi idin nga awan ti dinasigan ti Dios iti dayta a gubat. Manipud idin, naespirituan a dangadang ti pakipaspasetanmi, ket masiguradomi no siasino ti dasdasigan ti Dios.

F. S., New Zealand

Panagbalin nga Ina Pagyamanan iti serye a “Panagbalin nga Ina​—Masapul Aya a Paglainganna ti Amin?” (Abril 8, 2002) Agtawenak laeng iti 13, ngem impakita kaniak dagitoy nga artikulo no ania ti sasaaden ita ni nanangko ken no anianto ti kasasaadna kadagiti sumarsaruno a bulan. Lima ket kagudua a bulan ngaminen a masikog. Ita ta nabasakon daytoy a magasin, ikagkagumaak a padayawan ni Nanang ken ipakitaan iti dakdakkel a panagraem.

N. B., Estados Unidos

Alta Presion Pagyamanan iti nagsayaat nga artikulo nga “Alta Presion​—Pananglapped ken Panangkontrol.” (Abril 8, 2002) Nayospitalak gapu ta kellaat a naatakeak iti puso. Kalpasan dayta, binasak ti artikulo, ket detalyado unay nga inlawlawagna no ania ti aramiden no sumro ti alta presion. Siempre, adu ti nasursurok iti doktorko ken iti maysa a nutrisionista. Nupay kasta, naisurat daytoy nga artikulo iti wagas a nalaka a maawatan. Manipud itan, kayatko nga aywanan a naimbag ti biag nga inted ni Jehova kaniak!

N. I., Japan

Adda alta presionko, ket binagbagaandak dagiti propesional iti panangaywan iti salun-at nga agarup dua a gramo laeng nga asin ti ipaunegko kada aldaw. Iti panid 22, kasla adu unay ti nadakamat nga innem a gramo kada aldaw, a naibatay iti Third Brazilian Consensus on Arterial Hypertension. Saan ngata a kamali ti pannakaisuratna?

F. S., Estados Unidos

Sungbat ti “Agriingkayo!”: Ti gubuayan dayta nga impormasion irekomendana ti saan a nasursurok ngem 100 mEq (milliequivalent) nga asin kada aldaw, a 5.85 a gramo ti kaibatoganna. Ti sangakutsara, a nalabit nalaklaka nga iladawan, ket 5.18 a gramo. Ngem kas nadakamat iti “footnote,” masapul nga agpakonsulta iti doktor ti asinoman nga addaan iti alta presion wenno umasping a sakit. Mabalin a makatulong kenkuana no kissayanna pay ti asin nga ipapaunegna.