Manipud Kadagiti Agbasbasa

Panangadipen Marigatanak nga agpanunot iti mayataday a sasao tapno iyebkas ti panagyamanko iti serye ti akkub nga “Inton Amin a Kita ti Panangadipen ket Agpatingga!” (Hunio 22, 2002) Tinulongandak dagiti artikulo a mangamiris a mabalin nga agpaadipen dagiti tattao iti nagadu a banag a kas iti droga, panagsigarilio, ken panagulbod. Adipenak idi iti panagsugal. Ammok a dakes dayta, ngem marigatanak a mangkontrol iti gagarko. Pinagsangitnak ti insalaysayyo a kapadasan ni Ricardo. Tinulongannak a makaamiris a no agregget ti maysa a tao, makapagballigi a lumapsut kadagiti kasta a kita ti pannakaadipen. Pagyamanan iti panangipablaakyo kadagita a makaliwliwa nga artikulo a mangisalaysay kadagiti pudno a kasasaad iti biag.

M. W., Estados Unidos

Trinidad Pagyamanan iti artikulo a “Napanuynoy a Pagarian iti Di Napanuynoy a Panawen.” (Hunio 22, 2002) Makaparagsak a basaen ti maipapan ken Sigismund, a nangidepensa kadagiti di mamati iti Trinidad kadagiti debateda, ken no kasano a naited ti legal a panangbigbig iti Unitarian Church. Nagustuak ti makakombinsir a pannakirinnason ni Francis Dávid maibusor iti Trinidad. Impalagipna kaniak ti kinatured ni apostol Pablo. Gagangay a saanak nga interesado kadagiti artikulo a napnuan iti historia, ngem ikagkagumaak a palawaen ti interesko iti amin nga ipapaay “ti matalek ken masirib nga adipen” babaen kadagiti magasintayo. (Mateo 24:45-47) Nagsayaat ti pannakaisurat ken pannakasirarak daytoy nga artikulo. Talaga a nagustuak dayta.

M. C., Estados Unidos

Nabasak ti makapainteres nga artikuloyo a nangbalusingsing iti doktrina a Trinidad. Madama a pagsasaritaanmi daytoy a topiko iti simbaanmi. Nabayagen a patiek a palso ti doktrina a Trinidad, isu a kayatko ti agpedido iti 15 a kopia daytoy a ruar tapno ibunongko.

A. O., Alemania

Ruot Pagyamanan iti artikulo a “Ruot​—Saan Laeng a Berde a Pagbatayam.” (Hunio 8, 2002) Immuneg ti pannakaawatko iti kinapudno a supsuportaran ni Jehova a Dios ti amin a biag ditoy daga babaen ti ruot. Kas iti kinuna ti maysa a botaniko, daytat’ “kasla puttot a mangsalsalaknib iti sangatauan no dumteng ti bisin.” Ni Jehova ti Katan-okan a Managpartuat, ket natulongannak a mangamiris kadagiti galad ni Jehova nga ayat, sirib, kinahustisia, ken pannakabalin bayat a naan-anay a maiparangarang dagitoy iti pamilia dagiti ruot.

K. O., Japan

Manipud iti Maysa nga Agtutubo Siam ti tawenko, ket addaak iti maikapat a grado. Kayatko ti agyaman kadakayo gapu iti nagadu a napipintas nga artikulo nga iyim-imprentayo kadagiti magasinyo. Ti maysa a serye a nangnangruna a nakatulong kaniak ket napauluan iti, “Dagiti Nalatak a Selebrasion​—Adda Aya Nalmeng a Pagpeggadanda?” (Oktubre 8, 2001) Kalpasan nga intedko ti magasin iti maestrak iti Ingles, inusarna ti material iti subtema a “Narelihiosuan a Salisal” a pagadalan ti klasemi. Naragsakan unay gapu iti kinaumiso ti linaon dagiti artikulo. Pagyamanan iti amin nga isursuratyo a pakaparegtaan ken pakasalaknibanmi.

N. R., Italia

Panangapresiar Talaga nga apresiarek ti panangipablaakyo kadagiti makapainteres unay nga artikulo a kas kadagidiay maipapan iti an-animal. Sisiak ti Saksi ni Jehova iti pamiliak, ket awan iti pamiliak ti interesado a mangbasa iti aniaman a literaturatayo a kasla narelihiosuan ti pakabuklanna. Ngem makapainteres unay a basaen dagitoy nga artikulo, ken makaay-ayo ti panangiladawanda maipapan iti Namarsua kadatayo ta uray dagiti saan a Saksi ket magustuanda a basaen dayta. Pagyamanan iti nagsayaat a trabaho nga ar-aramidenyo ken kadagiti nagpipintas a magasin nga ar-aramidenyo.

T. C., Estados Unidos