Manipud Kadagiti Agbasbasa

Dagiti Polis Kayatko ti agyaman iti serye ti parupa a panid a “Dagiti Polis​—Apay a Kasapulantayo Ida?” (Hulio 8, 2002) Natay ni tatangko tallo a tawenen ti napalabas gapu iti pannakaidungpar ti lugan. Dua a polis iti lugarmi ti nangipadamag iti pamiliak ket sidadaanda a timmulong ken nakipagladingit. Ti maysa ti nangarakup pay ketdi ken ni nanangko bayat ti panagsangitna. Siguradok a saan a pulos a nalaka para kadagitoy a polis ti mangaramid kadagita nga annongen, ngem kasanotay ngatan no awanda?

D. E., Estados Unidos

Kayatko ti agsaludsod gapu iti serye ti parupa a panid maipapan kadagiti polis. Mabalin kadi para iti maysa a Saksi ni Jehova ti agtrabaho kas maysa a polis? Ammok a no adda riribuk, nalabit masapul a kalbitem ti gatilio ti paltog ken usarem dayta, ket mabalin nga adda mapataymo.

J. S., Australia

Kastoy ti sungbat ti “Agriingkayo!”: Binigbig laeng ti serye ti parupa a panid ti magasinmi ti sumagmamano a pagimbagan ti trabaho dagiti polis iti panangtaginayonda iti urnos ken panangipaayda iti dadduma pay a napateg a serbisio. Liklikan ti kaaduan a Saksi ni Jehova ti trabaho a mangkalikagum kadakuada a maaddaan iti igam, agsipud ta dida kayat ti makabasol iti dara babaen ti pananguyosda iti biag ti maysa a tao. (Exodo 20:13; Mateo 26:51, 52) Ngem rumbeng a maipakaammo nga adu a tattao nga empleado dagiti ahensia a mangipapaalagad iti linteg a di kasapulan a maaddaanda iti aniaman a kita ti igam, ket iti dadduma a pagilian, awan paltog ti kaaduan a polis.

Kabasbasak dagiti artikulo maipapan iti panagkasapulantayo kadagiti polis. Nagsayaat ti pannakaisuratda ken mannakipagrikna iti narigat a trabaho dagiti polis iti panangikagumaanda a mamagtalinaed a naurnos daytoy nariribuk a lubong. Idi dekada 1970, nagserbikami nga agassawa kas agdaldaliasat a ministro, ket nagyankami iti sirok ti maysa a daan a Kingdom Hall bayat a sinerbianmi ti maysa a kongregasion iti makintengnga a paset ti siudad. Nadagaang idi, isu nga apagapaman a linukatanmi ti tawa tapno sumrek ti angin. Idi alas dos ti parbangon, riniingnak ni baketko agsipud ta adda dua a lallaki iti ruar ti tawa. Dimngegak iti tungtonganda. Kinuna ti maysa a gagangay a nakaserra dagiti tawa. Kinuna ti maysa a nalabit adda tao iti uneg ta adda kotse iti paradaan. Polisda, ket nalawag a kanayon a suksukimatenda no natalged met laeng ti kasasaad ti Kingdom Hall. Naim-imasen ti pannaturogmi kalpasan dayta!

P. S., Estados Unidos

Naintiempuan dagiti artikulo maipapan kadagiti polis​—nangruna kalpasan ti panangraut dagiti terorista iti World Trade Center ken iti Pentagon, ditoy Estados Unidos. Sapay koma ta ad-adda nga ipategtayon dagiti polis, bombero, ken dadduma pay nga agserserbi iti publiko nga addaan iti rebbengen a mangsalaknib kadagiti umili ken sanikua saan laeng a manipud iti terorismo no di ket uray iti kaaduan nga aramid dagiti kriminal.

H. B., Estados Unidos

Agkakuarto Nabayagen nga ur-urayek ti maysa nga artikulo maipapan iti agkakuarto. Idi nabasak ti artikulo nga “Agimtuod Dagiti Agtutubo . . . Kasano a Makabirokak iti Kakuarto a Makatunosak?” (Mayo 22, 2002), nasdaawak a makaammo nga adda tattao a dida kayat ti agbalin a kasingedan a gayyem ti kakuartoda wenno makikuyog kenkuana iti amin a lugar ken gagangay laeng daytoy. Kasta met a dakkel ti maitulong ti maysa a kakuarto iti paggastuan agraman trabaho iti balay. Pagyamanan iti panangisuroyo kaniak iti daytoy natimbeng a panangmatmat.

S. M., Japan

Dua pay a lawas ket addanton kaduak a padak a Saksi iti maysa nga apartment idiay Dresden. Detalyado ken dimteng iti umiso a tiempo dagiti nagsayaat a pammagbaga kadagiti artikulo ti ruar ti Abril 22, Mayo 22, ken Hunio 22, 2002 maipapan iti agkakuarto. Sapay koma ta itultuloyyo ti agputar kadagitoy nagsayaat nga artikulo!

R. P., Alemania