Panangipakita iti Ayat iti Panawen ti Rigat
Panangipakita iti Ayat iti Panawen ti Rigat
BABAEN TI MANNURAT ITI AGRIINGKAYO! IDIAY NIGERIA
TI Domingo, Enero 27, 2002, ket naawagan a Makadidigra a Domingo idiay Lagos, Nigeria. Bimtak ti maysa a pagipempenan kadagiti igam iti uneg ti daga. Gapu iti dayta, nadayyeg ti intero a siudad ken rimmaniag ti langit iti daydi a rabii. Iti sumagmamano nga oras ti panagbettak, natnag ti nagadu a bala ken rugit iti aglawlaw a distansia a tallo a kilometro, isu a nariribuk ti siudad.
Kimmaro pay ti panagbuteng gapu kadagiti awan nakaibasaranna a sayangguseng. Nagdudupudop dagiti napabutngan a tattao kadagiti lansangan, a dida ammo no sadino ti pagkamangan wenno pagturonganda. Iti nasipnget a rabii, ginasut a tattao, agraman dagiti um-umkis nga ubbing, ti naikursong kadagiti nalibeg a danum ti kanal isu a nalmesda. Nadadael wenno nakaro ti pannakadadael dagiti balbalay, eskuelaan ken establisimiento ti negosio, isu a rinibu ti naawanan iti balay ken panggedan. Napattapatta a 1,000 a tattao ti natay iti trahedia. Ad-adu pay kadagiti naud-udi a pattapatta.
Idi agangay, agarup 1,350 a di bimtak a bomba, raket, ken granada ti naala kadagiti kabalbalayan iti aglawlaw ti kampo ti militar a nakapasamakan ti panagbettak. Maysa a lalaki ti nakasarak iti metal a banag iti salasna. Gapu ta dina ammo a bomba dayta, pinidutna, inkabilna iti kargadera ti luganna, sana insubli kadagiti autoridad.
Apaman a nangngeg ti sanga nga opisina dagiti Saksi ni Jehova idiay Nigeria ti damag maipapan iti bimtak a bomba, nakiuman a dagus kadagiti panglakayen idiay Lagos ket imbagana kadagiti 16 nga agdaldaliasat a manangaywan a tingitingenda ti kasasaad dagiti 36,000 a Saksi idiay Lagos. Maysa a milion a naira (agarup $10,000 E.U.) ti impatulod
ti sanga nga opisina sa imbilinna a mabuangay ti komite ti saranay a mangipaay iti tulong.Kadagiti Saksi, maysa a lalaki ti nakaro a nadangran gapu iti busak dagiti igam; nakalkaldaang ta dua nga agtutubo a babbai ti natay; ken nadadael ti dua a Kingdom Hall agraman ti balbalay ti 45 a pamilia.
Innem nga aldaw kalpasan ti panagbettak dagiti igam, idi Pebrero 2, 2002, nagrurupak dagiti etniko a grupo iti sabali a paset ti siudad. Sigun iti Red Cross, 100 ti natay iti panagrurupak, 430 ti nadangran, ken 3,000 ti napilitan a pimmanaw iti pagtaenganda, ken 50 a balbalay ti napuoran. Ti komite ti saranay a tumultulong kadagiti biktima ti “Makadidigra a Domingo” binirokda a dagus dagiti Kristiano a kakabsatda iti daytoy a lugar.
Awan ti natay kadagiti Saksi iti daytoy a tiempo, ta kaaduan kadakuada ti tumabtabuno iti asamblea sirkito idi nangrugi ti rinnupak. Nupay kasta, adu a miembro iti lima a kongregasion iti dayta a lugar ti naawanan iti sangpetan a balbalay. Dagus a pinadagus ida dagiti Kristiano a kakabsatda. Maysa a Saksi a doktor ken ni baketna ti nangpadagus iti 27 kadagiti naawanan iti balay.
Dagiti Saksi idiay Lagos a di naapektaran iti panagbettak ken iti etniko a rinnupak ti sipaparabur a nagidonar iti taraon, kawes, ken alikamen iti balay. Impadamag ti manangaywan iti siudad: “Ad-adu pay ngem iti kasapulan dagiti kakabsat a nadidigra ti indonar dagiti kakabsat iti Lagos.” Kapilitan a nagsurat ti sanga nga opisina kadagiti kongregasion a didan mangted iti kanayonan a donasion. Tallo a trak a napno kadagiti natda a donasion ti naisubli iti sanga nga opisina tapno maipempen sadiay.
Dagiti panglakayen ti kongregasion binisitada dagiti biktima ken miembro ti pamilia dagidiay natay. Inkagumaanda ti nangipaay iti Nainkasuratan a pangliwliwa. Inyurnos ti komite ti saranay ti pannakatarimaan dagiti nadadael a balbalayda. Inikkanda dagiti biktima ti dua a didigra kadagiti alikamen ti balay, kawes, ken taraon sada tinulongan dagiti naawanan iti balay a makabirok iti natalged a pagdagusan. Agdagup iti 90 a pamilia ken indibidual ti natulongan ti komite.
Kasta unay ti yaman ti adu a biktima iti tulong a naawatda. Kinuna ti maysa a Saksi iti komite ti saranay: “Agingga a sibibiagak, pagbalinek ni Jehova a ‘kamangko ken pigsak’!”—Salmo 46:1, 2.
Napaliiw dagiti saan a Saksi ti panangaywan dagiti Saksi ni Jehova iti maysa ken maysa bayat dagitoy a rigat. Kastoy ti imbaga ti uliteg ti maysa kadagiti natay a sister kadagiti panglakayen iti kongregasionna: “Agsubliak tapno agyaman kadakayo ken tapno maammuak ti ad-adu pay.” Iti pamiliana, kinunana: “Nakaskasdaaw ti nakitak idiay Lagos. Uray dagiti kabagiantayo saanda a naaramid ti inaramid dagitoy a tattao.”
[Ladawan iti panid 13]
Trak a napno kadagiti pangsaranay a material
[Ladawan iti panid 13]
Dadduma kadagidiay natulongan
[Ladawan iti panid 14]
Pinadagus daytoy a pagassawaan ti 27 a tattao a naawanan iti balbalay
[Ladawan iti panid 14]
Dagiti Saksi nga agtartarimaan iti nadadael a balay
[Picture Credit Line iti panid 13]
Ngato: Sam Olusegun-The Guardian