Kasano ti Rumbeng a Panangusartayo iti Wayawayatayo nga Agpili?
Ti Panangmatmat ti Biblia
Kasano ti Rumbeng a Panangusartayo iti Wayawayatayo nga Agpili?
INIKKAN ti Dios dagiti immuna a tattao a da Adan ken Eva iti abilidad nga agpili. Impaaywanna ken ni Adan ti minuyongan ti Eden. Nairaman kadagiti rebbengen ni Adan ti agpili iti ipanaganna kadagiti animal. (Genesis 2:15, 19) Napatpateg pay, mabalin idi nga ikeddeng da Adan ken Eva no agtulnogda iti Dios wenno saan.—Genesis 2:17, 18.
Nanipud idi, nangaramiden dagiti tattao iti nagadu a desision—adu kadagitoy ti naimbag, ti sumagmamano ket saan, ken interamente a dakes ti dadduma. Makadidigra ti nagbanagan ti dadduma kadagiti dakes a pinili dagiti tattao. Nupay kasta, saan a pulos a makibibiang ti Dios iti kalintegantayo nga agpili. Kas naayat nga Ama, tultulongannatayo ti Dios a mangaramid kadagiti naimbag a desision babaen iti Biblia. Pakdaarannatayo met maipapan kadagiti pagbanagan ti di umiso a panagpili. Kuna ti Biblia nga apitentayo ti imulatayo.—Galacia 6:7.
Dagiti Desision Kadagiti Personal a Banag
Iti dadduma a banag, sibabatad nga ibagbaga ti Dios ti pagayatanna ken ik-ikkannatayo iti espesipiko a panangiwanwan. Ngem iti kaaduan a banag, saan a mangipaay ti Biblia kadagiti pagannurotan a mangtarawidwid iti amin nga aramidentayo a mismo. Imbes ketdi, mangted iti nalawag a panangiwanwan tapno masurot dagiti tattao ti kayat ken tarigagayda. Kas pagarigan,
kitaenyo ti ibagbagana maipapan iti panagpalpaliwa.Ni Jehova ket awagan dagiti Kasuratan kas “ti naragsak a Dios.” (1 Timoteo 1:11) Sigun iti Saona, adda “panawen ti panagkatawa” ken “panawen ti panaglagtolagto.” (Eclesiastes 3:1, 4) Ibagbaga kadatayo ti Biblia a nagtokar ni Ari David iti musika a nakagunggonaan ti sabsabali. (1 Samuel 16:16-18, 23) Timmabuno ni Jesus iti kasar, ken timmulong pay iti dayta a padayá idi pinagbalinna nga arak ti danum.—Juan 2:1-10.
Nupay kasta, maitutop ti pakdaar ti Biblia: “Daydiay makipagna kadagiti masirib a tattao agbalinto a masirib, ngem daydiay addaan kadagiti pannakilangen kadagidiay maag nakadakdakesto ti pagtungpalanna.” (Proverbio 13:20) Makasair iti Dios ken makadadael iti relasiontayo kenkuana ti “naalas a panagang-angaw,” ken imoral nga aramid. (Efeso 5:3-5) No aglablabes ti pannakausar dagiti naingel nga inumen kadagiti pasken, mabalin a rumsua dagiti nakaro a parikut. (Proverbio 23:29-35; Isaias 5:11, 12) Kagura met ni Jehova a Dios ti kinaranggas.—Salmo 11:5; Proverbio 3:31.
Makatulong kadatayo dagitoy a bersikulo iti Biblia tapno maawatanyo ti panangmatmat ti Dios maipapan iti panagpalpaliwa. No agpili dagiti Kristiano, agpaiwanwanda iti Biblia. Siempre, apiten ti tunggal maysa kadatayo dagiti naimbag ken dakes a pagbanagan dagiti pilitayo.—Galacia 6:7-10.
Umasping iti dayta, maparparegta dagiti Kristiano nga agaramidda iti nainsiriban a desision a mayataday kadagiti prinsipio ti Biblia maipapan kadagiti banag a kas iti panagkawkawes, panagasawa, panagbalin nga ama ken ina, ken pannakinegosio. Ramanen dagitoy dagiti saan nga espesipiko a nadakamat kadagiti Kasuratan, ngem makatulong kadakuada dagiti prinsipio a masarakan sadiay tapno makaaramidda kadagiti desision a naibasar iti diktar ti konsiensiada. (Roma 2:14, 15) Ti sumaganad a pagalagadan ket rumbeng nga agaplikar iti amin a bukod a desision dagiti Kristiano: “Uray no mangmangan wenno umin-inum wenno agar-aramidkayo iti aniaman pay a banag, aramidenyo ti amin a bambanag a maipaay iti dayag ti Dios.”—1 Corinto 10:31.
Maipapan iti daytoy, nasayaat met no usigentayo ti prinsipio nga ‘asikasuentayo ti bukodtayo nga aramid.’ (1 Tesalonica 4:11) Masansan a maipasango dagiti Kristiano iti sumagmamano a pagpilian a di maisalungasing iti pagayatan ti Dios. Gapuna, mabalin a naiduma ti kayat ti maysa a Kristiano iti kayat ti sabsabali. Saan a makaay-ayo iti Dios no agiinnukom dagiti adipenna. (Santiago 4:11, 12) Kastoy ti nainsiriban a pammagbaga ti Biblia: “Awan koma kadakayo ti agsagaba . . . kas mannakibiang kadagiti pakaseknan ti sabali a tattao.”—1 Pedro 4:15.
Ti Desision nga Agserbi iti Dios
Iyunay-unay ti Biblia dagiti pagimbagan ti panagtulnog iti Dios. Nupay kasta, saan a pilpiliten ti Dios dagiti tattao nga agdayaw kenkuana. Imbes ketdi, aw-awisenna dagiti pinarsuana a tattao nga agdayaw kenkuana. Kas pagarigan, kuna ti Biblia: “O sumrekkayo, agdayaw ken agruknoytayo; agparintumengtayo iti sanguanan ni Jehova a Nangaramid kadatayo.”—Salmo 95:6.
Nayawis dayta iti nagkauna nga Israel. Nasurok a 3,500 a tawen ti napalabasen, nagtakder ti nasion ti Israel iti imatang ti Bantay Sinai, ket impakaammo ti Dios kadagidi a minilion a tattao ti sistema ti pudno a relihion a sinaklaw ti Mosaiko a Linteg. Masapul idi nga agpilida: Agserbida aya iti Dios wenno saan? Kasano ti reaksionda? Sangsangkamaysa a kinunada: “Situtulokkami a mangaramid ken agtulnog iti isuamin a sinao ni Jehova.” (Exodo 24:7) Isuda a mismo ti nagdesision nga agserbida ken Jehova.
Idi immuna a siglo, inyun-una ni Jesus ti panangikasaba iti naimbag a damag ti Pagarian ti Dios. (Mateo 4:17; 24:14) Dina pulos pinilit ti siasinoman a makipaset iti daytoy a trabaho. Imbes ketdi, siaasi nga inawisna ti sabsabali, a kunkunana: “Umayka agbalinka a pasurotko.” (Marcos 2:14; 10:21) Adu ti immawat iti awisna ket nakikaduada kenkuana a nangasaba. (Lucas 10:1-9) Kalpasan ti sumagmamano a tiempo, inkeddeng ti dadduma a panawanda ni Jesus. Inkeddeng ni Judas a liputan ni Jesus. (Juan 6:66; Aramid 1:25) Kalpasanna, babaen ti panangiwanwan dagiti apostol, adu pay ti nagbalin nga adalan, saan a gapu ta napangtaanda a mapapatay, no di ket gapu ta inusarda ti wayawayada nga agpili. ‘Siuumiso nga agannayasda’ ken “nagbalinda a manamati.” (Aramid 13:48; 17:34) Uray ita, sidadaan dagiti pudno a Kristiano nga agtulnog iti Sao ti Dios ken sumurot kadagiti pannursuro ni Jesus.
Nalawag a kayat ti Dios nga usarentayo ti abilidadtayo nga agpili. Ipapaayna met ti panangiwanwan iti Biblia a makatulong kadatayo nga agaramid kadagiti nainsiriban a desision. (Salmo 25:12) No agar-aramid ti tunggal Kristiano iti bukodna a desision, amirisenna koma a naimbag dagiti nadiosan a prinsipio. Iti dayta laeng a pamay-an a mabalintayo nga ipaay iti Dios ti ‘sagrado a panagserbi buyogen ti pannakabalin nga agrason.’—Roma 12:1.