Maysa a Lalaki nga Inkeddengna ti Agtulnog iti Dios

KADAGITI naladingit nga aldaw ti 1937, idi a nangpataud iti riribuk ti agsisimparat nga ideolohia iti adu a pagilian ti Europa, naipasango dagiti pudno a Kristiano kadagiti narigat a panagpili. Rumbeng aya nga agtulnogda iti Dios wenno iti tattao? (Aramid 5:29) Ammo idi dagiti agtutubo a lallaki a nakagteng iti edad a mabalindan ti agsoldado a mabalin a mapapatayda no agtulnogda iti Dios.

Ni Antonio Gargallo ket maysa a 19 ti tawenna nga Español a naipasango iti kasta a panagpili. Agarup makatawen idin nga agtultuloy ti gerra sibil idiay España idi inayaban dagiti nasionalista a puersa ni Heneral Franco nga agsoldado. Iti napalabas a tawen, nabautisaran ni Antonio kas maysa kadagiti Saksi ni Jehova, ket nabasana ti Nainkasuratan a pammagbaga a rumbeng nga agtalinaed a neutral dagiti adipen ti Dios ken didan sursuruen pay ti makigubat. (Isaias 2:4; Juan 17:16) Gapu ta dina kayat ti agsoldado ken pumatay kadagiti kailianna, ginandat ni Antonio ti agkamang idiay Francia. Ngem nasalamaan ken naipan iti kampo dagiti militar idiay Jaca, Huesca, nga asideg iti beddeng ti Francia.

Indiaya kenkuana ti maysa a pangukoman ti militar ti narigat a pagpilian: Agsoldado wenno mapapatay. Inkeddeng ni Antonio ti agtulnog iti Dios. Sakbay unay a napapatay, kastoy ti insuratna ken ni nanangna ken iti adingna a babai nga agpadpada a saan a Saksi ni Jehova:

“Naarestoak ken nasentensiaanak a matay nupay saanak man la a nabista. Inton rabii, awanakon ditoy daga. Dikay maldaang wenno agsangit . . . , ta nagtulnogak iti Dios. Nupay kasta, awan unay ti nakaarusak ta no pagayatan ti Dios, maaddaanakto iti baro ken nasaysayaat a biag. . . . Nakataltalged ti riknak bayat nga umad-adanin ti maudi nga orasko. Pangngaasiyo ta awatenyo ti maudi a panangarakup toy anakyo ken manong a pudno nga agay-ayat kadakayo.” *

Tallo a soldado ti nangipadamag nga iti dalanna a mapan iti pakapapatayanna, nagkanta ni Antonio iti adu a kanta a pangidaydayawna ken Jehova. Silalagip ti Dios wenno ti Anakna kadagita a sakripisio. Masiguradotayo a masagrapto dagiti matalek a Kristiano a kas ken ni Antonio ti gunggonada babaen ti panagungar.​—Juan 5:28, 29.

[Footnote]