Agimtuod Dagiti Agtutubo . . .

Dagiti Music Video​—Kasanoak nga Agbalin a Napili?

“No makitak ti nagan ti mapagduaduaan a grupo wenno paulo ti kanta, iyakarkon iti sabali a channel.”​—Casey.

DAGITI MUSIC VIDEO​—ket makalinglingay unay para iti adu nga agtutubo. Ngem kas impakita ti napalabas nga artikulo iti daytoy a serye, adu a music video ti naglaon kadagiti makapasidduker nga eksena ti seksual nga imoralidad ken kinaranggas. * Siempre, no adda aniaman a kita ti paglinglingayan a mangitandudo iti konkondenaren ti Dios, rumbeng a saan a buyaen dayta ti maysa a Kristiano. Nupay kasta, saan nga amin a music video ket agdadata nga imoral. Mabalin a medio nasayaat ti dadduma. Ti sabsabali ket mabalin a kasla saan a naan-anay a dakes. Ngem mabalin a naan-anay a mangyallatiw dagita a video kadagiti nasikap a mensahe a maikontra iti Sao ti Dios.

No umannugot da tatang ken nanangmo a mabalinmo ti agbuya kadagiti music video, masapul nga agbalinka a napili ken usarem dagiti nasanay iti Biblia a ‘pannakabalin ti pannakaawatmo’ tapno mailasinmo ti maiparbeng ken di maiparbeng a buyaen. (Hebreo 5:14) Ania dagiti prinsipio ti Biblia a makatulong kenka iti daytoy a banag? Adtoy ti sumagmamano a teksto iti Biblia ken komento a mabalin a makatulong kenka.

Proverbio 4:23: “Ad-adda ngem iti isuamin a sabali pay a maaluadan, saluadam ta pusom, ta aggubuay iti dayta dagiti ubbog ti biag.” Addaanka aya iti alikamen a pang-isports wenno instrumento ti musika a napateg kenka? Sigurado a pagreggetam a taginayonen ti nasayaat a kasasaadna ken idulinmo dayta iti natalged a lugar. Saanmo la ketdi nga ikabil dayta iti kalsada no awan ti agbantay, uray iti apagbiit, di la ket ta madadael wenno matakaw. Wen, saluadam dayta. Umasping iti dayta, masapul nga ikeddengmo a saluadan ti pusom, ket dimo ipalubos nga agpeggad dayta uray iti apagbiit babaen ti panagbuyam iti dakes a paglinglingayan.

Efeso 2:1, 2: “Dakayo ti pinagbiag ti Dios nupay nataykayo kadagiti labsing ken basbasolyo, a nagnaanyo idi naminsan maitunos iti sistema ti bambanag daytoy a lubong, maitunos iti agturay iti autoridad ti angin, ti espiritu nga agtigtignay ita iti annak ti kinasukir.” Ti angin isut’ espiritu ti lubong, ti panagpampanunot ken ugali a mangpataud iti dakes a kababalin. Mayanninaw daytoy nga espiritu iti adu a music video ken interamente a maikontra iti espiritu ti Dios, a mangpataud  kadagiti kualidad a kas iti rag-o, talna, ken panagteppel.​—Galacia 5:22, 23.

2 Timoteo 2:22: “Umadayoka kadagiti tarigagay a naikasigudan iti kinaagtutubo.” Ti panagbuya kadagiti seksual nga eksena​—uray no apagbiit​—ti mangrubrob laeng iti tarigagay. Admitiren ti adu nga agtutubo a marigatanda a manglipat kadagita nga eksena; mabalin nga agannayasda pay a kanayon a manglagip kadagita. Kastoy ti impudno ti agtutubo a lalaki nga agnagan iti Dave, a nakabuya iti video a mangiparipirip iti imoralidad: “Kalpasan dayta, kada mangngegko ti kanta, malagipko daytoy a video.” Ti panagbuya kadagita a video ket mangpatanor iti tarigagay iti imoral a seksual a pannakinaig.​—1 Corinto 6:18; Colosas 3:5.

Proverbio 13:20: “Daydiay addaan kadagiti pannakilangen kadagidiay maag nakadakdakesto ti pagtungpalanna.” Imtuodem ti bagim, ‘Kayatko kadi nga awisen dagiti naranggas, mangar-aramid iti espiritismo, mammartek, ken imoral iti balayko?’ Ti pannakikadua kadagita a tattao babaen ti telebision ket katupag ti panangawis kadakuada iti balaymo. ‘Nakadakdakesto aya ti pagtungpalam’ no aramidem dayta? Kinuna ni Kimberly: “Iti maysa a panagtitipon, nakitakon a tultuladen dagiti babbai ti kawes wenno ti sala a naalas ti ipasimudaagna a nabiit pay a nabuyada iti maysa a video.” Mabalin nga adda metten nakitam a kasta. Babaen ti panangtulad dagitoy nga agtutubo kadagidiay saan a mangraraem kadagiti nadiosan a pagalagadan, ipakpakitada a mangrugrugin ti ‘nakadakdakes a pagtungpalanda.’ Ikagumaam ngarud a liklikan ti aniaman a kita ti “dakes a pannakitimpuyog.”​—1 Corinto 15:33.

Salmo 11:5: “Ni met laeng Jehova sukimatenna daydiay nalinteg kasta met daydiay nadangkes, ket ti asinoman a mangay-ayat iti kinaranggas pudno unay a guraen ti kararuana.” No agbuyatayo kadagiti video a mangitandudo iti minamaag, nakaro a kinaranggas, saan ngata nga agparang a ‘managayattayo iti kinaranggas’?

Ti Rigat iti Panagbalin a Napili

Agsipud ta “ti intero a lubong adda iti pannakabalin daydiay nadangkes,” rumigrigat ti agsapul iti paglinglingayan a saan a namulitan iti panagpampanunot ken kababalin ti lubong. (1 Juan 5:19) Mabalin nga adu a naalas a banag ti ipabuya ti dadduma a channel ti music video. Uray no saan nga agdadata nga imoral wenno naranggas ti programa, masansan nga itantandudona latta ti espiritu ti lubong. Napaliiw ti maysa a propesional a musiko a ti maysa a nalatak a channel ti music video “ket nagbalinen a ‘channel a mangitantandudo iti sumagmamano nga estilo ti panagbiag.’”

Mabalin a simple ti solusion: No dakes ti video, iyakarmo iti sabali a channel. Ti problema ket mabalin a nasken nga agbalinka latta a nasiput no agbuybuyaka kadagiti sabali a channel ti telebision. Adu ti mangipabuya kadagiti programa nga agdadata a naranggas, wenno naalas, wenno eksena a nakababain ti kasasaad dagiti tattao. Wen, mabalin a makapasuron, wenno makapaupay pay ketdi ti mangtagiragsak iti paglinglingayan bayat a nasken met a sisasaganaka a kanayon a mangyakar iti sabali a channel. Ket no dadduma, inton nayakaren iti sabali a channel, naapektarankan. Nayukuoken iti isipmo dagiti imoral a ladawan. Nupay kasta, masiguradom a bendisionan ni Jehova  a Dios ti aniaman a napasnek a panagreggetmo a mangsaluad iti pusom.​—2 Samuel 22:21.

Adda dadduma pay a praktikal a pamuspusan a nalabit a mapaneknekam a makatulong. Ti nadakamat itay a ni Casey, inlawlawagna ti naamirisna a makatulong: “Ti nagan ti maysa a grupo ken ti paulo ti kanta ket gagangay a maipakita iti pangrugian ti video. Adda reputasion dagiti banda, isu a dandani kanayon nga ammom no ania a grupo ken no ania a kanta ti posible a naalas. No makitak ngarud ti nagan ti mapagduaduaan a grupo wenno paulo ti kanta, iyakarkon iti sabali a channel iti rugi pay laeng.”

‘Panagsao iti Kinapudno iti Pusom’

Uray no ammom dagiti prinsipio ti Biblia, mabalin a mangrugrugin a panuynoyam ti dakes. Kasano? Babaen ti panangikalintegam iti kababalin a gagangay a maibilang a dakes wenno di maiparbeng. (Santiago 1:22) Saritaen ti Biblia kadatayo a ti gayyem ni Jehova ket daydiay “agsasao iti kinapudno iti pusona.” (Salmo 15:2) Isu nga agbalinka a napudno iti bagim. Dimo allilawen ti bagim. No maamirismo nga ikalkalintegam ti agbuya iti mapagduaduaan, iyimtuodmo iti bagim, ‘Talaga kadi nga anamongan ni Jehova ti panagbuyak iti daytoy?’ Laglagipem a masansan a saan laeng a ti panangammo no ania ti naimbag wenno dakes ti narigat no di ket ti panangikeddengmo nga aramidem ti naimbag! Rumbeng nga ibilangmo a napatpateg ti relasionmo ken Jehova ngem iti aniaman a kita ti paglinglingayan.​—2 Corinto 6:17, 18.

Masansan a saan nga umdas ti panangaramid iti di naimpusuan a determinasion tapno agbalinka nga ad-adda a napili. Mabalin a malipatam a dagus ti desisionmo no saan a natibker dayta. Saritaen ti Biblia kadatayo no kasano nga inkeddeng ti nadiosan a tao a ni Job ti agtalinaed a matalek ken ni baketna. Kinunana: “Maysa a tulag ti pinatalgedak kadagiti matak. Gapuna kasano koma nga agparangak a simamatmat iti maysa a birhen?” (Job 31:1) Agasem! Nakitulag ni Job iti bagina, wenno inkarina a sipapasnek a limitaranna ti kitaenna. Mabalinmo met nga aramiden ti kasta. Sititibker nga ikeddengmo​—sipapasnek nga ikarim iti bagim​—a saanmo a buyaen dagiti dakes a banag. Ikeddengmo dagiti espesipiko a limitasion. Ikararagmo dayta. Kalpasanna, tungpalem ti karim ken isuratmo pay no kasapulan. No kasapulam ti kanayonan a tulong, apay a dimo iyuman dayta iti natataengan a mabalinmo a pagtalkan​—dagiti dadakkelmo, kas pagarigan?

Gapu kadagiti peggad, inkeddeng ti dadduma a Kristiano nga agtutubo a saandan a pulos nga agbuya kadagiti music video. Aniaman ti desisionmo iti daytoy a banag, usarem dagiti pannakabalin ti pannakaawatmo. Pagtalinaedem a nadalus ti konsiensiam. No tagiragsakem laeng ti paglinglingayan a nasayaat ken makapabang-ar, maliklikam ti pannakadangran ken mataginayonmo met ti pannakigayyemmo ken Jehova.

[Footnote]

[Ladawan iti panid 12]

Dadduma a video a saan nga agdadata nga imoral ti kaskasdi a mangitandudo kadagiti makadangran nga ideya

[Ladawan iti panid 13]

Ikeddengmo a saanmo a buyaen dagiti banag a kagura ti Dios