Panagbiahe iti Kaatiddogan iti Lubong a De Koriente a Bus
Panagbiahe iti Kaatiddogan iti Lubong a De Koriente a Bus
BABAEN TI MANNURAT TI AGRIINGKAYO! IDIAY UKRAINE
Mabalin aya nga igatang ti sumagmamano a sinsilio iti di malipatan a kapadasan? Wen, no igatangmo dayta iti tiket iti kaatiddogan iti lubong a de koriente a bus. Agdaliasat ti de koriente a bus iti agarup 95 a kilometro, manipud Simferopol, iti tengnga ti Peninsula ti Crimea iti abagatan a Ukraine, agingga idiay Yalta, iti nainar a makin-amianan a kosta ti Nangisit a Baybay. Apay a didakami kuyogen iti daytoy nakaay-ayat a biahe?
KADAGITI opisina ti Simferopol Transportation, naam-ammomi ni Slavnyi Giorgi Mihailovich—Mr. Slavnyi, iti ababa. Agtartrabahon ditoy sipud pay idi 1959, ket talaga nga aduan kapadasanen iti negosiona. Kinuyognakami nga umuna ni Mr. Slavnyi iti uneg ti museo ti luglugan a pakabuyaan iti adu a retrato dagiti lallaki ken babbai a nagaramid iti daytoy de koriente a bus. “Saan laeng a sementado a kalsada ti kasapulan ti de koriente a bus,” inlawlawagna. “Nagaramid dagiti trabahador iti ginasut a torre a mangtengngel iti adda iti ngato a kinilkilometro a kable ti koriente. Dagiti met inheniero ti nangdisenio kadagiti planta ti elektrisidad a mangsuplay iti koriente.”
“Apay a de koriente a bus ti us-usarenyo iti kasta kaadayo a ruta iti kabambantayan imbes a dagiti de gasolina a bus?” inyimtuodmi.
“Basbassit ti polusion nga aggapu kadagiti de koriente a bus ngem kadagiti de gasolina,” kunana. “Salsalaknibanmi ti tawidmi a di pay nadadael a kabambantayan ken nadalus a kosta.”
“Ngem talaga aya a nakaro ti polusion nga aggapu iti sumagmamano a de gasolina a bus?” inyimtuodmi.
“Sumagmamano a bus!” kinunana. “Ayna, idi kapigsada sumagmamano a tawen ti napalabasen, nagadu ti bus no kalgaw, ket agbiahe dagiti de koriente a bus iti kada dua agingga iti tallo a minuto ken mamin-400 nga agbiaheda iti kada aldaw.”
Idi naammuanmi daytoy, nagagarankami nga agbiahe.
Mangrugin ti Biahe
Nagrubbuatkami iti Simferopol Central Station. Pinulpullo a kable ti koriente ti adda iti ngato a kasla pirak nga atiddog a linia. Binirokmi ti ayan ti kahera ket gimmatangkami iti tiketmi. Kalpasanna, naglugankami iti No. 52 a de koriente a bus. Agbiahekamin!
Kalpasan ti 29 a kilometro, simmang-atkamin iti kabambantayan. Di nagbayag, addakamin iti anniniwan dagiti nagngangato a bantay. Nakalamlamiis sadiay. Dagiti rangkis ket aduan kadagiti kanayon a berde a kaykayo ken nammek, agingga iti tantanap a naabbungotan iti niebe. Apagdanonmi iti tapaw, dagus a nasdaawkami iti makapaamanga nga isasalogmi. Sumalsalogkami iti agsikkosikko a kalsada. Bimmannayat ti taray ti de koriente a bus
bayat a sumalsalogkami. Sitatalged a naisalognakami ti drayber!Iti sakaanan ti bantay, simrekkami iti ili ti Alushta, nagpakannawankami, sakam nagpaabagatan iti igid ti kosta. Iti kannigidmi isut’ Nangisit a Baybay. Iti kannawan, kasla mangsalaknib a pader ti nadaeg a Kabambantayan ti Crimea.
Iti pangadaywen, nakitami ti Bear Mountain iti deppaar ti bario Pushkino. Sigun iti sarsarita nga inlawlawag dagiti umili, adda nagdakkel nga oso a nagbalin a bato bayat nga umin-inum iti Nangisit a Baybay. Kunada a ti ulona ket nairareb pay laeng nga umin-inum iti baybay. Inyimtuodko iti bagik, ‘Apay a saan nga ibaga dagiti umili a natnag ti oso iti danum agsipud ta adu unay ti nainumna nga arak? Ngamin, adu a kaubasan ti nalabsanmi. Daytoy a pagilian ket agpatpataud iti arak ken ayan ti Massandra Vineyard, a namin-adun a nangabak kadagiti internasional a salip.’
Simmaganad, iti bario ti Nikita, dimsaagkami iti de koriente a bus idiay Nikitskyi Botanical Garden. Talaga nga internasional ti hardin, ta addaan iti rinibu a mula manipud iti intero a lubong. Babaen iti nalaing a giyami a ni Tamara, nalang-abmi ti makaay-ayo nga ayamuom dagiti kanayon a berde a kayo nga adda iti asideg ti ruangan. “Dagitoy ti sedro ti Lebanon,” inlawlawagna. “Dagitoy ti nadaeg a kaykayo a pinagaramid ni Solomon iti templona.” Husto ti giyami, ta sigun iti Biblia, 1 Ar-ari 5:6-18.
adu a sedro ti nausar iti dayta nagdakkel a proyekto ni Solomon.—Iti panagpagnapagnami iti kanayon a mapagnaan a graba a desdes, nadlawmi dagiti nasiit a mula. “Rosas,” kinuna ni Tamara. “Ti hardin ket addaan iti 200 a nadumaduma a kita ken agsabongda no arinunos ti Mayo ken apagtapog ti Hunio.” Kalpasanna, nagtakderkami iti sango ti maysa a kayo nga agarup 2.5 a metro ti katayagna. “Daytoy ti iron tree,” kinuna ni Tamara kadakami, a nalawag a naragsakan iti ispesimen. “Ti nalagda a kayo a kasukat ti landok, ket mabalin nga ipalok a kas iti lansa. Lumned pay ketdi iti danum.” Di nagbayag, dimtengen ti de koriente a bus, ket naragsakankami a nagtugaw manen ken nangyinana kadagiti nabannog a sakami kabayatan ti apagbiit a panagbiahemi nga agturong idiay Yalta, ti maudi a pagsardengan ti de koriente a bus. Adu ti makalagip iti Yalta gapu la unay iti historiko a komperensia a nainaig iti Gubat Sangalubongan II. Naangay daytoy a komperensia iti Livadia Palace idi 1945. Sadiay a nagmimiting ti tallo a kangrunaan nga Aliado nga Estado tapno iplanoda ti maudi a panangraut ken panangsakupda iti Alemania nga iturturayan idi dagiti Nazi.
Panagawid
Rumabrabiin, ket orasen tapno aglugankami iti de koriente a bus iti panagawidmi. Iti igid ti kalsada, addada ubbing nga aglaklako iti nadumaduma a bugkong ti sabsabong. Bimmabakami ta kayatmi ti gumatang, ket dagus nga immaribungbong ti grupo dagiti magagaran nga aglako. “Ania dagita a nakapurpuraw a sabong?” inyimtuodko ken ni Yana, maysa a 15 ti tawenna a balasitang a napusyaw a kape ti buokna. “Snowdrop,” sipapannakkel nga insungbatna. Insurona ti nagdakkel a turod iti ballasiw ti kalsada sana impasarunson: “Al-alaenmi dagitoy iti dayta a bangkirig no bigbigat bayat a marunrunaw ti naitaraigid a niebe.”
Naglugankami manen iti de koriente a bus, a nagbiahe agingga a nakadanonkami iti paginggaan ti biahemi. Kaskam la ubbing a kalkalpas a naglugan iti roller coaster iti damo a gundaway isu a kayatmi ti agluganto manen iti dayta!
[Dagiti Mapa iti panid 22, 23]
(Para iti aktual a pannakaurnosna, kitaem ti publikasion)
UKRAINE
CRIMEA
Nangisit a Baybay
SIMFEROPOL
↓ Chatyr-Dag Mountain
Alushta
↓
Pushkino
↓ Bear Mountain
Nikita
↓ Massandra
Yalta
Livadia
Ai Petri Mountain
Alupka
[Ladawan iti panid 22, 23]
Ai Petri Mountain
[Dagiti Ladawan iti panid 23]
Vorontsov Palace, Alupka
[Ladawan iti panid 23]
Marble Cave, Chatyr-Dag Mountain, Simferopol
[Ladawan iti panid 23]
Bear Mountain
[Ladawan iti panid 24]
‘Swallow’s Nest’ Castle, Yalta
[Ladawan iti panid 24]
Bodega ti arak idiay Massandra, Yalta, nga addaan iti adu a botelia ti sherry manipud pay idi 1775
[Ladawan iti panid 24]
Uchansu Waterfalls, Yalta, iti kangato a nasurok a 320 a pie, ti kangatuan iti Crimea
[Ladawan iti panid 24]
Historiko a Livadia Palace, Yalta