Manipud Kadagiti Agbasbasa

Buok Apresiarek ti artikulo a “Madanaganka Aya Maipapan iti Buokmo?” (Agosto 8, 2002) Maysaak a beautician iti 14 a tawenen. Ar-aramidenmi ti imbagayo a pamay-an ti panangsagaysay iti adda depektona a buok. Dayawek dagiti artikuloyo agsipud ta makitak a propesional ti pannakaisuratda.

K. K., Japan

Kas nagaget nga agbasbasa iti Agriingkayo!, masapul nga iyebkasko ti panangapresiarko iti daytoy nga artikulo. Nangrugiak nga aguban idi rugrugi ti kinatin-edyerko. Idi arinunos ti kinatin-edyerko, madlaw unayen dagiti ubanko. Talaga a mabainak idi gapu iti dayta. Tinulongannak ti artikulo a matmatak a sieemma ti langak bayat nga ad-adda nga ipamaysak ti panangpatanorko kadagiti nadiosan a kualidad.

E. J., Nigeria

Panagkursonada Pagyamanan iti ababa a padamag iti “Panangmatmat iti Lubong” a napauluan iti “Nabartek iti Ayat.” (Agosto 8, 2002) Nakatulong kaniak daytoy nga artikulo tapno maamirisko nga uray kadagiti kasasaad nga agtultuloy ti panagkursonada, talaga a saan a natibker dayta a pamuon iti naragsak a panagasawa. Pudno a dagiti pammagbaga a kas iti daytoy ti mabalin a mangispal iti maysa a tao manipud iti minamaag a panagbiag!

P. L., Russia

Dagiti Luau Nagustuak a binasa ti artikuloyo a “Padasentayo ti Luau Dagiti Taga Hawaii.” (Hunio 8, 2002) Sumagmamano a tawen ti napalabasen, dimmar-ayak iti maysa a luau idiay Hawaii. Nadlawko a nalaokan dayta iti narelihiosuan ken espiritistiko nga aspeto. Uray no dagiti luau ita ket saan a nainaig iti narelihiosuan wenno espiritistiko nga aspeto, kasano ti pannakaidumada iti dadduma a selebrasion a nagtaud kadagiti pagano ngem inadaptar la ngamin dagiti moderno a kultura tapno agbalin a makalinglingay a taripnong ti pamilia?

L. F., Estados Unidos

Kastoy ti sungbat ti “Agriingkayo!”: Kas salaysayen iti footnote iti panid 24, nupay ti luau ket mabalin a nainaig idi kadagiti palso a narelihiosuan nga aramid, dayta a sao ti tumuktukoy laeng itan iti pasken dagiti taga Hawaii. Ti espesipiko a padaya a pakayaplikaran ti “luau” ket mabalin wenno nalabit saan a maitutop a tabunuan ti maysa a Kristiano. Kas iti amin nga aspeto ti panagbiag, rumbeng nga agaramid dagiti Kristiano kadagiti desision a mamagbalin a nadalus ti konsiensiada iti imatang ni Jehova a Dios.​—1 Timoteo 1:5, 19; kitaem met ti Enero 8, 2000, a ruar ti “Agriingkayo!” panid 26-7.

Postpartum Depression Pagyamanan unay iti artikulo a “Nagballigiak a Nakidangadang iti Postpartum Depression.” (Hulio 22, 2002) Panagriknak ket kas man la naisurat daytoy nga artikulo para kaniak. Nupay saanak nga agsagsagaba iti postpartum depression gapu ta awan ti annakmi nga agassawa, makatawen ket kagudua itan a makidangdangadangak iti depression ken danag. Kanayon a nabannog ken mariribukanak ket diak makaaramid kadagiti simple a desision. Mabutengak a makipulapol kadagiti tattao. Diak man la makapan uray iti groseria no diak kadua ni lakayko. Umim-imbagakon ken agtomtomarak iti agas. Naammuak iti daytoy nga artikulo nga ad-adu nga amang ti kabaelak pay nga aramiden. Nabasa met ni lakayko ti artikulo, ket naammuanna no kasano nga agbalin nga ad-adda pay a manangandingay.

J. R., Estados Unidos

Anian a yamanko gapu iti artikulo maipapan iti postpartum depression! Kalpasan a naipasngay ti maikatlo nga anakko, imbaga dagiti doktor nga agsagsagabaak iti nakaro a postpartum depression. Kasakbayanna, impagarupko no agmauyongak. Nakaam-amak ken nakaladladingit dayta a panawen kaniak ken iti pamiliak. Agtomtomarakon kadagiti makaagas a mula ken bitamina ket regularen nga agehersisioak. Amin dagitoy ti tumultulong kaniak iti panangikagumaak a makidangadang. Pangngaasiyo ta pakibagayo ken ni Janelle nga agyamanak iti panangiranudna iti pakasaritaanna kadakami.

J. C., Estados Unidos