Panangidrowing Kadagiti Nagimbag ken Nagdakes ti Pakasaritaanda

BABAEN TI MANNURAT TI AGRIINGKAYO! IDIAY BRITANIA

NAPADASAM kadin ti nangidrowing iti rupa ti tao? Narigat la ketdi dayta. Ngem, kasano ngay no masapul nga idrowingmo ti tao a damo pay laeng a makitam ken iti las-ud laeng ti sumagmamano a minuto? Narigrigat pay ta nasken a lagipem laeng ti langana a nakitam. Kalpasanna, ti malagipmo a langana nga indrowingmo ket rumbeng a makitan dagiti agur-uray a kameng ti telebision iti las-ud ti 30 a minuto!

Kasla imposible a maidrowing ti kaaduan kadatayo ti kasta a ladawan iti apagbiit laeng. Nupay kasta, adda sumagmamano a lallaki ken babbai ditoy Britania a paglainganda daytoy a trabaho. Siasinoda? Dagiti artist iti korte.

Dagiti Legal a Restriksion

Dagus nga aginteres ti publiko kadagiti kaso iti korte, ket iti adu a pagilian, dagita ti gagangay nga ipadamag ti telebision ken retrato a maipabuya. Ngem ditoy Britania, saan a maipalubos a maipabuya dayta iti telebision ken saan a maipalubos a maretrato. Siiinget a maparitan dagiti tattao a “mangretrato wenno mangidrowing iti siasinoman a tao iti sadinoman a korte”​—a pakairamanan dagiti hues, hurado, wenno saksi agraman dagiti naidarum wenno balud. * Daytoy ti makagapu a kasapulan ti kinasigo dagiti artist iti korte, tapno irekordda nga agpaay iti media dagiti mapaspasamak a bista iti uneg ti korte.

Tapno maammuak ti ad-adu pay maipapan iti daytoy makapainteres unay a trabaho, binisitak ti maysa nga eksibit ti arte ken disenio a naangay idiay London. Iti maysa a nalatak a puesto, naam-ammok ni Beth a maysa kadagitoy naisangsangayan a grupo dagiti artist. Ti umuna a dinamagko ket, “Mano nga orasmo iti korte a mangmingming iti naidarum?”

Oras ken Panggep

“No tumakder ti maysa a balud iti pagbistaan iti damo a pannakabista, gagangayen nga agtakder sadiay iti nasurok la bassit a dua a minuto, ngem umdasen dayta,” impasiguro ni Beth kaniak. “Addan tiempok a mangilasin iti itsura ti ulo, buok ken sukog ti agong, mata, bibig, ken ngiwatna. Ammok metten ti rakab ti rupa, kalawa ti muging, ken ti kadakkel ti piditpiditna agraman ti dadduma pay a pakailasinan, kas iti barbas wenno antipara. No natandaanak dagitoy, addaanakon iti kangrunaan nga impormasion para iti umiso a drowingko.

“Ngem no dadduma, rumigrigat ti trabahok. Kas pagarigan, iti nabiit pay a kaso, adda 12 a lallaki iti pagbistaan! Agpayso nga addadan sadiay iti 15 a minuto, ngem kasapulan ti adu a konsentrasion tapno maidrowingmo a mammaminsan ti 12 a rupa. Mabalin a kunaenyo a nalaingak a mangtandaan iti nakitak, ngem pinatanorko dayta iti adu a tawen. No panawakon ti korte, no agkidemak, nasken a silalawag a malagipko dagiti langa a nakitak.”

Simmaganad a dinamagko, “Mano nga orasmo nga agsukimat kadagiti impormasion maipapan kadagiti tattao a masabatmo iti korte?” Nasdaawak iti sungbat ni Beth.

 “Saanak nga agsukimat a kas kadagiti reporter. Mapanak idiay korte nga awan ti pamalatpatak, ken ikagumaak ti di mangikabil iti aniaman a panangipapanko iti aniaman nga idrowingko. Ikagumaak nga idrowing ti pannakabista a maar-aramid iti korte, a sadiay, inaldaw nga agsasabali dagiti makitam a langa. Rumbeng a laglagipek a mabalin a makitanto ti hurado dagiti drowingko, iti telebision man wenno iti diario ti nasion, isu a diak kayat nga impluensiaan ti siasinoman kadakuada a mangibaga iti, ‘Talaga a nakabasol ti langana!’ Daytoy napateg nga aspeto ti nagdumaan ti drowing iti korte ken ti panangipinta iti ladawan.”

“Ti Naisangsangayan a Kanito”

Idi dinamagko ken ni Beth no ania ti sekreto iti panagballigina, kinunana: “Siputak ti awagak a ‘Ti Naisangsangayan a Kanito’​—daydiay naisangsangayan a kasasaad bayat ti pannakabista. Kas pagarigan, no ilumlom ti naidarum ti rupana kadagiti dakulapna, ipasimudaagna a naabaken iti kaso. Iti sabali a kanito, ti ekpresion ti rupa ti maysa a babai a mangsungbat iti saludsod a ‘Nasayaatka aya nga ina?’ ket nasaysayaat ngem ti isungbatna. Umasping iti dayta, ti panangpunas iti lua babaen ti panio ti mabalin a mangipalgak iti riknana.

“Nasken a siputan met ti artist iti korte ti kasasaad iti korte. Kaipapananna nga idrowingna ti hues, dagiti abogado, ken opisial iti korte, agraman dagiti libro, silaw, ken muebles. Saan a pulos a masiputan ti kaaduan a tattao ti kasta a kompleto a ladawan, isu nga aginteresda kadagitoy. Sadino ti pagdrowingak? No dadduma iti kuarto ti korte nga agpaay kadagiti kameng ti warnakan, ngem kaaduanna, agtugawak iti sadinoman a natalna a tukad ti agdan. Ngem masapul nga agdardarasak nga agsubli iti korte tapno nayonak ti ad-adu pay a rupa ti drowingko no maawagan ti baro a saksi wenno mangidepensa ti abogado ti naidarum.” Umis-isem ni Beth idi kinunana: “Ay wen. Ammok nga adun kadagiti drowingko ti nakasab-it iti opisina dagiti abogado.”

Maay-ayatanak a nangbuya kadagiti retrato iti puestona. Amin dagitoy ti nangipalagip kadagiti kaso iti korte a nakairamanan dagiti nagimbag ken nagdakes ti pakasaritaanda a tattao a nabasak kadagiti kallabes a tawen. Kalpasan ti agarup sangapulo a minuto, idi agsagsaganaakon nga agpakada, sipaparabur nga inyawat ni Beth kaniak ti maysa a drowing. Siak dayta.

[Footnote]

[Dagiti Ladawan iti panid 14, 15]

Drowing iti korte ken idi naipablaaken iti diario (kannigid)

[Credit Line]

© The Guardian