Manipud Kadagiti Agbasbasa

Basura Pagyamanan unay iti naintiempuan a serye ti akkub a “Basura​—Gaburannatayto Aya?” (Agosto 22, 2002) Nalaka ti maaddaan iti “ugali a managibelleng” no agnanaedka iti nakabakbaknang a pagilian. Ti artikuloyo ti namagpanunot a naimbag kaniak maipapan kadagiti peggad a pataudenna. Manipud ita, diakton agdardarasudos a mangibelleng kadagiti bambanag!

J. B., Estados Unidos

Talaga a nagustuak dagiti artikulo maipapan iti problema a basura. Nabayagen nga agnanaedak iti dakkel nga apartment nga addaan iti dadakkel a basuraan iti dayta a complex. Naminsan, magmagnaak iti ruar ket nadlawko nga adda baro ken di pay nausar a coffeemaker iti rabaw ti napunno a basuraan. Iti napalabas, imbaga ti dua a babbarito nga adda balitok a relo a nakitada sadiay. Naklaatak iti mabalin a masarakan kadagidiay a basuraan. Ita, addan pakaammo kadagitoy a pakabasaan iti, “Maiparit ti agsukain kadagiti basuraan.”

B. Q., Estados Unidos

Panagparetoke Naimpusuan nga agyamanak iti artikulo nga “Agimtuod Dagiti Agtutubo . . . Rumbeng Aya nga Agparetokeak?” (Agosto 22, 2002) Agtawenak iti 14, ket idiay eskuelaan, adda paset ti rupak nga uy-uyawen ti dadduma nga estudiante. Inkeddengko a nasken nga iparetokek dayta. Gapu iti daytoy nga artikulo, naamirisko dagiti pudno a motibok ket naawatak a nagkamaliak. Ti makin-uneg a kinataotayo ti kapatgan gayam ken Jehova.

C. T., Francia

Dua a bulanen ti napalabas, idi a makisarsaritaak iti maysa a katrabahuak, napagsaritaanmi ti maipapan iti panagparetoke. Patienna a di umiso agsipud ta daytat’ pakakitaan ti di panagraem iti Namarsua. Awan idi ti masarakak nga aniaman nga espesipiko nga artikulo manipud kadagiti publikasiontayo. Nupay kasta, imbagak kenkuana dagiti mayataday a prinsipio ti Biblia, a nasarakak idi agangay iti daytoy nga artikulo. Naragsakan idi impakitak kenkuana daytoy nga artikulo.

M. R., Estados Unidos

Kolor Nabibiit ti panangikeddengko a mapintaan ti balayko kalpasan a nabasak ti artikulo a “Pintaam ti Pagtaengam.” (Agosto 22, 2002) Saanak laeng nga agyaman kadakayo gapu iti artikulo no di ket agyamanak met ta tinulongandak a makaekonomia!

R. M., Estados Unidos

Kinapintas Agtawenak iti 21, ket mariribukanak agsipud ta pagarupek a saanak a napintas. Nagsayaat ti panangyebkas ni Tyler iti riknak iti artikulo nga “Agimtuod Dagiti Agtutubo . . . Kasano nga Agbalinak nga Ad-adda a Makaay-ayo?” (Hulio 22, 2002) Kasapulak a talaga ti praktikal ken naibasar iti Biblia a pammagbaga daytoy nga artikulo. Pagyamanan iti daytoy ken iti dadduma pay a publikasion nga agtultuloy a tumultulong kadagiti agtutubo a maipaspasango iti nagadu a parikut iti daytoy nakaap-aprang a lubong. Ti aramidek laengen ket iyaplikarko daytoy a pammagbaga.

P. L., Zambia

Panagkararag Naimpusuan nga agyamanak iti artikulo a “Ti Panangmatmat ti Biblia: Dagiti Kararag a Denggen ti Dios.” (Setiembre 8, 2002) Malidlidayak unay idi aldaw a binasak dayta. Talaga a pinabilegnak a mangbasa iti nailanad iti Isaias 41:10. Naragsakanak unay ta saan la a sisiak ti pabpabilgen ni Jehova no di ket uray ti sabsabali ken dengdenggenna ti amin a kararagtayo ken uray dagiti pampanunotentayo! Duapulo a tawenen nga agnanaedak iti sangakabbalayan a saan nga agkakarelihionan. Narigat dayta agsipud ta agsagsagabaak met iti nakaro a sakit iti nasurok a 30 a tawenen. Pagyamanan unay kadagitoy nagsayaat a magasin. Pabpabilgendak nga agtultuloy nga agibtur.

D. G., Alemania