Manipud Kadagiti Agbasbasa

Agimtuod Dagiti Agtutubo Pagyamanan gapu iti artikulo nga “Agimtuod Dagiti Agtutubo . . . Apay a Dinak Ay-ayaten ti Maysa Kadagiti Dadakkelko?” (Setiembre 22, 2002) Agtawenak iti 16, ket diak nakitan ti agpayso nga amak nanipud idi 4 ti tawenko. Inyebkas daytoy nga artikulo ti pudno a riknak. Husto ti kinunana nga adda laeng sumagmamano a banag a nasasaem ngem iti panangilaksid ti maysa nga ama wenno ina. Agyamanak gapu iti daytoy naespirituan a taraon iti umiso a tiempo.

J. J., Estados Unidos

Inkeddeng ti dadakkelko nga agdiborsioda 13 a tawen kalpasan a nagsinada. Diak idi maawatan no apay nga agsagsagabaak iti kasta unay, gapu ta impagarupko no nabayagen a nailiwliwagko ti saemna. Ti pananganag iti makagapu ti napalalo a panagladingitko ti makatulong kaniak tapno ad-adda nga espesipiko ti panagkararagko ken ipalladawko pay ketdi ken Jehova daytoy a dadagsenko.

M. D., Italia

Pinanawan ni tatangko ti pamiliami idi innem ti tawenko. Nanipud idin, manmanon a makipagkita kaniak. Adun a tawen a makonkonsiensiaak. Nagbanaganna, kanayon a marigatanak a mangyebkas iti riknak iti sabsabali. Tinukay ken tinulongannak dagiti kapadasan iti artikuloyo tapno maamirisko a saan la a sisiak ti adda iti kastoy a kasasaad. Pangngaasiyo ta diyo tagibassiten ti adu a pagimbagan a masagrap dagiti agbasbasa a kas kadakami ken ti panagyamanmi gapu kadagitoy!

A. H., England

Agtawenak iti 16, ket nabiit pay nga indiborsio ni tatang ni nanangko. Nakapungtot ken naldaangkami a tallo nga agkakabsat. Talaga a nagsayaat daytoy nga artikulo. Nakasangitak kalpasan la unay a nabasak dayta. Dineskribirna ti amin a marikriknak. Makaay-ayo ken nakadungdungngo dagiti nausar a sasao. Ad-adda a makapikapik no ulitek a basaen. Namin-adun a pinampanunotko no talaga met laeng a maikariak iti panagayat ni amak. Dayta ti gapuna a naliwliwaak unay iti daytoy nga artikulo. Makapabang-ar unay a maammuan a nupay dinak ay-ayaten ni tatangko, kanayon nga ay-ayatennak ni Jehova. Awan ti rumbeng a pagdanagak a kellaat nga agbalbaliw ni Jehova ken tallikudannak.

A. M., Estados Unidos

Dimmakkel ti pamiliami a mangnginum ni tatangko, isu a nagsagaba iti nakaro ni nanangko. Didakami unay nga inas-asikaso nga agkakabsat. Nariknak idi nga awan ti serserbik ken napanunotko pay a nasaysayaaten no matayak. Nagpatulongak kadagiti kararagko. Agyamanak unay idi dimteng daytoy nga artikulo. Naliwliwaak a nakaammo nga uray dagiti tattao nga adda iti kastoy a kasasaad ket mabalinda nga ikeddeng a maaddaanda iti naragsak ken naballigi a masakbayan babaen ti panangyaplikarda kadagiti prinsipio ti Biblia. Makapagbalinak met gayam a naragsak!

A. I., Japan

Vanilla Medio madanaganak maipapan iti artikulo a “Vanilla​—Rekado a Nabayagen ti Pakasaritaanna.” (Setiembre 22, 2002) Adun a tawen ti napalabas, nabasak ti maysa nga artikulo maipapan iti makasabidong a vanilla a naggapu idiay Mexico. Adu a tattao ti gumatgatang iti dayta ket dida ammo a makasabidong.

P. D., Estados Unidos

Kastoy ti sungbat ti “Agriingkayo!”: Dadduma a vanilla a napataud idiay Mexico​—agraman iti dadduma pay a pagilian​—ket aglaon iti banag a naala iti bukel a maawagan iti tonka bean, nga aduan iti coumarin. Daytoy a kemikal ket imparit ti Food and Drug Administration ti E.U. gapu ta posible a makasabidong. Yantangay saan a mabalin nga ammuen ti kaadda ti coumarin babaen laeng ti panangkita wenno panagangot, maibalakad kadagiti aggatang a gumatangda laeng iti vanilla kadagiti mapagpiaran a tiendaan. Kanayonanna, yantangay nangina ti puro a vanilla gapu iti gatad ti pannakapataudna, rumbeng nga agannadtayo iti “baratilio” a “karkarna ti kinalakana.”