Manipud Kadagiti Agbasbasa
Manipud Kadagiti Agbasbasa
Pamilia nga Addaan iti Agsolsolo a Nagannak Kurang ti sasao a mangyebkas iti kasta unay a ragsakko a nangbasa iti serye ti akkub a “Makapagballigi Dagiti Pamilia nga Addaan iti Agsolsolo a Nagannak.” (Oktubre 8, 2002) Kayatko nga ulit-uliten a basaen! Maysaak nga agsolsolo a nagannak ti dua nga annak. Kada basaek dagitoy nga artikulo, pappapigsaek manen ti pakinakemko a makapagballigiak ken saanak nga agmaymaysa. Pagyamanan unay!
C. B., Estados Unidos
Maysaak a diborsiada. Nagrigat ti kasasaadko idi napanawanak a kadua ti dua nga annakko. Agyamanak ken Jehova ta dengdenggenna dagiti asugmi ken sumungbat babaen kadagita a naayat nga artikulo. Iti kasta, maipanamnamana a pampanunoten ken ay-ayatennakami.
L. T., Czech Republic
Pagyamanan unay iti panangipablaakyo kadagitoy nga artikulo. Mangrugrugin a mariknak a nakapimpiman ti agdama a kasasaadko kas agsolsolo a nagannak ken ti pananggedko manen kalpasan ti adu a tawen a panagtagibalayko. Nupay kasta, dagiti artikulo ti nangted kaniak iti namnama ken pammaregta a kasapulak tapno makapagtultuloyak. Panggepko nga iyaplikar dagiti singasing, kas iti panagbalin nga organisado ken regular a panangyadal iti Biblia iti pamiliak. Idulinko daytoy a magasin iti lugar a nalaka a magaw-atko tapno basaek kada mangrugi manen a mariknak a nakapimpimanak.
B. A., Estados Unidos
Agarup 14 a tawenen nga agsolsoloak a nagannak iti barok ken balasangko. Agyamanak iti panagreggetyo a mangaramid kadagiti publikasion, ngem naupayak iti dadduma a paset daytoy a serye. Kas pagarigan, naulit-ulit ti sao a “naballigi.” Panagkunak ket inyaplikarkon dagiti singasing iti panid 11, ngem saanak a kas iti kinaballigi dagiti nagannak a naretrato iti dayta a panid. Sigurado a ti balligi ket saan laeng nga agpannuray iti panagbalin ti maysa nga anak kas amin-tiempo nga ebanghelisador wenno misionero.
M. S., Japan
Kastoy ti sungbat ti “Agriingkayo!”: Ammomi a nadumaduma ti pannakarukod ti makuna a balligi. Ti panggepmi ket mangted kadagiti praktikal a singasing a makatulong kadagiti agsolsolo a nagannak a mangdaer kadagiti nakaro a rigat iti biag ken mangipanamnama a saan a barengbareng dagiti panagreggetda. Nausar ti ehemplo dagiti agtutubo nga agserserbi iti amin a tiempo tapno maipakita a makapagballigi dagiti agsolsolo a nagannak iti panangpadakkelda kadagiti annak a managbuteng iti Dios. Namnamaenmi nga itultuloy koma ti amin a nagannak—agsolsoloda man wenno saan—nga ipaay ti naespirituan, emosional, ken pisikal a kasapulan ti annakda.
Bisin Idiay Ireland Pagyamanan iti makaisuro nga artikulo a “Ti Dakkel a Bisin Idiay Ireland—Pakasaritaan ti Ipapatay ken Iyaakar.” (Oktubre 8, 2002) Kabayatan daytoy a bisin, nagbarko a nagpa-Canada ti adu nga imigrante a taga Ireland. Adu ti natay gapu iti kolera, tipus, ken dadduma pay a sakit. Adu nga ubbing ti naulila, ket dadduma ti inampon dagiti pamilia a Pranses ti pagsasaoda isu a nagbalin a Pranses ti apeliedoda. Isu nga idi agangay, saanen nga ammo no taga Ireland ti dadduma a tattao.
K. S., Canada
Agimtuod Dagiti Agtutubo Adda maibagak maipapan iti artikuloyo nga “Agimtuod Dagiti Agtutubo . . . Apay a Saannak nga Ay-ayaten ti Maysa Kadagiti Dadakkelko?” (Setiembre 22, 2002) Kasta unay ti ladingitko kalpasan a nagdiborsio ti dadakkelko. Pasaray nariknak a kasla awan ti tumultulong kaniak. Addaanak iti nakasingsingpet a nanang ken kabsat a lalaki nga ar-arapaapen ti siasinoman, ngem no dadduma, mariknak nga adda kurang iti pusok—gapu ta dinak ay-ayaten ni tatangko. Nagkararagak ken Jehova nga ikkannak koma iti mangpabileg kaniak. Kasta ti eksakto nga inaramid daytoy nga artikulo. Tinulongannak a maaddaan iti nasaysayaat a panangmatmat iti bagik, tapno masursurok no kasano ti agibtur. Ti Salmo 27:10 ti agpayso a nangpikapik kaniak. Tinulongannak a makaamiris nga ay-ayatennak ni Jehova uray no kasla awanen ti mangay-ayat kaniak.
D. B., Estados Unidos