‘Nalabit Inispalna ti Biagko!’

“DIAK idi inkankano dagiti sintomana,” inlawlawag ni Claus, a sumagmamano idi a lawas nga umanangsab. Ngem adda napasamak a namagpanunot kenkuana iti naiduma.

“Kanayon nga adda dagiti iparabawko a napalabas a ruar Ti Pagwanawanan ken Agriingkayo! iti lamisaan a kaabay ti kamak,” kinuna ni Claus. “Maysa a rabii, naiparna a ti Agriingkayo! a Marso 22, 2001 ti napidutko, ket kinitak ti nadumaduma nga artikulona agingga a nakitak ti artikulo a ‘Dagiti Nakaskasdaaw iti Sistema Sirkulatorio.’ Idi basbasaek ti artikulo, dagus a naamirisko a dagiti sintomasko ket kaasping ti nadeskribir nga angina, wenno ti panagpanaas ti barukong ken kannigid a takiag gapu iti sakit ti puso.”

Dagus a nagpaeksamen ni Claus iti klinika iti lugarda ket naammuan nga adda depekto dagiti urat ti pusona. Insigida a naagasan. Imbaga ti doktor ken ni Claus nga isut’ nagasat ta no nabaybay-an ti kasasaadna, nalabit naataken ti pusona a mabalin nga isut’ pakatayanna. Kastoy ti insurat ni Claus kadagiti managipablaak daytoy a magasin: “Nalabit inispal ti Agriingkayo! ti biagko!”

Saan laeng a dagiti nakaskasdaaw iti nakaparsuaan ti salaysayen ti Agriingkayo! no di ket uray dagiti mapaspasamak iti bagi ti tao. Iti panid 4 daytoy a magasin, kastoy ti nailanad a panggep ti Agriingkayo!: “Kangrunaanna, pabilgen daytoy a magasin ti panagtalek iti kari ti Namarsua a natalna ken natalged a baro a lubong.”

Maitunos iti dayta a panggep, naipablaak ti broshur a napauluan iti Ania ti Panggep ti Biag? Kasanoyo a Masarakan Dayta? Mabalinmo ti agkiddaw iti maysa a kopia babaen ti panangisuratmo iti naipakuyog a kupon ken panangibusonmo iti dayta iti address a makita iti kupon wenno iti maitutop nga address iti panid 5 daytoy a magasin.

□ Ikkandak iti kopia ti broshur nga Ania ti Panggep ti Biag? Kasanoyo a Masarakan Dayta?

□ Interesadoak iti libre a panagadal iti Biblia.