Manipud Kadagiti Agbasbasa

Terorismo Sangapulo ket lima ti tawenko, ket agyamanak gapu kadagiti serye a “Karkararag a Maipaay iti Kappia​—​Mapasardengda Aya ti Terorismo?” iti Oktubre 22, 2002 a ruar. Mariribukanak sipud pay idi Setiembre 11, 2001 a pannakaraut ti World Trade Center. Kasla nakaro a pannakabatibat dayta. Segseggaak ti aldaw inton datay amin ket salakniban ti Prinsipe iti Kappia a ni Jesus. Makaliwliwa no panunotentayo dayta.

A. M., Estados Unidos

Dagiti Zeppelin Talaga a nagustuak ti artikulo a “Dagiti Zeppelin​—Naisangsangayan a Higante iti Tangatang,” iti Oktubre 22, 2002 a ruar, gapu ta impalagipna dagidi aldaw ti kinaubingko. Nageskuelaak idi idiay makindaya a kosta ti England. Naminsan idi sangapulo ti tawenko, timman-awak iti tawa ket nakitak ti maysa kadagitoy a dadakkel a lugan iti tangatang a siiinayad a lumablabas. Gapu iti daytoy nakaay-ayat a buya, ti intero a klase ket nagtataray a rimmuar iti paraangan ti eskuelaan. Diak pulos malipatan dayta, nga isut’ impalagip ti artikuloyo.

R. W., England

Maysa a piloto ni tatangko iti maysa kadagiti kadakkelan pay laeng a blimp a naaramid. Namindua metten a nagluganak iti blimp isu a kanayon nga interesadoak iti pakasaritaan dagiti dirigible. Naragsakanak a nakabasa a siuumiso a dinepinaryo ti sasao a “blimp,” “zeppelin,” ken “dirigible,” agsipud ta masansan a di umiso ti pannakausar dagitoy a sasao.

R. P., Estados Unidos

Dagiti Penguin Iparit ni lakayko nga agadal iti Biblia dagiti annakmi isu a dida interesado iti dayta. Ngem gapu kadagiti makaisuro nga artikuloyo, kaskasdi a maisursurok ida iti naespirituan. Agpilpiliak kadagiti artikulo a saan nga espesipiko a mangdakamat iti Biblia wenno iti Dios ngem mabalin a makapainteres kadagiti annakko. Kas pagarigan, impa-xerox-ko ti artikulo nga “Adtoyen Dagiti Agparada a Little Penguin.” (Oktubre 22, 2002) Inkabilko dayta iti bassit a folder nga inaramidko para kadakuada a minarkaak iti Dagiti Nakaskasdaaw iti Nakaparsuaan. Ikarkararagko a sapay koma ta gunggonaan ni Jehova dagiti panagreggetko a mangguyugoy kadagiti ay-ayatek.

J. G., Francia

Dagiti Cell Phone Dakkel ti naitulong kaniak ti artikulo nga “Agimtuod Dagiti Agtutubo . . . Kasapulak Aya ti Cell Phone?” (Oktubre 22, 2002) Sakbay a binasak dayta, diak idi makaturog no diak masungbatan dagiti nag-text kaniak. Ngem ita, tinulongandak a makaamiris kadagiti pagimbagan ken pagdaksan daytoy nga alikamen.

C. A., Pilipinas

Kaaduan kadagiti kaeskuelaak ket addaan iti cell phone, isu a pampanunotek idi a rumbeng a maaddaanak met iti kasta. Ita ta nabasakon ti artikulo, naan-anay a kuentaekto ti magasto ken panunotek a naimbag no talaga a nainsiriban ti panangusarkonto iti dayta. Patiek nga impaay ni Jehova daytoy nga artikulo para kaniak.

M. F., Japan

Us-usarek ti cellphoneko nga ag-E-mail iti maysa a lalaki. Pagsarsaritaanmi idi dagiti personal a problemami, ket naragsakak ta naaddaanak iti pangyesngawak kadagiti parikutko. Kalpasan ti sumagmamano a tiempo, insardengnan ti nag-E-mail kaniak, isu a masuronak. Ngem tinulongannak ti artikulo a makaamiris a ti panag-E-mail ket mabalin a maysa a kita ti panag-date. Ket pagarupek a naamirisna met dayta. Ita, it-itedko laengen ti E-mail address-ko kadagiti rumbeng a makaammo iti dayta.

Y. M., Japan

Depression Dagiti Tin-edyer Agtawenak iti 17 ket talaga a magustuak dagiti magasinyo. Naminsan idi nayospitalak, nakakitaak iti nabunton a magasin nga Agriingkayo! iti pasilio. Naammuak a Jehova ti nagan ti Mannakabalin-amin a Dios. Dagiti artikulo maipapan iti “Tulong Kadagiti Malmalday a Tin-edyer” (Setiembre 8, 2001) ti kangrunaan a nagustuak. Nagsayaat ida a basaen ket natulongandak a mangrisut kadagiti parikutko, gapu ta agsagsagabaak iti depression iti daydi a tiempo. Pagyamanan kadagita a nagsayaat ken makaisuro a magasin. Agyamanak ta adda dagiti tattao a kas kadakayo.

G. Z., Russia