Maysa a Gobierno a Mangitandudo Kadagiti Nadiosan a Prinsipio

PANUNOTEM ti maysa a lubong a dagiti tattao iti amin a puli ken lenguahe ket iturayan ti maymaysa a gobierno. Panunotem ti maysa a gobierno nga agdindinamag gapu iti panangsalaknibna kadagiti katan-okan a prinsipio ken panangpukawna iti gubat, guranggura, krimen,  kinapanglaw, polusion, sakit, ken uray ti ipapatay!

‘Nakaskasdaaw ngem imposible,’ nalabit kunam. Saan, saan nga imposible. Kinapudnona, sigurado dayta. Inkari ni Jesus ti kasta a gobierno. Insurona dagiti pasurotna nga ikararagda dayta: “Agkararagkayo, ngarud, a kastoy: ‘Amami nga adda iti langlangit, masantipikar koma ti naganmo. Umay koma ti pagariam. Maaramid koma ti pagayatam, kas sadi langit, kasta met iti daga.’”​—Mateo 6:9, 10.

Nalabit kabesadom dayta a kararag, ta kabesado dayta ti minilion a tattao iti lubong wenno nangngegdan dayta. Ngem napanunotmo kadin a naimbag no ania ti kaipapanan dagita a sasao? Paliiwem a ti Pagarian ket nainaig iti pannakaaramid ti pagayatan ti Dios ditoy daga. Ania ngarud ti Pagarian ti Dios? Ken ania ti pagayatan ti Dios ditoy daga?

No Ania ti Pagarian ti Dios

Ti maysa a depinasion ti pagarian ket maysa a gobierno nga iturayan ti ari. Ti Pagarian ti Dios ti instrumento ni Jehova a Dios a mangibanag iti sapasap a kinasoberanona. Dayta ti naarian a gobierno nga iturayan ti Anakna a ni Jesu-Kristo. No maipapan iti pagayatan ti Dios ditoy daga, kastoy ti simple ken nakalawlawag a naibaga iti Salmo 37:10, 11: “Iti apagbiit laengen a kanito, ket daydiay nadangkes awanton; ket pudno unay nga imutektekamto ti lugarna, ket isu awanton. Ngem dagidiay naemma tagikuaendanto ti daga, ket pudno a maragsakandanto iti napalalo iti kinaruay ti talna.”

Isu a no mapukpukaw ti namnamam gapu kadagiti dumakdakes a prinsipio iti lubong, paregtaendaka. Ikari ti Biblia a din agbayag, addanto nagdakkel a panagbalbaliw dagiti kasasaad ken prinsipio ti lubong. Sigurado ti naikari a namnama nga asidegen nga iturayan ti Pagarian ti Dios ti daga tapno ipaannurotna dagiti prinsipio ti Dios.

Ad-adda nga agbalin a natalged ti riknatayo no sursuruentayo ti agtalek kadagiti kari ti Pagarian ti Dios. Amirisem dagiti prinsipio a nainaig iti turay ti Pagarian: ‘Umaykayo, imatanganyo ti ar-aramid ni Jehova, no kasano a nangipasdek iti makapaamanga a paspasamak iti daga. Pagsardengenna dagiti gubat agingga iti ungto ti daga.’ (Salmo 46:8, 9) Nagsayaat ketdin ti kari a talna ken kinatalged!

Iti padto maipapan iti Ari iti Pagarian ti Dios a ni Jesu-Kristo, kuna ti Salmo 72:12-14: “Ispalennanto daydiay napanglaw nga agpatpatulong, kasta met daydiay naparigatan ken siasinoman nga awanan katulongan. Isu maasianto iti daydiay nanumo ken iti daydiay napanglaw, ket dagiti kararua dagidiay napanglaw isalakannanto. Iti pannakairurumen ken iti kinaranggas subbotennanto ti kararuada, ket ti darada napategto kadagiti matana.”

Dagiti Prinsipio ti Biblia

Usigem ti dadduma pay a prinsipio nga itantandudo ti Biblia: “Naragsak dagidiay sipapanunot iti naespirituan a kasapulanda.” (Mateo 5:3) Ti sabali pay ket: “Agtalekka ken Jehova buyogen ti isuamin a pusom ket dika agkammatalek iti bukodmo a pannakaawat. Isu imutektekam iti amin a daldalanmo, ket isu palintegennanto dagiti danam.”​—Proverbio 3:5, 6.

Isursuro met ti Biblia a manungsungbattayo amin kadagiti prinsipio nga inkeddengtayo a suroten. Usigem ti Eclesiastes 11:9: “Agrag-oka, agtutubo a lalaki, iti kinaagtutubom, ket ta pusom agaramid koma kenka iti naimbag kadagiti aldaw ti kinaagtutubom, ket magnaka iti daldalan ta pusom ken iti bambanag a nakita dagita matam. Ngem ammuem a maigapu amin kadagitoy iyegnakanto ti pudno a Dios iti pannakaukom.” Direkta nga imbaga ti Proverbio 2:21, 22 a sungsungbatantayo dagiti aramidtayo: “Dagiti napalungdo isuda ti agtaengto iti daga, ket dagiti awan pakababalawanna isuda ti mateddanto iti dayta. No maipapan kadagiti nadangkes, magessatdanto iti mismo a daga; ket no maipapan kadagiti nagulib, maalat-atdanto iti dayta.”

Babaen iti daytoy makaparegta a namnama a nalinteg a gobierno, nagsayaat ketdin no sisisinged a makigayyemtayo iti Dios! Ti pannakitimpuyog kadagiti agtarigagay met nga agbalin nga iturayan ti Pagarian ti Dios ket makatulong kadatayo nga agbiag iti pamay-an a mabalin a maibilangtayo kadagiti iturayan ti nadayag a Pagarian ken mangsagrap iti bunga dagiti natan-ok a prinsipio nga itandudona.

[Ladawan iti panid 10]

‘Dagiti naemma tagikuaendanto ti daga, ket pudno a maragsakandanto iti napalalo iti kinaruay ti talna.’​—SALMO 37:11.