Maitutop Aya ti Hipnotismo Kadagiti Kristiano?
Ti Panangmatmat ti Biblia
Maitutop Aya ti Hipnotismo Kadagiti Kristiano?
“Awan koma ti masarakan kenka nga asinoman . . . a mangkayaw iti sabsabali.”—DEUTERONOMIO 18:10, 11.
TI HIPNOTISMO ket nagbalinen a tema ti kaaduan a debate ken kontrobersia. * Uray dagiti eksperto iti dayta ket marigatan a mangilawlawag no ania dayta. Kaaduanna, ti hipnotismo ket maysa a nabalbaliwan a kasasaad ti panunot, wenno pannakaimayeng. Nupay kasta, ad-adda nga interesado ti kaaduan a tattao iti maaramidan ti hipnotismo ngem no ania dayta.
Kadagiti kallabes a tawen, dagiti mangngagas iti dadduma a pagilian ket gagangay nga isingasingda ti hipnotismo kas pangagas. Kas pagarigan, kinuna ti magasin a Psychology Today: “Ti hipnotismo ket makaagas iti sakit ti ulo, mangbang-ar iti ut-ot ti panaganak, tumulong tapno maisardengmo ti agsigarilio, kasukát ti anesthesia, ken mangpasayaat iti ugali iti panagadal. Awan a pulos ti pagdaksanna.” Iti kasumbangirna, sigun iti adu a tattao, ti hipnotismo ket nainaig iti espiritismo ken okulto.
Ania ti panangmatmat ti Biblia? Siempre, ti Biblia ket saan a libro iti salun-at, ken saanna a direkta a komentuan ti hipnotismo. Ngem makatulong kadatayo dagiti prinsipio iti Sao ti Dios tapno maammuantayo ti panangmatmat ti Dios.
Hipnotismo ken Okultismo—Agkanaigda Kadi?
Parparbo laeng aya ti maysa a tao ti panamati a ti hipnotismo ket nainaig iti okulto? Dayta a kapanunotan
ket mabalin a pinatanor dagiti sarsarita a pantasia kadagiti sine ken nobela, ngem adda agpayso a nakaibasaran ti pannakainaig ti hipnotismo iti espiritismo. Maipapan iti hipnotismo, kastoy ti ilawlawag ti Encyclopedia of Occultism and Parapsychology: “Nainaig unay iti okultismo ti pakasaritaan ti hipnotismo.” Dagiti narelihiosuan a pannakaimayeng, a nagbalin a paset ti panagsalamangka ken mahiko iti intero a historia, ket gagangay a maibilang a maysa a kita ti hipnosis. Kasta met a dagiti papadi iti kadaanan nga Egipto ken Grecia, pinaturogda dagiti masakit iti kasla nahipnotismo a kasasaad no padasenda idi nga agasan dagiti sakit babaen ti iyaawagda iti nagan dagiti didiosenda.Kuna ti ensiklopedia a nadakamat iti ngato: “Uray ita, kaaduan kadagiti pananghipnotismo ket maibilang nga ‘Espiritualismo.’” Nupay narigat nga ikeddeng no ania a kita ti hipnotismo ti mabalin a nainaig iti okulto, ti kinapudno ket nalawag a kondenaren ti Dios ti amin a kita ti espiritismo. (Deuteronomio 18:9-12; Apocalipsis 21:8) Dayta ti gapuna a saan a mabalin nga iyaleng-aleng dagiti Kristiano ti nalawag a di nainkasuratan nga aspeto ti hipnotismo.
Epektona iti Kababalin
Ania ngay ti epekto ti hipnosis iti panunot ken kababalin ti maysa a tao? Adda aya aniaman a nairaman a risgo? Ti maysa a nainkalintegan a pakaseknan ket kabayatan ti tiempo a nahipnotismo ti maysa a tao, mabalin a dina makontrol ti kababalinna. Us-usaren dagiti hipnotista daytoy a kasasaad kas paset ti maysa a pabuya, isu a duroganda dagiti boluntario nga agaramid iti dida gagangay nga ar-aramiden, uray payen no agparang a kasla nabartekda.
Kastoy ti kunaen ti The Encyclopedia Americana maipapan iti hipnosis a maipabuya iti publiko: “Ti tao a nahipnotismo ket mabalin a nalaka nga agtulnog iti aniaman nga ibaga ti hipnotista, mabalin a nalaklaka a tumulok kadagiti gagangay a narigrigat a maipaaramid kenkuana a kas iti pannakidenna, ket bayat a nahipnotismo, mabalin a mariknana a dina pulos a makontrol ti kababalinna.” Kuna ti Collier’s Encyclopedia: “Naipamaysa ti panunot ti nahipnotismo, isu nga ad-adda a pagtulnoganna dagiti singasing ti hipnotista ken tumulok iti aniaman a maipaaramid kenkuana.”
Awan aya ti pagdaksan dayta? Nainsiriban kadi para iti pudno a Kristiano a palubosanna ti dadduma a tattao a mangimpluensia iti panunotna babaen ti hipnotismo? Maikontra daytoy iti indagadag ni apostol Pablo: “Iparangyo ti bagbagiyo a maysa a sakripisio a sibibiag, nasantuan, makaay-ayo iti Dios, maysa a sagrado a panagserbi buyogen ti pannakabalinyo nga agrason. Ket dikay agpaisukogen iti daytoy a sistema ti bambanag, no di ket agbalbaliwkayo babaen ti panangpabaroyo iti panunotyo, tapno mapaneknekanyo iti bagbagiyo ti naimbag ken makaay-ayo ken naan-anay a pagayatan ti Dios.”—Roma 12:1, 2.
Kabaelan aya ti maysa a Kristiano a ‘salimetmetan ti naimbag a konsiensia,’ no ipalubosna a maipasidong ti bagina iti kasasaad a dina makontrol ti pampanunot, wenno dagiti tarigagay, wenno uray ti tigtignayna? (1 Pedro 3:16) Idagadag ti Biblia: “Tunggal maysa kadakayo ammona koma no kasano nga ikutan ti bukodna a basehas iti pannakasantipikar ken dayaw.” (1 Tesalonica 4:4) Nalawag a ti hipnotismo ket mangdadael iti abilidad ti maysa a tao a mangannurot iti dayta a pammagbaga.
Namnama a Maaddaan iti Perpekto a Kinasalun-at
Gapu kadagiti nadakamat a prinsipio iti Biblia, liklikan dagiti Saksi ni Jehova dagiti pamay-an a pakausaran ti hipnotismo wenno panangagas a mangusar iti hipnosis. Ipangpangagda ti bilin iti Deuteronomio 18:10, 11 nga: “Awan koma ti masarakan kenka nga asinoman . . . a mangkayaw iti sabsabali.” Kadagiti agsakit, adda dadduma pay a panangagas a saan a mangusar kadagiti peggad ti okultismo wenno mangipalubos a ti panunotmo ket kontrolen ti sabsabali.
No liklikan dagiti Kristiano dagiti aramid a maikontra kadagiti prinsipio ti Biblia, mabalin a maaddaanda iti namnama nga agbiag nga agnanayon iti nalinteg a baro a lubong ti Dios. Iti kasta, tagiragsakento ti sangatauan ti perpekto a kinasalun-at a din kasapulan a mausar ti hipnotismo.—Apocalipsis 21:3, 4.
[Footnote]
^ Nadepinar ti hipnosis a “kasla panangpaturog ti maysa a tao iti sabali a tao. Mabalin a malipatan wenno di malagip ti nahipnotismo dagiti adda iti panunotna, maimayeng, ken nalaka a tumulok iti ibaga ti hipnotista.”—The American Heritage Dictionary.