Pinadasko ti Nagserbi iti Dua nga Appo

KAS INSALAYSAY NI KEN PAYNE

Naipasngayak idi 1938 ken dimmakkelak iti rantso ni lolok idiay New Mexico, E.U.A. Buklen dayta ti 9,700 nga ektaria a tay-ak ken waig iti beddeng ti kabambantayan. Dagiti uni a malagipko ket ti uni dagiti karnero, baka, ken kabalio agraman ti kalangiking ti sapatos dagiti koboy. No dadduma, dengdenggek ti palayupoy ti angin iti karuotan ken mailasinko ti napigsa ken natinggaw nga emmak ti ugsa a maawagan iti killdeer iti aglawlaw ti dakkel a tangke a paginuman dagiti animal.

DAGITI impluensia iti biag ti maysa nga ubing ket mabalin a nabileg ken manayon. Adu nga oras idi a makikadkaduaak ken ni lolok a nalaing nga agestoria maipapan iti sariugma dagiti taga Laud. Am-ammona pay ti kakadua idi ni Billy the Kid, ti maysa nga agtutubo a pugante a limmatak gapu iti nagadu a pinatayna, a nagpatingga iti ipapatayna idi agtawen iti 21 idi 1881.

Saksi ni Jehova ti dadakkelko, ket inkuykuyogdak iti Nakristianuan a ministerioda kadagiti awan unay matataona a rantso ken nanumo a balbalay a naaramid iti adobe iti katurturodan ken tay-ak iti tanap ti Hondo. Masansan a nagusarda iti ponograpo agraman dagiti nairekord a timek ni J. F. Rutherford, a diak pulos malipatan. * Pinatokarmi dagiti palawagna iti amin a kita ti tattao​—dagiti ransero, Mexicano a mannalon, ken Katutubo nga Americano, a kas kadagiti Apache ken Pueblo. Kaay-ayok ti mangasaba iti lansangan tapno agipaima kadagiti magasin. Manmano ngamin idi ti agkitakit iti ipaima ti bassit nga ubing, uray kadagiti tawen a manarimaan ti gubat.

Wen, naisaadak iti nasayaat a pundasion. Nupay kasta, diak naipangag ti pakdaar ni Jesus: “Awan ti makabalin nga agpaadipen iti dua nga appo; ta mabalin a guraenna ti maysa ket ayatenna ti sabali, wenno agtalinaed iti maysa ket umsienna ti sabali. Saanyo a mabalin ti agpaadipen iti Dios ken iti Kinabaknang.” (Mateo 6:24) Nagmayat koma no maibagak a naaddaanak iti nagsayaat a biag iti amin-tiempo a serbisio. Ngem nanipud idi tallo ti tawenko, adda maysa nga impluensia, wenno sabali nga “apo” a nangisiasi kaniak iti dayta a karera. Ania ti napasamak?

Nagbalin a Pagesmak ti Agbalin a Piloto

Idi 1941, adda Piper Cub nga eroplano a nagdisso iti abay ti kamarinmi. Maus-usar idi dayta a paganup kadagiti coyote a kabagian ti sora nga agkaan kadagiti karneromi. Sipud idi agtawenakon iti tallo, inkeddengko a kayatko ti agbalin a piloto. Napalabas dagiti tawen ti pannakatubayko, ket idi  agtawenak iti 17, pimmanawak idiay balay tapno agtrabahoak iti maysa nga eropuerto idiay Hobbs, New Mexico. Nagbalinak a para walis ti adu a garahe ken bodega dagiti eroplano ken nagtrabahoak kadagiti eroplano a kasukát ti panangisuroda kaniak nga agpatayab iti eroplano. Diak impangpangruna ti Nakristianuan a ministerio iti biagko.

Nangasawaak idi agtawenak iti 18, ket idi agangay, naaddaankami ken ni baketko iti tallo nga annak. Kasanok ngay nga insakad ti panagbiagmi? Babaen ti panagbalinko a piloto dagiti eroplano nga agisprey iti insektisidio iti taltalon, dagiti naarkila nga eroplano, ken dagiti maus-usar a paganup iti an-animal nga agkaan iti padada nga animal agraman ti panangisurok kadagiti agad-adal iti kinapiloto. Kalpasan ti innem a tawen, nagbalinakon a piloto ti Texas International Airlines, iti ruar ti Dallas, Texas. Daytoy ti nangted kaniak iti nataltalged a panagbiag, ken nakapagserbiak pay a panglakayen idiay Kongregasion ti Denton. Nakaidauloak met iti sumagmamano a panagadal iti Biblia, a pakairamanan ti maysa a kapitan ti eroplano, ni baketna, ken ti pamiliada, nga amin dagitoy ket immawat iti kinapudno.

Idi 1973, agarup tallon a tawen a nagbalinak a piloto dagiti propjet, wenno eroplano a ti makina dagiti paligpaligna ket paandaren ti gasolina, ngem bimmaaw ti interesko idi saanen a nausar ti maysa a DC-3. Kinapudnona, mailiwak pay laeng idiay New Mexico. Ngem no isardengko ti agbalin a piloto, ania ngay ti pamastrekak?

Nagbalin a Pagesmak ti Arte

Sipud idi 1961, nagbalin a pagesmak ti agpinta kadagiti lamina ti American West, ket naballigiak iti panaglakok kadagitoy. Dayta ti gapuna nga immikkatak iti kinapilotok ken nagsubliak idiay New Mexico​—ti maawawagan a makaay-ayo a lugar. Nupay kasta, saanak a nagbalin a natimbeng. Intulokko a maipangpangruna ti essemko iti arte. Ti panagpinta ken panagkitikit idi agangay, agraman ti pasaray panagbalinko a piloto ti nangibus iti amin a panawenko. Agtartrabahoak idi iti 12 agingga iti 18 nga oras iti kada aldaw. Gapu iti dayta, nabaybay-ak unay ti pamiliak ken ti Diosko. Ania ti simmaganad?

Narakrak ti panagasawak, a nagtungpal iti diborsio. Immakarak idiay amianan a Montana ket ti panaginum ti nangiliwliwagak iti problemak. Ti di Nakristianuan nga estilo ti panagbiag ti makagapu a naaramidko ti inaramid ti barayuboy nga anak iti ilustrasion ni Jesus. (Lucas 15:11-32) Ngem maysa nga aldaw, naamirisko nga awan man la ti uray maysa a pudno a gayyemko. No adda maamammok a tattao a marigrigatan, ibagak kadakuada: “Birokenyo dagiti Saksi ni Jehova. Talaga a matulongandakayo.” Ti isungbatda ket: “Apay ngarud a saanka a Saksi?” Masapul nga admitirek a saan a makapagbalin ti maysa a tao a Saksi ken agbiag a kas iti ar-aramidek idi.

Kamaudiananna idi 1978, nagsubliak idiay New Mexico iti maysa a kongregasion nga ayan dagiti Saksi a makaam-ammo kaniak. Damo idi a makapanak iti maysa a Kingdom Hall kalpasan ti sumagmamano a tawen, ken ti laeng mabalinko idi  nga aramiden ket agsangit. Anian ti kinaasi ni Jehova kaniak. Nakaim-imbag kaniak dagiti gagayyem iti kongregasion ket tinulongandak nga agsubli iti dalan ni Jehova.

Baro a Kadua ken Pangrugian

Idi 1980, inkallaysak ti maysa a napintas a Saksi a ni Karen, a naam-ammok iti adun a tawen. Addaan iti dua nga annak a lallaki a da Jason ken Jonathan iti immuna a panagasawana. Gapu iti nauneg a panagayatna ken ni Jehova, timmalged ti biagko, ket naaddaankami iti dua pay a nasingpet nga annak a da Ben ken Phillip. Ngem saan a kanayon a naragsak ti biag. Dimteng ti maysa a trahedia idi agangay.

Inadalko ti arte ken adu nga oras nga inadalko ti estruktura ti bagi ti tao ken animal​—nangruna dagiti kabalio​—agraman ti urnos, pannakatubay, ken langada. Kalpasanna, nagkitikitak iti damili, nangruna dagiti ladawan ti Old West​—dagiti kabalio, dagiti Indian a nakakabalio, koboy, ken uray ti maysa a doktor idi un-unana a nakakaretela. Nangrugi ti balligik. Isu nga inkeddengmi ti manglukat iti maysa a galeria. Pinanaganan dayta ni Karen iti Mountain Trails Gallery.

Idi 1987, gimmatangkami iti maysa a galeria idiay Sedona, Arizona, ket dayta ti impanaganmi. Bayat a ni Karen ti nangimanehar iti galeria, nagbatiak idiay balay tapno agtrabahoak iti studio ken aywanak dagiti ubbing. Nupay kasta, nagsakit dagiti ubbing, ken bassit ti mapaglakuan. Inkeddengmi nga agsinnukátkami tapno dagiti annakmi ket maaywanan ni Karen idiay balay. Intugotko ti damilik idiay tiendaan ket nangrugiak nga agkitikit a mismo sadiay iti imatang dagiti klientek. Gapu iti dayta, pimmigsa ti negosiomi!

Nangrugin nga agsaludsod dagiti tattao maipapan kadagiti suer a kitikitko. Bayat nga inlawlawagko ti trabahok kadakuada ken imbagak dagiti kadaanan nga us-usarek a pakaibasaran dagiti diseniok, insurok kadakuada ti pakasaritaan ti Old West agraman ti nagnagan, luglugar, ken paspasamak a naammuak gapu iti masansan a panagbasak. Naginteres unay dagiti tattao kadagiti modelo nga ar-aramidek, ket nagdeposito pay ketdin ti dadduma iti nakitada a matubtubay, sada binayadan ti intero a gatadna idi nakalupkopanen iti suer. Dayta ti gapuna a napataud ti sasao a panaglako iti estatua sakbay a nakalupkopan wenno “precast sale” iti Ingles. Nagbiit a rimmang-ay. Dimmakkel ti negosiok agingga a naaddaankami iti tallo a galeria ken dakkel a pagpandayan nga addaan iti 32 nga empleado. Ngem makabannog! Pinampanunotmi ken ni Karen no kasanokami a makalung-aw iti awan patinggana a rutinami. Inkararagmi dayta. Maysaak idin a panglakayen iti kongregasion ket ammok a rumbeng nga ad-adu koma ti ar-aramidek agpaay ken Jehova.

Panagserbi Manen iti Maysa nga Apo

Idi 1996, bimmisita iti kongregasionmi ti agdaldaliasat a manangaywan iti sirkitomi ket kiniddawna a makipangaldawkami kenkuana. Sakbay pay a nangrugikami a mangan, adda dimi impagpagarup a dinamagna​—kayatmi kadi ti umakar iti maysa a lugar a nailatang para kadagiti Navajo Indian tapno tumulong a mangbuangay iti baro a kongregasion idiay Chinle? Anian a karit! Namin-adun a sinarungkaranmi dayta a lugar ket timmulongkami a nangasaba iti dadduma a paset dayta a nasulinek a teritoria, ket dayta ti nangted kadakami iti baro a kalat. Adtoyen ti gundawaymi a makaruk-at iti awan patinggana a rutina ti materialismo tapno maipamaysami ti ad-adu a panawenmi ken ni Jehova ken kadagiti tattaona. Agserserbikami manen iti maysa nga apo!

Ti sabali pay a panglakayen ken ti pamiliana​—ti pamilia Carusetta, a naimbag a gagayyemmi​—ti naawis a makikadua iti daytoy a plano nga agkasapulan iti tured. Agpadakami a nangilako kadagiti nanam-ay a pagtaenganmi ken gimmatangkami kadagiti mayakar-akar a balay wenno mobile home tapno makapagnaedkami iti lugar a nailatang para kadagiti Indian. Inlakok dagiti galeriak ken kamaudiananna ti pagpandayan. Pinagbalinmi a simple ti biagmi, tapno nawaywayakami a mangpalawa iti Nakristianuan a ministeriomi.

Idi Oktubre 1996, naangay ti damo a gimongmi iti baro a Kongregasion ti Chinle. Sipud idin, simmaknap ti panangasabami kadagiti umili a Navajo. Ti kongregasionmi ket addaan kadagiti nalalaing a payunir a Navajo a makasao iti lenguaheda. In-inut nga inadalmi daytoy narigat a lenguahe tapno awatendakami uray no saankami a Navajo. Gimmatangkami iti daga babaen iti permiso dagiti Indian nga autoridad, ket nangaramidkami iti Kingdom Hall idiay Chinle, a naidedikar idi Hunio daytoy a tawen.

Dimteng ti Trahedia!

Idi Disiembre 1996, intugot ni Karen ti annakmi idiay Ruidoso, New Mexico, tapno agpasiar biit. Kasapulan idi nga agbatiak idiay Chinle. Agasenyo ti pannakaklaat ken ladingitmi idi a ti 14 ti tawenna a baritomi a ni Ben ket naidungpar iti dakkel a bato bayat nga agis-ski nga isut’ nakatayanna!  Nakaro daydi a nakasuotanmi amin. Ti namnama ti panagungar nga isursuro ti Biblia ti nangpabileg kadakami iti daytoy a trahedia. Nagdakkel met ti naitulong ti panangandingay dagiti Kristiano a kakabsatmi. Idi inangaymi ti pumpon iti Kingdom Hall idiay Sedona, a nagnaedanmi idin iti sumagmamano a tawen, ad-adu pay a Navajo ti nakita dagiti kaarrubami ngem iti dati a nakitadan. Immay dagiti kakabsat manipud iti lugar a nailatang para kadagiti Indian tapno andingayendakami uray no nagdaliasatda iti nasurok a 300 a kilometro.

Maysa a bendision ti pannakakitami iti naespirituan nga irarang-ay ti ading ni Ben a ni Phillip. Isut’ addaan kadagiti naespirituan a kalat ken kasta unay ti panangparagsakna kadakami. Adda sumagmamano nga iyad-adalanna iti Biblia a pakairamanan idi ti maysa a maestro. Ngem il-iliwenmi amin a makita manen ni Ben idiay baro a lubong nga inkari ni Jehova.​—Job 14:14, 15; Juan 5:28, 29; Apocalipsis 21:1-4.

Naparaburankami iti naayat ken manangandingay a pamilia. Ti siumanko a ni Jonathan ken ni baketna a Kenna ket agserserbi ken Jehova, agraman ti buridekko iti immuna nga asawak a ni Chris, a kadua ti asawana a ni Lorie. Agpaspaseten iti Teokratiko nga Eskuelaan ti Panagministro ti appokomi a da Woodrow ken Jonah. Natay ni tatangko idi 1987, ngem aktibo pay laeng nga agserserbi ken ni Jehova ni nanangko nga agtawen itan iti 84 agraman ti adingko a ni John, ken ti asawana a ni Cherry.

Nasursurok manipud iti kapadasak a husto ti imbaga ni Jesus: “Awan ti makabalin nga agpaadipen iti dua nga appo . . . Saanyo a mabalin ti agpaadipen iti Dios ken iti Kinabaknang.” Uray ita, ti arte ket mabalin a managimon unay nga apo. Dayta ti gapuna a nasursurok ti kinapateg ti kinatimbeng ken panagannad, tapno ti essemko iti arte ket saan manen nga agbalin a kapatgan iti biagko. Nasaysayaat nga amang nga aramiden ti imbalakad ni apostol Pablo: “Dungdungnguek a kakabsat, agbalinkayo a natibker, di magaraw, a kankanayon nga aduankayo ti aramiden iti trabaho ti Apo, nga ammoyo a ti panagbannogyo saan nga ubbaw mainaig iti Apo.”​—1 Corinto 15:58.

[Footnote]

[Ladawan iti panid 18, 19]

Ti eroplanok idi 1996 idiay Chinle

[Ladawan iti panid 19]

Maysa a suer nga eskultura a naawagan iti “No Time to Dally”

[Ladawan iti panid 21]

Gimong para iti panagadal iti Biblia iti nakaibangonan ti Kingdom Hall-mi

[Ladawan iti panid 21]

Kaduak ni baketko a Karen

[Ladawan iti panid 21]

Panangasaba iti maysa a gagangay a balay dagiti Navajo