Apay a Nakasaksaknap ti Pornograpia?

RINIBU a tawenen a maus-usar dagiti erotiko a material a nairanta a mangabbukay iti seksual a rikna. Ngem narigat ti mangpataud iti pornograpia bayat ti kaaduan a tiempo ti kaaddana, isu a buybuyaen laeng idi dayta dagiti babaknang ken agtuturay. Nabalbaliwan nga interamente dayta gapu iti panagimprenta ken pannakaimbento ti panagretrato ken sine. Isu a ti pornograpia ket nalakan a mabuya dagiti ordinario a tattao.

Ad-adda a simmaknap daytoy gapu iti pannakapataud ti videocassette recorder. Saan a kas kadagiti sine ken daan a retrato, dagiti videocassette ket nalaka nga idulin, kopiaen, ken iwaras. Dagita ket mabalin met a buyaen a pribado iti pagtaengan. Iti nabiit pay, nalaklakan ti agbuya iti pornograpia gapu iti iyaadu ti cable a telebision ken ti Internet. Ti managbuya a maamak nga adda kaarrubana a makakita kenkuana iti benneg a paglakuan iti pornograpiko a material ket mabalinna itan ti “makagatang kadagitoy uray no adda idiay balayna, babaen laeng ti panangitalmegna iti buton iti bukodna a cable a telebision, wenno ti telebision a pakausaran ti satelite receiver,” kuna ti mangan-anag iti damdamag a ni Dennis McAlpine. Sigun ken McAlpine, ti nalaka a pannakabuya iti kastoy a kita ti programa ti “maysa kadagiti makagapu a ti pornograpia ket akseptarenen ti ad-adu pay a tattao.”

Kadawyanen ti Pornograpia iti Kagimongan

Nagduduma ti panangmatmat ti adu a tattao iti pornograpia gapu ta kadawyanen dayta. “Dakdakkelen ti impluensia dayta iti kulturatayo ngem iti amin nga opera, ballet, teatro, musika ken fine art no pagtitiponen,” kuna ti mannurat a ni Germaine  Greer. Mabalin a maiparangarang ti moderno a panangmatmat iti pornograpia babaen kadagiti uso a kawes ti adu a nalatak a tattao a kaasping iti kawes dagiti mabigbigbig a balangkantis a maibilang a naestilo ken moderno. Makita met dayta kadagiti music video a kumarkaro ti panangipabuyada kadagiti napanayag a seksual a ladawan, ken ti panangusar ti media iti adu a pornograpiko a ladawan kadagiti pakaammoda. Kastoy ti konklusion ni McAlpine: “Aw-awaten ti kagimongan ti aniaman nga ipabuya ti media kadakuada. . . . Gapuna, ipagarupda a maakseptar amin dagita.” Kas resulta, “kasla saanen a marurod dagiti tattao,” insennaay ti autor a ni Andrea Dworkin. “Kasla didan ikankano dayta.”

Ti Prinsipio a Nakaibasaran ti Pornograpia

Iti panangyebkasna iti kapanunotan nga umasping iti kapanunotan ni Dworkin, impatuldo ti imbestigador ti FBI a ni Roger Young a “saan laeng a makita [ti adu a tao] dagiti dakes nga epekto ti naalas a kababalin ken dagiti problema a pataudenna.” Maallukoy ti dadduma kadagidiay mangikalkalintegan iti pornograpia. Kunaenda nga awan ti ebidensia nga adda dakes nga epekto dagiti pornograpiko a ladawan kadagiti tattao. “Ti pornograpia ket arapaap laeng,” kuna ti autor a ni F. M. Christensen. “Dayta ket maysa a kinapudno wenno kapanunotan a narigat a maawatan dagiti kumonkontra.” Ngem no awan ti impluensia ti arapaap, ania ngarud ngay ti nakaibasaran ti industria ti panaganunsio? Apay a gumasto dagiti korporasion iti minilion a doliar a mangpataud kadagiti komersial, video, ken nayimprenta a pakaammo no awan ti napaut nga epekto dayta kadagiti tattao?

Ti agpayso ket kas iti amin a naballigi a panaganunsio, ti kangrunaan a panggep ti pornograpia ket mangpataud iti di pay rimsua a panaggartem. “Awan ti sabali a panggep ti pornograpia no di ti agganansia,” kuna dagiti managsukisok a da Steven Hill ken Nina Silver. “Ket iti daytoy di makontrol a  pagtagilakuan, aniaman a banag ket maibilang a tagilako a pagganansiaan iti dakkel, nangruna ti bagi dagiti babbai ken ti seksual a relasion ti tattao.” Ipadis ni Greer ti pornograpia iti makaadikto unay a di nasustansia, ken nalaka ti pannakaisaganana a taraon, a nanayonan kadagiti mangpaimas a ramen ken mangpananam a kemikal. Kunana a “dagiti nalaka a magun-odan a video wenno media maipapan iti pannakidenna ket peke a sekso . . . Ti panangyanunsio kadagiti produkto a taraon itandudona ti pannakailako dagiti di nasustansia a taraon ket ti panangyanunsio iti sekso itandudona ti pannakailako ti arapaap a pannakidenna.”

Kuna ti dadduma a doktor a ti pornograpia mabalin a mangpataud iti pannakaadikto a narigrigat nga amang a parmeken ngem ti pannakaadikto iti droga. Gagangay a maagasan ti adikto iti droga babaen iti panangikkat iti sabidong iti bagina iti naikeddeng a tiempo. Ngem ti adikto iti pornograpia, kuna ni Dr. Mary Anne Layden iti University of Pennsylvania, ket “mangpataud iti ladawan a permanente a maitukit iti panunot ti nagbuya ket nagbalinen a paset ti kemistria ti utekna.” Isu a nabatad a malagip dagiti tattao ti pornograpiko a nabuyada iti napalabas nga adun a tawen. Kunana: “Daytoy ti damo a makaadikto a banag nga awan a pulos ti namnama a maikkat ti sabidongna.” Ngem kayat kadi a sawen dayta nga imposible a maiwaksi ti impluensia ti pornograpia? Ken ania nga espesipiko a pannakadangran ti patauden ti pornograpia?

[Kahon iti panid 5]

Dagiti Agpayso a Kasasaad iti Pornograpia iti Internet

◼ Agarup 75 a porsiento iti pornograpia iti Internet ti agtaud iti Estados Unidos. Dandani 15 a porsiento ti agtaud iti Europa.

◼ Napattapatta nga agarup 70 a milion a tattao ti agbuya kada lawas kadagiti pornograpiko a Web site. Agarup 20 a milion kadagitoy nga agus-usar (iti Internet) ti taga Canada ken Estados Unidos.

◼ Impalgak ti nabiit pay a makabulan a panagadal a ti Alemania ti ayan ti kaaduan nga agbuybuya iti pornograpia ti Internet idiay Europa, a sarunuen ti Britania, Francia, Italia, ken Espania.

◼ Idiay Alemania, makabusbos dagiti agbuya iti pornograpia kadagiti pornograpiko a site ti Internet iti promedio a 70 a minuto iti kada bulan.

◼ Kadagiti taga Europa nga agbuya iti pornograpia iti Internet, ad-adu nga oras ti mabusbos dagidiay nasurok a 50 ti tawenda a nakakonekta kadagiti Web site a para kadagiti nataengan.

◼ Sigun iti maysa a magasin, 70 a porsiento kadagiti agbuya ti pornograpia iti Internet ket agbuya bayat iti aldaw.

◼ Pattapattaen ti dadduma a 100,000 nga Internet site ti pakairamanan ti pornograpia maipapan kadagiti ubbing.

◼ Agarup 80 a porsiento kadagiti maipabpabuya a pornograpia maipapan iti ubbing iti Internet ti nagtaud idiay Japan.

[Dagiti Ladawan iti panid 4]

Nalaklakan a mabuya ti pornograpia