Manipud Kadagiti Agbasbasa

Panagsukisok Kadagiti Stem Cell Manmano a komentuak dagiti artikuloyo; naruamakon iti kanayon a nagsayaat a kalidad ti Agriingkayo! Nupay kasta, mapilitanak nga agsurat tapno ibagak a ti serye a “Dagiti Stem Cell​—Aglablabes Kadin ti Siensia?” (Nobiembre 22, 2002) ti kasayaatan a pagarigan ti nagsayaat a panagsurat kadagiti suheto a narigat a maawatan. Nagadun ti impablaak ti media maipapan iti panagsukisok kadagiti stem cell ngem narigat a maawatan dagitoy. Ti bambanag ket inlawlawag a naimbag dagiti artikuloyo bayat a siuumiso nga impangpangrunada dagiti isyu a nainaig iti moralidad, etika, ken kagimongan.

K. M., Estados Unidos

Panangpilit Dagiti Kapatadan Pagyamanan unay iti artikulo nga “Agimtuod Dagiti Agtutubo . . . Panangpilit Dagiti Kapatadan​—Talaga Aya a Nakabilbileg ti Impluensiana?” (Nobiembre 22, 2002) Diak pulos impagarup a maimpluensiaandak dagiti kapatadak. Ngem iti pagnanaedak, adu ti agkakasar uray no ubingda pay unay. Kanayon idi a kayatko ti agtalinaed pay laeng a balasang tapno rumang-ay ti espiritualidadko. Ngem kanayon nga umay dagiti tattao sada damagen, “Kaanoka nga agkasar?” (Agtawenak laeng iti 16.) Pampanunotek payen a nalabit di umiso no agtalinaedak a balasang! Daytoy nga artikulo ti nakatulong kaniak tapno maawatak no kasano ti kinabileg ti impluensia dagiti kapatadak.

E. A., Estados Unidos

Panangsaranay Kadagiti Nalayus Pagyamanan unay iti artikulo a “Pannakaiparangarang ti Ayat​—Panangsaranay a Naunday ken Narigat.” (Nobiembre 22, 2002) Naklaatak a nakaammo a nakaro ti dinadael ti layus idiay Houston, Texas. Diak ammo a nakalkaldaang gayam ti kasasaad a sinaranget dagiti Kristiano a kakabsatko sadiay. Ti nagsayaat ti pannakaorganisarna a panangsaranay ti nangted kaniak iti pangripiripan iti pannakaisubli ti kinapintas ti daga kalpasan ti Armagedon.

M. I., Japan

Genetic Code Kayatko a kuestionaran ti pannakausar ti termino a “genetic code” iti publikasionyo. Kas pagarigan, iti artikulo a “Kasano a Timmaud ti Biag ken ti Uniberso?” (Hunio 8, 2002), nadakamatyo “ti nabiit pay a pannakasukimat ti genetic code ti tao, wenno dagiti agsasaganad nga impormasion a naikabil kadagiti gene-tayo.” Kas maysa a biologo, kayatko nga ipaganetget a saan nga umiso ti panagusar iti kasta a termino.

A. R., Russia

Kastoy ti sungbat ti “Agriingkayo!”: Kinapudnona, husto ti agbasbasa. Saan nga us-usaren dagiti sientista ti termino a “genetic code” a pangdeskribir kadagiti gene a mismo. Imbes ketdi, tuktukoyen ti code ti mekanismo wenno ragup a pagannurotan a mangipalubos a “mabasa” wenno maipatarus dagiti selula ti nagadu a gene ken mangpataud kadagiti protina. Nupay kasta, ti “Agriingkayo!” ket agpaay iti kaaduan a tattao​—saan a kadagiti sientista. Nalatak a maus-usar ti termino a “genetic code” iti nalawlawa ken saan a teknikal a pakausaran.

Mangdalus iti Narugit a Danum Kas mangidadaulo a makinista ti planta a mangdalus iti narugit a danum, naragsakanak unay a nangbasa iti artikulo a “Papanan ti Danum?” (Oktubre 8, 2002) Gapu iti pannakadalus ti narugit a danum, masaluadan ti minilion a tattao manipud iti pannakaimpeksionda kadagiti mikrobio wenno bakteria a mangpataud iti sakit. Iti intero a lubong, saan idi a makontrol ti tipus, kolera, ken dadduma a sakit a maala iti narugit a danum. Makapainteres ta maysa a natural a proseso ti moderno a panangdalus iti narugit a danum, a masansan a mangus-usar iti bassit wenno awan a pulos a kemikal a substansia. Iti planta a pagtartrabahuak, maus-usar ti lawag nga ultraviolet tapno madis-impekta ti narugit a danum. Pagyamanan iti panangisuroyo iti makaispal biag a proseso ti panangdalus iti narugit a danum.

E. P., Estados Unidos

Amber Talaga nga apresiarek ti artikulo a “Nakemmeg iti Bimmalitok a Tedted.” (Setiembre 22, 2002) Masapul nga admitirek a diak pulos a pagan-ano idi ti amber. Ngem nanipud idi nabasak daytoy nga artikulo, kada lumabasak iti sango ti maysa a paggatangan kadagiti alahas, diak magawidan ti tarigagayko a mangkita a naimbag iti daytoy a pagsidsiddaawan​—maysa a banag nga impagarupko idi nga ordinario ken di makaay-ayo.

F. L., Francia