Pornograpia​—Dagiti Agsusupadi a Panangmatmat

“Mamataud dayta kadagiti napigsa a tarigagay a di rumbeng a patanoren ti maysa a tao, gargarienna ti tarigagay a di pulos mapnek.”​—Tony Parsons, kolumnista.

SAAN a pulos a pinanggep ni John ti maadikto iti panagbuya iti ‘seksual nga ar-aramid iti Internet.’ * Kas iti adu a naiparna a nakakita iti pornograpia ken seksual a saritaan iti Internet, maysa nga aldaw, naiparna a nalukatanna ti maysa a site a mangaw-awis kenkuana a makipaset iti kasta a saritaan. Di nagbayag, naigamer unayen iti seksual nga ar-aramid iti Internet. Malagipna: “Urayek a makapanaw ni baketko a mapan agtrabaho. Bumangonak a dagus iti kama ket adu nga oras ti busbosek iti sango ti computer.” Bayat ti napaut a saritaan, di man la sumardeng tapno mangan wenno uminum. “Saanak idi a mabisin,” kunana. Nangrugin nga agulbod ken baketna maipapan kadagiti nalimed nga aramidna. Daytat’ nangrugin a nangapektar iti konsentrasionna nga agtrabaho, ket nagbalinen a managbutbuteng ken managatap. Dakes ti epekto dayta iti panagasawana, ket idi inkeddengnan ti makipagkita iti maysa kadagiti seksual a kaparehana iti Internet, naammuan ni baketna dayta. Itatta, maag-agasan ni John gaput’ pannakaadiktona iti seksual nga ar-aramid iti Internet.

Dagitoy a kapadasan ket dakamaten dagiti aktibista a kontra iti pornograpia kas ebidensia dagiti makadadael nga epekto ti pornograpia. Kunada a dadaelenna dagiti relasion, tagibassitenna ti babbai, abusuenna ti ubbing, ken mangpataud iti ballikug ken makadangran a panangmatmat iti sekso. Iti kasumbangirna, ikalintegan dagiti mangitantandudo iti pornograpia a dayta ti nawaya a pangyebkasanda iti riknada. Matmatanda dagiti kontra iti pornograpia kas nalabes a maseknan iti kababalin ti kagimongan. “Rumbeng a saan nga ibain dagiti tattao ti seksual a panaginteresda kadagiti kasekso wenno dida kasekso,” insurat ti maysa a mangitantandudo. “Ti pornograpia ket mabalin nga usaren a mangirugi ken mangpaganas kadagiti prangka a saritaan maipapan iti sekso.” Kuna pay ti dadduma a ti iyaadu ti pornograpia ket pakabigbigan iti nawaya ken nasimbeng a kagimongan. “Ti nataengan a kagimongan a makadaer iti nalawag a pannakaipabuya ti sekso kadagiti umannugot nga adulto ket maysa a kagimongan a nalaka a makibagay iti seksual a panagduduma a kas iti homoseksualidad, lesbianismo, ken panagpapada ti babbai,” kuna ti mannurat a ni Brian McNair.

Gapu aya ta nagduduma ti panangmatmat ti kagimongan maipapan iti pornograpia ket maakseptaren dayta? Apay a nakasaksaknap dayta? Talaga kadi a napeggad ti pornograpia? Lawlawagan dagiti sumaganad nga artikulo dagitoy a saludsod.

[Footnote]