Awanton Dagiti Didigra a Gapu iti Paniempo!

“AWANEN ti panagraem ti moderno a tao iti daga gapu iti kinaagumna a mangsagrap iti kinanam-ay, kinabaknang ken ganansia.” Kasta ti mabasa iti akkub ti libro a 5000 Days to Save the Planet. Ib-ibturantayo dagiti resulta ti kinaagum ti tao. Agpayso man wenno saan dagiti teoria maipapan iti ibabara ti globo, maysa a banag ti sigurado​—daddadaelen ti tao ti napintas a planetatayo. Ti laeng namnamatayo isu ti kaitungpalan ti kari ti Biblia a ti Dios ‘dadaelennanto dagidiay mangdaddadael iti daga.’​—Apocalipsis 11:18.

Sukatanto ti Dios ti dakes a sistema ti panangituray ti tao iti naan-anay a baro a sistema. Sakbay nga iwaksim dayta a kapanunotan ken ibilangmo dayta a narelihiosuan a kinamaag, amirisem daytoy: Asino ti nangnangruna a makaammo iti kasapulan ti aglawlaw ti daga no di ti Namarsua iti dayta? Saan aya nga adda kalinteganna a mangikeddeng no ania ti mapasamak iti daytoy a planeta? Sibabatad nga ibaga ti Biblia idiay Isaias 45:18 a ni Jehova “ti pudno a Dios, ti Nangporma iti daga ken ti Nangaramid iti dayta, Isu Daydiay sititibker a nangipasdek iti dayta, a saanna a pinarsua a maipaay laeng iti awan kapapay-anna, a nangbukel iti dayta tapno mapagnaedan.” Tapno matungpal dayta a panggep, kabaelan ti Dios ti bumallaet ken talaga a bumallaetto.

Aramiden ti Dios daytoy babaen ti panangyegna iti baro a gobierno, wenno pagarian, a mangituray iti daga. No ikararag dagiti Kristiano ti makuna a Kararag ti Apo ket kunada, “Umay koma ti pagariam,” kidkidawenda a mangituray daytoy a gobierno. (Mateo 6:9, 10) Agtignayto ti Pagarian wenno gobierno ti Dios buyogen ti pannakaawat kadagiti narikut a natural a siklo ti daga. Kabaelannanto ngarud nga isubli dagiti lugar ditoy daga a dinadael ti polusion ken ti di umiso a pannakausar ti aglawlaw. Kuna ti Isaias 35:1, 6: “Ti desierto a tanap . . . agsabong a kas iti safron. . . . Ta iti let-ang pimsuakton ti dandanum, ken ti naapres nga ayus iti desierto a tanap.”

Agingga a Bumallaet ti Dios

Kalpasan dagiti layus idi 2002, nagsurat ni Helmut Schmidt a dati a pangulo ti Makinlaud nga Alemania: “Awan ti makalapped kadagiti natural nga elemento a mangdadael kadagiti puttot. Kanayon a mapasamak dagiti didigra.” Agpayso dayta. Ket no dumteng ti makadadael a paniempo, uray no aramidenna ti amin a kabaelanna, bassit laeng ti maaramidan ti tao tapno madaeranda dayta. Ngem nupay adu dagiti pakarigatan a patauden dagita a makadidigra a  pasamak, mabalin a makagunggona dagitoy. Mabalin a tignayenda ti tattao a mangipakita iti ayat ken pannakaseknan kadagiti padada a tattao. (Marcos 12:31) Dagiti layus idiay Europa, kas pagarigan, kasla addaan iti kastoy nga epekto iti sumagmamano. Kastoy ti insurat ti maysa a periodiko: “Dagiti magagaran a boluntario ket naggapu iti intero nga Alemania tapno tumulong [a mangsaranay]. Dayta ti kaaduan a bilang dagiti nagboluntario sipud idi Gubat Sangalubongan II.”

Mairaman kadagitoy a boluntario ti adu a Saksi ni Jehova. Salaysayen ti sumaganad nga artikulo ti panangsaranay dagiti Saksi iti uppat a nadumaduma a pagilian a dinalapus dagiti napigsa a bagyo. Ti kababalin dagitoy a Kristiano ket maysa a pangripiripan iti biag iti sidong ti panagturay ti umay a gobierno ti Dios, a sadiay nga agari ti ayat ken nainkabsatan a pannakaseknan​—saan a ti kinabuklis ken kinaagum.​—Isaias 11:9. *

Mabalin a maliwliwa dagiti Kristiano iti kari ti Dios kadagiti nagkauna nga Israelita: “Sigurado a mangtedakto met iti tudo maipaay iti dagayo iti naituding a tiempona, tudo iti otonio ken tudo iti primavera.” (Deuteronomio 11:14) Matungpal met dayta a kari kadagidiay addaan pribilehio nga agnaed iti baro a lubong ti Dios​—maysa a lubong nga awanan kadagiti didigra a gapu iti paniempo.

[Footnote]

[Kahon/Ladawan iti panid 9]

Naan-anay a Kontrolado ti Paniempo

Idiay baro a lubong ti Dios, saanton nga agamak ti tattao a dadaelen ti napigsa a bagyo dagiti pagtaengan wenno mulada. (2 Pedro 3:13) Sibabatad nga ibaga ti Biblia a ti Dios ken ti Anakna a ni Jesu-Kristo ket naan-anay a kabaelanda a kontrolen ti paniempo. Amirisem dagiti sumaganad a teksto.

◼ Genesis 7:4: “Iti pito laengen nga aldaw pagtuduek iti rabaw ti daga iti uppat a pulo nga aldaw ken uppat a pulo a rabii.”

◼ Exodo 14:21: “Rinugian ni Jehova a pasublien ti baybay babaen ti napigsa a wayaway nga angin iti intero nga agpatnag ken pagbalinen ti labneng ti baybay a namaga a daga, ket mabisbisngay idi ti dandanum.”

◼ 1 Samuel 12:18: “Ni Samuel immawag ken Jehova, ket nangipaay ni Jehova kadagiti gurruod ken tudo iti dayta nga aldaw, iti kasta dagiti amin nga umili nagbutengda iti kasta unay ken Jehova ken ni Samuel.”

◼ Jonas 1:4: “Ni met laeng Jehova nangipalladaw iti dakkel nga angin iti baybay, ket naadda ti nakadawdawel a bagyo iti baybay; ket no maipapan iti barko, ngannganin marba.”

◼ Marcos 4:39: “Gapu iti dayta [ni Jesus, gapu ta inikkan ti Dios iti pannakabalin] bimmangon ket binabalawna ti angin ken kinunana iti baybay: ‘Agtalnaka! Agulimekka!’ Ket nagtalna ti angin, ket naglinak unay.”

[Dagiti Ladawan iti panid 8, 9]

Iti baro a lubong ti Dios, ditayton agbuteng kadagiti napeggad a kasasaad ti paniempo