Manipud Kadagiti Agbasbasa

Natalged Aya ti Ageroplano? Sangapulo ti tawenko ken agnanaedak ditoy California, E.U.A. Agyamanak iti Agriingkayo! gapu iti tema a “Natalged Pay Laeng Aya ti Ageroplano?” (Disiembre 8, 2002) Adda 47 a kaeskuelaak a taga San Diego a mapan agpasiar idiay Sacramento. Madanaganak di la ket ta addanto ti ma-kras wenno ma-hijack. Ngem gapu iti daytoy nga artikulo, saanakon a madanagan. Naturturedakon gapu kadagiti naammuak a baro a pamay-an ti kinatalged. Padasekto nga ipabasa daytoy nga edision ti Agriingkayo! kadagiti amin a kaklasek a mabuteng wenno madanagan nga ageroplano.

V. M., Estados Unidos

Makapapatay a Mision Natukayak iti kapadasan ni Toshiaki Niwa a naisalaysay iti artikulo a “Nagbalin a Natalna a Kalat ti Makapapatay Idi a Gandat.” (Disiembre 8, 2002) Naipasngayak idiay Pilipinas sumagmamano a tawen kalpasan ti Gubat Sangalubongan II. Adu kadagiti inyestoria ti pamiliak a napasamak iti dayta a gubat ket pakairamanan ti kinaulpit dagiti soldado. Idi ubingak, masansan a saludsodek, “Apay nga aramidenda dayta?” Ti kapadasan ni Kabsat Niwa ti nakatulong kaniak a manganag a naimbag iti sungbat ti saludsodko. Pagyamanan iti panangipablaakyo kadagiti artikulo a kas iti dayta. Dayta a panangabaruanan ket maysa manen a pammaneknek iti naisangsangayan a pannakabalin ni Jehova.

A. C., Estados Unidos

Dagiti Stem Cell Duapulo a tawenen nga agbasbasaak iti Agriingkayo! ket gapu kadagiti artikulona, naaddaanak iti pangkaaduan a pannakaammo maipapan iti adu a banag. Idi nangrugi a pagsasaritaan dagiti tattao ti cloning, ken dagiti stem cell, diak maawatan no kasano a mabalin a mapataud ti dadduma a tisyu iti ruar ti bagi ti tao. Gapu iti serye a “Dagiti Stem Cell​—Aglablabes Kadin ti Siensia?” (Nobiembre 22, 2002), maawatak itan no kasano a posible daytoy ken no apay a kontrobersial dayta.

F. M., Italia

Bayat a basbasaek dagitoy nga artikulo, nabutnganak kadagiti pamay-an nga us-usaren ti tattao a mangagas kadagiti grabe a sakit. Agyamanak unay kadagiti panagreggetyo a nagsirarak ken nangipablaak kadagitoy nga artikulo tapno maipakaammoyo kadakami ti kinapudno maipapan kadagitoy a banag. Ad-adda itan a segseggaak ti aldaw inton agasan ti Dios ti amin a sagubanittayo.

T. F., Pilipinas

Pannakaiparangarang ti Ayat Nagustuak unay ti artikulo a “Pannakaiparangarang ti Ayat​—Panangsaranay a Naunday ken Narigat”! (Nobiembre 22, 2002) Ti nagapuanan dagiti boluntario idiay Houston kadagidi a bulbulan ket nabileg a pammaneknek a ti pudno nga ayat ket iparparangarang ti ili ti Dios isu a siwawadwad a bembendisionan ti Namarsua kadatayo ti panagregget dagiti adipenna.

C. T., Alemania

Diak mapengdan ti agsangit idi binasak daytoy nga artikulo. Idi nalayus ti Elbe River, kapilitan a nagbakuit ti 44 kadakami nga agkakakongregasion. Adda pamilia a kakongregasionanmi a siaayat a nangpadagus kadakami ken ni lakayko, ket adda sabali pay a pamilia a nangpadagus iti dua a babbaromi. Sipud idi napasamak dayta a didigra, nasingsingedkamin nga amang nga agkakakongregasion. Kas sangapamiliaan, talaga nga apresiarenmi ti trabaho a panangsaranay no mapasamak dagiti didigra a kas iti napasamak idiay Houston.

S. R., Alemania

Uram Nagustuak a binasa ti artikulo a “Ti Dua a Rupa ti Apuy.” (Setiembre 22, 2002) Nupay kasta, diak anamongan ti kapsion ti retrato iti panid 25, a kunana: “Likliklikan dagiti napakigtotan nga ugsa, a maawagan iti elk, ti uram a kumaykayamkam iti intero a tanap ti Bitterroot River idiay Montana.” Addaanak iti napadakkel a kopia dayta met la a retrato, ket kasla saan a napakigtotan dagiti elk. Dagiti bombero iti kabakiran nga agparakayda kadagiti maur-uram a disso a narigat a danonen ket masansan a makitada dagiti ugsa ken elk iti igid dagiti sebsebsebenda a maur-uram a disso. Dildilpatan dagitoy nga animal dagiti mineral nga agayus wenno agtulatid iti kadapuan. Uray kadagiti dadakkel nga uram, ammoda no ania ti aramidenda. Kasla dida maapektaran iti dayta.

B. D., Estados Unidos

Kastoy ti sungbat ti “Agriingkayo!”: Apresiarenmi daytoy a kapaliiwan. Siempre, awan ti makaibaga no ania ti eksakto a marikna dagiti animal, no adda man, kadagita a kasasaad.