Maysa a Banag a Di Mayanud ti Aniaman a Bagyo

BABAEN KADAGITI MANNURAT TI AGRIINGKAYO! IDIAY ALEMANIA, AUSTRIA, MEXICO, KEN KOREA

BAYAT ti tawen 2002, rimsua dagiti makadidigra a paniempo iti adu a pagilian. Adda agsasaruno a makadidigra a layus a napasamak idiay Europa. Iti dadduma pay a paset ti lubong, dinalapus ti nagpigsa a bagyo ti Mexico, ken nabagyo met ti Korea. Nupay nakalkaldaang dagitoy a pasamak, napabileg ti panagiinnayat dagiti pudno a Kristiano.

Kalpasan dagiti layus idi 2002 idiay Europa, napagsaludsodan ti dati a pangulo iti Makinlaud nga Alemania a ni Helmut Schmidt no ania a kita ti tulong ti kasapulan dagiti biktima. Simmungbat: “Kasapulan dagiti tattao ti taraon ken pagtaengan, kasapulanda ti kuarta, ken naespirituan a pannakaaywan.” Dakkel ti paset dagiti Saksi ni Jehova tapno maipaay nga agpadpada dagiti pisikal ken naespirituan a tulong kadagiti biktima ti bagyo. Amirisem ti panangsaranayda idiay Alemania, Austria, Mexico, ken Korea.

Dagiti Situtulok a Timmulong Idiay Alemania

Idi naammuan dagiti Saksi ni Jehova idiay Alemania nga adda umadani a makadidigra a layus, adu kadagiti Saksi ni Jehova ti nakikadua iti kaaduan a tattao nga agsagana. Kuna ti 19 ti tawenna a ni Kathleen, nga agnanaed idiay Dresden: “Saan a mabalin nga agtugawak lattan nga awan ti aramidek. Idi naammuak nga agpegpeggad a mapukaw ti amin a sanikua ti dadduma a tattao, masapul a mapanak tumulong.”

Dagus nga inorganisar dagiti Aleman a Saksi ti napartak a panangipaay iti epektibo a panangtulong. Kas Kristiano, ammoda a naisangsangayan nga obligasionda ti tumulong kadagiti naespirituan a kakabsatda. Ngem impakitada met ti panagayatda iti padada a tattao. (Marcos 12:31) Nasurok ngarud a 2,000 a boluntario ti nagrupogrupo iti 8 agingga iti 12 a tattao. Iti nadidigra a lugar, naikkan ti tunggal grupo iti espesipiko a trabaho. Iti sanga nga opisina dagiti Saksi ni Jehova idiay Selters, Alemania, 13 a linia ti telepono ti nailasin a mangsungbat iti rinibu nga awag manipud kadagiti agdamag maipapan iti didigra ken no ania a tulong ti maipaay.

Agpada da Ronnie ken Dina nga amin-tiempo a ministro dagiti Saksi ni Jehova, a mangbusbusbos iti tiempoda a tumultulong kadagiti  gagayyem ken kaarrubada a mangammo iti kinapudno ti Biblia. Idi naammuanda nga umadanin ti layus, napanda nga immuna iti sentro ti siudad iti Dresden tapno tumulong iti naganat a panangikagumaan a mangispal kadagiti historiko a pasdekna. Idi immes-esen ti layus, nakikadua da Ronnie ken Dina iti dadduma pay a Saksi a nangdalus iti Kingdom Hall idiay Freital. Nalayus daytoy iti narugit a danum. Kalpasanna, timmulong ti grupo kadagiti kaarrubada. Nabang-aran ti makinkukua iti maysa a restawran a batog ti Kingdom Hall idi dinalusan dagiti Saksi ti basement-na ken ti umuna a kadsaaran ti balayna kadagiti rugit ken lan-ak.

Agnanaed da Siegfried ken Hannelore idiay Colmnitz a maysa a bario nga 40 a kilometro ti kaadayona iti abagatan a daya ti Dresden. Ti danum iti waig a gagangay nga agayus iti bario ket immapaw a nanglayus iti balay ken hardinda. Idi immes-esen ti danum, nasdaaw dagiti kaarruba idi simmangpet ti agarup 30 a Saksi nga estranghero iti dayta a lugar tapno tumulong a mangdalus iti pagtaengan da Siegfried ken Hannelore. Simmaganad, dinalusan ti grupo dagiti kabangibang a hardin. Sinaludsod ti sumagmamano a bumario no apay a nagbiaheda iti 100 a kilometro a tumulong kadagiti tattao a pulos a dida am-ammo, isu a nakaipaay dagiti Saksi iti naespirituan a pammaregta kadagiti biktima idiay Colmnitz.

Nalayus met dagiti kabangibang ti ili ti Wittenberg. Sumagmamano nga aldaw sakbay ti layus, timmulong ti Saksi nga agassawa a da Frank ken Elfriede kadagiti kaarrubada a nangitambak  kadagiti sinako a darat tapno saan a margaay ti takdang ti karayan. Apaman nga immes-es ti layus, binisita da Frank ken Elfriede dagiti biktima. Nangipanda iti taraon ken liniwliwada ida. Malagip ni Frank: “Masmasdaaw ti maysa a babai a binisitami ta isut’ inyegan dagiti estranghero iti taraonna a dida nagpabayad. Imbagana kadakami nga awan kadagiti karelihionanna ti simmarungkar kenkuana. Kasta met a nagsingir ti organisasion a nangyeg iti taraonna kada itulodanda iti taraon. Masmasdaaw dagiti tattao a makakita kadagiti Saksi ni Jehova a nangyeg iti kalluto a taraon imbes a literatura iti Biblia.”

Austria​—Dagus a Panangsaranay Idi Rimsua ti Didigra

Adu met ti dinadael ti layus iti kabangibang nga Austria. Tallo a komite ti nabuangay a mangtarawidwid iti panangsaranay. Immuna a tinarimaanda ti tallo a Kingdom Hall a nakaro ti pannakadadaelda. Dandani 100 met a pamilia a Saksi ti nalayus, ken natinep ti 50 a pagtaengan. Dadduma napukawda ti amin malaksid ti kawes nga adda iti bagida. Pinakaammuan ti sanga nga opisina iti Austria dagiti lokal a kongregasion maipapan iti kasasaad, ket nairugi ti pannakaurnong ti pondo a pangsaranay. Idi Setiembre, nasuroken a $34,000 ti naidonar.

Kastoy ti insurat ti maysa nga ina: “Naglaing nga agurnong ti walo ti tawenna a baritok isu a nakaurnong iti agarup $14. Nupay kasta, idi naammuanna a dadduma a kakabsatmi ket napukawda ti amin a sanikuada, situtulok nga indonarna ti amin a naurnongna iti pondo para iti didigra.”

Babaen ti panangiwanwan dagiti Regional Building Committee (RBC), a kadawyan a mangtartarawidwid iti pannakaibangon ti Kingdom Hall dagiti Saksi ni Jehova, naorganisar dagiti grupo a tumulong a mangtarimaan kadagiti pagtaengan a dinadael ti layus. “Rumbeng nga ipadamag dagiti periodiko ti ar-aramidenyo ditoy,” kinuna ti maysa nga agpalpaliiw. Dadduma ti nangbalbaliw pay iti panangmatmatda kadagiti Saksi ni Jehova. “Agingga ita,” kuna ti maysa a Saksi nga ina, “dagiti di Saksi nga annakko ket saan idi a dumngeg no iranudko ti pammatik kadakuada. Ngem ita dumngegdan!”

Naikagumaan met a matulongan ti adu a di Saksi. Kas pagarigan, natignay unay ti maysa a babai idi immay ti maysa a Saksi iti balayna iti  alas 7:30 iti bigat ket dinamagna no kasapulanna ti tulong. Ti babai ket masapul a mayakar, ta mangrugin a sumrek ti danum iti pagtaenganna. Ngem idi nagawid, adda nasarakanna iti ruangan ti hardinna a surat a naggapu kadagiti Saksi. Kastoy ti naisurat: “No kasapulam ti tulong, ipakaammom a dagus kadakami.” Timmulong dagiti Saksi a nangdalus iti balay ken paraanganna.

Maysa a grupo dagiti 100 a Saksi ti napan iti ili ti Au tapno tumulong kadagiti Saksi sadiay ken kadagiti kaarrubada. Binalaybalay dagiti nangidaulo iti grupo dagiti umili no kasapulanda ti tulong. Nasdaaw dagiti tattao a makakita kadagiti Saksi nga addaan kadagiti alikamen a pagikkat iti danum, ken alikamen a pagdalus a kas kadagiti bomba, karaid, ken pala. Iti sumagmamano la nga oras, nalpasen ti trabaho a kadawyan nga aramiden dagiti bumalay iti makalawas. Makalulua dagiti tattao nga agbuybuya.

Agarup 400 a lokal a Saksi ti simmaranay. Masansan nga awan sarday a nagtrabahoda iti aldaw ken rabii. Kadagiti agbuybuya, dayta ti naisangsangayan a pammaneknek iti pannakabalin ti pudno a Kristianidad.

Dinalapus ti Bagyo nga Isidore ti Mexico

Ti tropikal a bagyo nga Isidore ket naggapu iti amianan ti Venezuela. Idi Setiembre 22, 2002, limmasat ti bagyo a kategoria 3 ti kapigsana iti Yucatán Peninsula iti Mexico. Adda anginna a 190 a kilometro iti kada oras ken napigsa a tudo. Dayta ti nakaigapuan ti kakaruan a pannakadadael iti historia dagiti estado ti Yucatán ken Campeche iti Mexico, ken adda sumagmamano a dinadaelna iti estado ti Quintana Roo. Iti laeng Yucatán, nakaro ti pannakadadael ti agarup 95,000 a pagtaengan. Naapektaran ti agarup 500,000 a tattao.

Epektibo unay ti panangikagumaan dagiti Saksi ni Jehova a timmulong idiay Yucatán ta kinuna ti paulo ti damag iti periodiko: “Immay Timmulong Dagiti Saksi ni Jehova.” Nabuangay ti mangsaranay a komite sakbay pay a dimteng ti bagyo. Adda a dagus dagiti urnos tapno mapadagus ti sumagmamano a gasut a Saksi iti dayta a lugar. Nangipaay dagiti kabangibang a kongregasion iti pang-emerhensia a pondo. Naiwaras dagiti kawes, agas, ken nasurok a 22 a tonelada a taraon kadagiti nakalasat iti bagyo, agraman kadagiti saan a Saksi. Natudingan dagiti lokal a panglakayen a bumisita ken mangparegta kadagiti biktima ni Isidore.

Kalpasan ti panangdadael ti bagyo, nabuangay dagiti mangsaranay a komite iti dayta a lugar tapno tumulongda a mangsapul kadagiti mapukpukaw a Saksi. Sumagmamano ti naiputong iti kakaykaywan ken iti dadduma a lugar iti tallon nga aldaw, nga awan ti taraon ken inumenda a  danum. Iti dadduma a lugar, adalem unay ti danum ta uray la a nalipus dagiti poste ti koriente! Isu a nangalada kadagiti de motor a bilog ket inusarda a pagbirok kadagiti biktima. Pinakanda ida, ken impanda ida kadagiti nataltalged a lugar.

Nagipabulod dagiti lokal nga autoridad kadagiti bilog ken dadduma pay nga alikamen kadagiti Saksi, a nagitukon a tumulong kadagiti lugar a manmano ti mayat a mapan. Idi damo, maysa nga opisial ti militar ti madi a mamalubos kadagiti Saksi a mangaramid iti kasta a napeggad a panagbirok. Ngem idi nakitana ti turedda, kinunana: “Kombinsidoak a masapul nga aghelikopterkayo a mapan, no kasapulan, tapno maalawyo dagiti tattaoyo. Mabalinyo nga usaren dagiti luganmi tapno ipanyo dagiti tattaoyo iti sadinoman a kayatyo a pangipanan.”

Maysa a makinkua iti maysa a tiendaan ti nagsaludsod no apay a gumatgatang ti dadduma a Saksi iti nagadu a naibotelia a danum. Inlawlawagda a dayta ket agpaay kadagiti naespirituan a kakabsatda ken ti dadduma pay nga agkasapulan. Inkeddeng ti lalaki nga ited a libre ti amin a naibotelia a danumna. Iti simmaganad nga aldaw nagidonar iti ad-adu pay a danum​—nagadu a danum. Iti sabali pay a tiendaan, maysa a gumatgatang ti nangdamag kadagiti Saksi no apay a gumatgatangda iti nagadu a taraon. Idi naammuanna a dayta ket agpaay kadagiti biktima ti layus, nangted iti donasion tapno makagatangda ti ad-adu pay.

Nupay dandani 3,500 a pamilia ti Saksi ti napukawan kadagiti material a sanikua gapu iti bagyo nga Isidore, naammuan nga awan ti mapukpukaw wenno natay a Saksi. Kaskasdi, 331 a pagtaengan dagiti Saksi ti nadadael isu a kasapulan a matarimaan dagitoy. Binisita dagiti Saksi nga addaan kapadasan iti panagbangon ti kada pagtaengan ken Kingdom Hall tapno mapattapatta ti nadadael. Agingga ita, agarup 258 a pagtaengan ti natarimaanen ken 172 ti napabaro a balay. Kasta met a maibangbangon ti 19 a nadadael a Kingdom Hall.

Maysa a panglakayen iti kongregasion iti ili ti Yucatán ti natignay a nangibaga: “Nabasak kadagiti publikasiontayo ti trabaho a panangsaranay a maar-aramid iti dadduma a pagilian. Nupay kasta, sabali a banag ti personal a makapasar iti dayta. Napabileg ti pammatik agraman ti pammati ti adu a kakabsatko gaput’ pannakakitami iti napartak nga itutulong ken pannakaseknan ti organisasion ni Jehova ken dagiti patpatgenmi a kakabsat nga immay timmulong.”

Kinuna ti maysa a babai: “Maragsakanak koma no ti relihionko ket timmulong met a kas kadakayo a Saksi.” Ket kinuna pay ti sabali a babai, nga inalaw dagiti Saksi: “Naispalkami gapu kadagiti Saksi ni Jehova. Impakitada ti ayatda, nga inrisgoda ti biagda tapno maalawkami idi nalayus ti balaymi.”

Nabagyo ti Korea

Idi Agosto 31 ken Setiembre 1, 2002, dinalapus ti Bagyo a Rusa ti Korea. Kinuna ni Song-pil Cho a maysa a panglakayen iti kongregasion: “Kaslaak agtaktakder iti sirok ti agub-ubo a danum. Nagtultuloy a nagtudo.” Nasurok a 34 a pulgada ti bayakabak iti kurang pay a 24 oras. Dayta pay laeng ti kapigsaan a panagtudona iti maysa nga aldaw a napasamak iti Korea.

Sigun iti The Korea Herald, iti intero a pagilian 28,100 a balbalay ken 85,000 nga ektaria a talon ti nalapunos. Agarup 70,000 a tattao ti napilitan nga umakar. Adda 301,000 nga ayup a natay, limned ti 126 a barko, ken natumba ti ginasgasut a poste ti koriente. Nasurok a 180 a tattao ti naipadamag a natay wenno mapukpukaw. Mairaman kadagitoy ti dua a Saksi ni Jehova.

Kas idiay Europa ken Mexico, dagus a timmulong dagiti Saksi ni Jehova. Simmangpet dagiti kontribusion a naggapu kadagiti Saksi iti intero a pagilian. Mairaman kadagitoy dagiti kawes, ules, ken dadduma pay a kasapulan. Kaskasdi, agnanaed idi ti dadduma a miembro ti kongregasion kadagiti narigat a madanon ken naiputputong a lugar. Nadadael dagiti kalsada, ken rangtay. Awan ti koriente ken serbisio ti telepono. Isu a naorganisar dagiti grupo a magna a mapan ken mangipaay iti kasapulan a tulong. Kastoy ti panangiladawan ni Song-pil Cho, a nakipagtrabaho iti maysa a grupo a timmulong, maipapan iti maysa a lugar a tinulonganda: “Nadadael ti pito a rangtay ken dakkel a paset ti kalsada. Idi nakagtengkami met laengen iti ili, nadadael ti balbalay iti amin a lugar. Adda nakabuybuyok ta agkaiwara dagiti natay nga animal. Ngem anian a ragsakmi idi nakitami ti innem a Kristiano a kakabsatmi!  Napukawda dagiti material a sanikuada, ngem sibibiag ken natalgedda amin.”

Kinapudnona, nakasagana a naimbag dagiti Saksi ni Jehova para iti daytoy a didigra. Tangay gagangay ti pannakalayus bayat ti panagtutudo, rinugianen ti RBC idiay Seoul ti nangorganisar nga agpaay iti panangsaranay iti masanguanan a didigra. Sipud idi 1997, tinawen a mangsansanay kadagiti boluntario tapno sisasaganada a tumulong no adda emerhensia.

Idi Setiembre 2, simmangpet dagiti mangsaranay a kameng ti RBC idiay makindaya a kosta ti siudad ti Kangnŭng ket nangipasdekda iti hedkuarter iti Assembly Hall dagiti Saksi ni Jehova iti dayta a lugar. Ania ti inyun-unada? Panangted iti nadalus a danum kadagiti nakalasat. No nakaro ti layus, gagangay a madadael dagiti tubo ti danum; isu a narugit unay ti danum. Inyurnos ti RBC a maipatulod dagiti dadakkel a lugan nga addaan tangke ti danum kadagiti nalayus a lugar.

No immes-esen ti danum, mapunno iti nabangsit a pitak ti amin a banag. Nupay kasta, adda napataud a nagsayaat a pamay-an ti panangdalus. Tangay dandani amin a pagtaengan iti lugar ket sementado, mabalin a dalusan dagitoy babaen ti panangikkat kadagiti wallpaper ken alpombra ket ugasan dagitoy babaen iti napigsa a panangpusitsit iti danum.

Madadael ti kaaduan a de koriente nga alikamen gapu iti layus. Nupay kasta, no iti las-ud ti sumagmamano nga aldaw, lasangen dagiti nalaing nga elektrisian dagiti refrigerator ken boiler, dalusanda a naimbag ken pamagaan, sada sangalen manen, kaaduanna ket agandar manen dagitoy. Organisado ti RBC a mangaramid iti kasta a trabaho. Dagiti saan a masapul a masukatan a boiler ti nausar a pangpamaga kadagiti balbalay. Agarup dua ken tallo a lawas a maaramid dayta a proseso.

Masapul met a malabaan a naimbag dagiti nabasa a kawes ken ules iti las-ud ti sumagmamano nga aldaw tapno mausar manen. Timmulong dagiti boluntario kadagiti lokal a kongregasion dagiti Saksi ni Jehova a nagkolekta kadagiti narugitan nga alikamen dagiti Kristiano a kakabsatda. Narigat a labaan dagiti rugit a simlep kadagiti kawes. Masapul nga ima ti manglaba kadagitoy iti nakalamlamiis a waig. Idi naammuan ti maysa a periodiko daytoy a naayat a trabaho, ti dakkel a retrato dagiti Saksi a mangar-aramid iti daytoy a trabaho ket naipakita iti periodiko iti dayta a lugar.

Dagiti makadadael a layus idiay Europa, Amianan nga America, ken Asia ti nangyanud kadagiti balbalay, sanikua, ken nagadu a biag. Nupay nakalkaldaang dagitoy, gagangayen dagita a pasamak bayat dagitoy “maudi nga aldaw” daytoy a sistema dagiti bambanag, a tanda dagiti “napeggad a tiempo a narigat a pakilangenan.” (2 Timoteo 3:1) Mabalin a silalawag nga ipalagip met dagita a didigra daytoy a kinapudno: Dagiti pudno a Kristiano agiinnayatda iti maysa ken maysa ken ay-ayatenda dagiti padada a tattao. Ti kasta nga awanan agum nga ayat ket maysa a banag a di mayanud ti aniaman a bagyo.

[Ladawan iti panid 10]

ALEMANIA​—Maysa a balay a dinadael ti bagyo

[Dagiti Ladawan iti panid 11]

ALEMANIA​—Nasurok a 2,000 a boluntario ti sipapartak a timmulong

[Dagiti Ladawan iti panid 12]

AUSTRIA​—Panangtarimaan iti Kingdom Hall-da idiay Ottensheim

Kannigid: Maysa a grupo dagiti boluntario a nagsubli a naggapu idiay Au, a sadiay tinulonganda dagiti lokal a Saksi ken dagiti kaarrubada

[Dagiti Ladawan iti panid 13]

MEXICO​—Kannawan: Maysa a mangsaranay a komite a mangipapaay iti danum nga inumen kadagiti nakalasat iti bagyo

Baba: Panangibangon iti kasukat a balay

[Dagiti Ladawan iti panid 15]

KOREA​—Manipud kannigid nga agpakannawan: Natinep a paset ti siudad; panangdalus babaen iti napigsa a panangpusitsit iti danum; panaglaba iti asideg a waig