Agimtuod Dagiti Agtutubo . . .

Kasano a Maisardengko ti Panagbalinko a Perpeksionista?

“Ti perpeksionismo ti kangrunaan a mangkonkontrol iti biagko.”​—Carly.

MAAP-APEKTARAN iti perpeksionismo​—ti panamati a rumbeng a naan-anay a perpekto ti maysa a tao iti amin nga aramidenna​—ti panunot ti adu nga agtutubo.

Kastoy ti kuna ti libro a Perfectionism​—What’s Bad About Being Too Good?: “Adda dakkel a nagdumaan ti nasayaat a panangikagumaan nga agbalin a nalaing ken ti makadangran a panangikagumaan a mangragpat iti imposible a kalat. Dagiti tattao a mangikagumaan nga agbalin a nalaing mariknada a rumbeng nga agaramidda kadagiti nangato a kalat, ngem akseptarenda met dagiti kamalida ken adda dagiti naimbag a pamay-an a pangaturda kadagiti kamalida. . . . Iti kasumbangirna, kanayon a madanagan dagiti perpeksionista di la ket ta agkamalida. Nangato unay dagiti pagalagadanda.”

Kastaka kadi? No nangato unay dagiti pagalagadam, mabalin a dika makapagtignay. Mabalin a dimo kayat nga aramiden ti aniaman a baro. Wenno mabalin nga itantanmo nga aramiden dagiti napateg a banag agsipud ta maamakka a mapaay. Mabalin nga agannayaska pay a manglaksid iti asinoman a di makaragpat kadagiti pagalagadam, isu nga awan gagayyemmo.

No dagiti nadakamat ti mangiladawan iti kinataom, usigem ti kuna ti Biblia iti Eclesiastes 7:16: “Dika agbalin a nalabes ti kinalintegna, saanmo met nga ipakita a nalabes unay ti kinasiribmo. Apay koma a paglangalangem ta bagim?” Wen, ti perpeksionista ket mabalin a ‘paglangalangenna ti bagina’! Kinapudnona, adda pay koneksion ti perpeksionismo kadagiti mamagpeggad biag a sakit a nainaig iti pannangan a kas iti anorexia nervosa ken bulimia. *

‘Kasano a maisardengko ti panagbalinko a perpeksionista?’ mabalin ngarud nga iyimtuodmo. Kinapudnona, mabalin a narigat a balbaliwan ti panunotmo iti daytoy a banag. Ngem babaen ti tulong ti Dios, kabaelam nga aramiden dayta. Kitaentayo ngarud ti panangmatmat ti Dios maipapan iti perpeksionismo.

Kinaperpekto​—Kalat a Mabalin a Maragpat?

Umuna iti amin, posible aya nga agbalinka a naan-anay a perpekto? Saan, sigun iti Biblia,  ta kunana: “Awan nalinteg a tao, awan uray maysa . . . Amin a tattao simiasida, sangsangkamaysada amin a nagbalin nga awan pategna.” (Roma 3:10-12) Mamagpanunot a sasao, saan kadi? Dagita ti mangipasimudaag a mapaay ti asinoman a mangikagumaan nga agbalin a naan-anay a perpekto.

Panunotem ni apostol Pablo, a nabatad a mapagulidanan ti espiritualidadna. Nupay kasta, uray ni Pablo ket saan idi a makapagserbi iti Dios a di agkamali. Impudnona: “No kayatko nga aramiden ti umiso, ti dakes ti adda kaniak. Pudno a pagragsakak ti linteg ti Dios maitunos iti kinatao nga adda iti unegko, ngem makitak iti kamkamengko ti sabali a linteg a makigubgubat iti linteg ti panunotko ken mangiturturong kaniak a kautibo iti linteg ti basol nga adda iti kamkamengko.” (Roma 7:21-23) Gapu laeng iti tulong ti Dios a nakapagserbi ni Pablo kas matalek a Kristiano.

Naimbag laengen ta saan a kidkiddawen wenno namnamaen ti Dios ti naan-anay a kinaperpekto iti asinoman kadatayo. “Pagaammona unay ti pannakapormatayo, a laglagipenna a tapoktayo.” (Salmo 103:14) Idiay laeng baro a lubong ti Dios a naan-anay nga agbalinto a perpekto dagiti tattao.

Balbaliwam Dagiti Namnamaem

No kasta, saan a realistiko a panunoten a kabaelam ti agbalin a naan-anay a perpekto. Kinapudnona, namnamaem a pasaray agkamalika. (Roma 3:23) No dadduma, ditay pay ketdi mapupuotan nga agkamalitayo! Kuna ti Salmo 19:12: “Awan ti makailasin kadagiti bukodna a kamali.” (Today’s English Version) Kastoy ti kinuna ti maysa nga agtutubo nga agnagan iti Matthew: “Saanka a perpekto​—awan ti perpekto ditoy Daga. No namnamaem nga agbalinka a perpekto, pulos a dikanto naragsak. . . . Saan a realistiko dayta, imposible dayta.”

Bayat a pampanunotem dayta, apay a dimo baliwan ti dadduma kadagiti namnamaem? Kas pagarigan, bambannogem aya ti bagim iti panangikagumaam nga agbalin a kalaingan iti maysa a banag? Ipakita ti Biblia a ti kasta a makabannog a panagregget ket kayariganna ti “kinaubbaw ken panangkamkamat iti angin.” (Eclesiastes 4:4) Kinaagpaysuanna, kanayon a manmano ti agballigi nga agbalin a kalaingan. Ket uray no adda agballigi, gagangay nga apagbiit laeng dayta ta addanto manen sabali a nalalaing ngem isuna.

Kastoy ti imbalakad ni apostol Pablo: “Ibagak iti tunggal maysa kadakayo dita a saanna a panunoten nga ad-adda ti bagina ngem iti rebbengna a panangpanunot; no di ket agpanunot tapno maaddaan iti nasimbeng a panagpampanunot.” (Roma 12:3) Agbalinka a realistiko! Baliwam dagiti namnamaem tapno agminar dagiti abilidad ken limitasionmo. Ikagumaam ti agbalin a nalaing ngem dimo ikagumaan ti agbalin a perpeksionista. Agaramidka kadagiti kalat a kabaelam a ragpaten.

 Kas pagarigan, pinaregta ni Pablo ni Timoteo nga agbalin a ‘mangmangged nga awan ti aniaman nga ibainna, nga aramatenna a siuumiso ti sao ti kinapudno.’ (2 Timoteo 2:15) Wen, imparegta ni Pablo ti panagbalin a nalaing, ngem dina imparegta ti panagbalin a perpeksionista. Iti umasping a pamay-an, agaramidka kadagiti nainkalintegan a kalat. Ket no saanmo a sigurado no ania ti “nainkalintegan,” makiumanka kadagiti dadakkelmo wenno iti sabali a nataengan a pagtalkam.

Isingasing pay ketdi ti dadduma a padasem nga aramiden ti dadduma a dimo ammo, kas iti baro nga isport wenno panagtokar iti maysa nga instrumento. Wen, bayat a sursuruem ti baro a banag, makaaramidkanto iti adu a kamali. Ngem saan nga interamente a dakes dayta. Nalabit dayta ti mangipaamiris kenka a ti panagkamali ket paset laeng ti panagsursuro.

Aniaman ti ikagumaam nga iringpas​—panagsurat man iti report para idiay eskuelaan wenno nalaing a panagtokar iti maysa a sonata iti piano​—panunotem ti sabali pay a balakad ni apostol Pablo: “Dikay agpalpallailang iti aramidyo.” (Roma 12:11) Wen, dimo itungtungkua wenno itantantan, gapu laeng ta maamakka a dika agballigi.

Nakairuaman idi ti maysa nga agtutubo ti mangitungtungkua kadagiti proyektona iti eskuelaan a pagpambarna nga “ur-urnosenna ti bagina.” Nupay mabalin a nasayaat ti personal a kinaurnos, agannadka a dimo usaren dayta a pagpambar tapno itantanmo ti rumbeng nga aramidem. Naamiris daytoy a balasitang idi agangay a no “maipasango kenka ti pagpilian a panangisumite iti naituding a leksion a saan unay a makapnek kenka ken ti di pulos panangisumite, nasaysayaat a piliem ti kanayon a panangisumite iti naaramidam.”

Iwaksim Dagiti Makadangran a Kapanunotan!

Kinapudnona, mabalin a dika unay mapnek iti di nasayaat a gapuanan. Mabalin a kasta unay ti panangbabalaw ken panangupaymo iti bagim. Ania ti maaramidam? Kinaagpaysuanna, makadangran ti kanayon a pananglagip kadagiti makapaupay a kapanunotan. Ikagumaam ngarud nga iwaksi dagiti di nainkalintegan a kapanunotan maipapan iti bagim. Katawaam dagiti kamalim. Ngamin, adda “tiempo ti panagkatawa.” (Eclesiastes 3:4) Laglagipem met a saan nga anamongan ni Jehova ti nabassawang a panagsasao​—uray no ti bagitayo ti pangibagaantayo iti kasta.​—Efeso 4:31.

Imbes a sangkauyawmo ti bagim, iyaplikarmo ti sasao iti Proverbio 11:17: “Ti tao nga addaan naayat a kinamanangngaasi mangipapaay iti gunggona iti bukodna a kararua, ngem ti naulpit a tao iyegna ti pannakailaksid iti bukodna a bagi.” Panunotem daytoy a saludsod, Immadu aya ti gagayyemmo gapu kadagiti nangato unay a pagalagadam? Nalabit saan. Nalabit adda pay ketdin tattao nga inlaksidmo gapu ta saanda a perpekto. Ania ngarud ti mabalinmo nga aramiden?

Iyaplikarmo ti bilin ti Biblia: “Itultuloyyo nga anusan ti maysa ken maysa ken sibubulos a pakawanen ti maysa ken maysa no ti asinoman adda pakaigapuan ti reklamona maibusor iti sabali.” (Colosas 3:13) Wen, babaen ti panagbalinmo nga ad-adda a nainkalintegan iti namnamaem iti sabsabali, ad-adda a matagiragsakmo ti makigayyem!

Mabalin a panunotem: ‘Apay a liklikandak dagiti tattao gapu ta perpeksionistaak?’ Bueno, panunotem ti mabalin nga ibunga ti panangibagam iti sabsabali a nangato dagiti namnamaem iti bagim. Ilawlawag ti libro a When Perfect Isn’t Good Enough: “Ti aglablabes a panagreklamom no nababa ti naalam a grado iti maysa nga eksamenasion ket mabalin a makapainsulto iti dadduma a mangikagkagumaan a makagun-od iti pasado laeng a grado.” Isu nga ikagumaam ti di agbalin a negatibo ken managimbubukodan. No kasta ti aramidem, kaykayat ti tattao ti makilangen kenka.

Kastoy ti pananggupgop ti agtutubo a ni Carly: “Inkagumaak nga iwaksi ti pagannayasak nga agbalin a perpeksionista.” Kasano a maaramidmo dayta? Mennamennaem ti panangmatmat ti Dios iti bambanag. No marigatanka latta a mangiwaksi iti kapanunotam iti daytoy a banag, makisaritaka kadagiti dadakkelmo wenno iti nataengan a Kristiano iti kongregasionmo. Agkararagka iti Dios ken agpatulongka a mangbalbaliw iti kapanunotam. Ti panagkararag ket nabileg a tulong tapno maiwaksim ti kinaperpeksionista.​—Salmo 55:22; Filipos 4:6, 7.

Kanayon a laglagipem a saan a namnamaen ni Jehova ti kinaperpekto; namnamaenna laeng nga agbalintayo a matalek kenkuana. (1 Corinto 4:2) No ikagkagumaam ti agbalin a matalek, pudno a maragsakankanto iti bagim​—uray no saanka a perpekto.

[Footnotes]

[Ladawan iti panid 17]

Ti panagamak iti pannakapaay ti mabalin a manglapped iti panagaramidmo iti maysa a banag

[Ladawan iti panid 18]

Ti panangikagumaam a makasursuro iti baro a bambanag ti makatulong kenka a mangdaer iti panagkamali