Manipud Kadagiti Agbasbasa

Dagiti Elektroniko nga Ay-ayam Sangapulo ket tallo ti tawenko. Idi nakitak ti magasin nga addaan serye ti akkubna a “Dagiti Elektroniko nga Ay-ayam​—Adda Aya Pagdaksanda?” ammok a makapainteres unay dayta! (Disiembre 22, 2002) Iti panid 7, adda nadakamat nga ay-ayam. Adiktoak idi iti dayta. Kayatko ti agyaman iti panangikabilyo kadagita nga artikulo iti magasin agsipud ta tinulongandak a mangbalbaliw iti ugalik ken ad-adda a mangayat ken Jehova.

J. L., Estados Unidos

Dandanin 15 ti tawenko. Masapul idi a mangtedkami iti report idiay eskuelaan maipapan iti kabaruan a topiko a napilimi. Dimteng daytoy nga Agriingkayo! iti umiso a tiempo. Nakalatlatak ti reportko iti klase ken nangato met dagiti naalak a grado! Pangngaasiyo ta itultuloyyo ti agsurat kadagiti kasta nga artikulo.

J. A., Alemania

Kanayon idi a kayatko nga iyebkas ti panangapresiarko iti impormasion a naipablaak kadagiti magasinyo, ngem idi nabasak dagiti artikulo maipapan kadagiti elektroniko nga ay-ayam, inkeddengko nga agsuratak a dagus kadakayo. Maysaak nga ina ti dua nga annak nga agtawen iti 11 ken 3. Gapuna, naintiempuan unay kaniak daytoy nga impormasion. Nalawag a makitak ti panagayat ken pannalaknib ti Namarsua kadatayo babaen kadagita a publikasion.

O. V., Estados Unidos

Abrolhos Agtawenak iti 13. Nagustuak a binasa ti artikulo nga “Abrolhos​—Kanayon a Pagsiputan.” (Disiembre 22, 2002) Kaay-ayok dagiti nagpaiduma a tumatayab, ngem ti mapaspasamak iti lansad ti taaw ken kadagiti isla ti kangrunaan a nagustuak. Sapay koma ta itultuloyyo ti agipablaak kadagiti kasta nga artikulo.

V. J., Serbia ken Montenegro

Naragsakanak a nangbasa iti daytoy nga artikulo. Naisurat iti pamay-an a talaga a mailadawanko dagiti balyena nga aglagtolagto iti taaw, namaris a billit nga agtaytayab iti tangatang ti baybay, ken kadilian ti korales nga addaan iti nadumaduma a kita ti ikan a mangmangan manipud iti dakulap ti tao. Masmasdaawak unay iti Namarsua, ket kayatko a makita daytoy napintas a lugar iti lubong. Kabayatanna, usarekto daytoy nga artikulo inton makasaritak dagiti tattao a mangipagarup a makapauma ti agbiag nga agnanayon ditoy daga.

M. P., Poland

Pammati a Nasuot Nagustuak ti artikulo a “Pammati a Nasuot Idiay Slovakia.” (Disiembre 22, 2002) Apaman a nabasak dayta, inaramidkon daytoy a surat. No kasano a naibturan ni Ján Bali dagiti nakasuotanna, rumbeng nga agtalinaedkami met a matalek. Ti pananglagipna iti nalawag a pannakailadawan ti paraiso iti libro a The Way to Paradise idi 1924 ti kapintasan a paset ti artikulo. Nagustuak daytoy a paset. Ngamin, maipapan iti baro a lubong ti sarsaritaenna. Siam ti tawenko.

E. K., Hungary

Panangimpluensia Dagiti Kakadua Kanayon a kayatmi ti agsurat tapno agyamankami a sangapamiliaan kadagiti nagsayaat a magasinyo. Kamaudiananna, inkeddengmi ti agsurat kalpasan a nabasami ti artikulo nga “Agimtuod Dagiti Agtutubo . . . Kasano a Sarangtek ti Panangimpluensia Dagiti Kakaduak?” (Disiembre 22, 2002) Nakatulong kadakami daytoy nga artikulo tapno maawatanmi no kasano a ni Jehova ket naam-ammo a naimbag ken naan-anay a nagtalkan ti ubing idi a ni David, gapu ta kanayon a nagpudno ni David kenkuana. Naballigi ni David ta saan a nagpannuray iti bukodna a pannakaawat wenno iti dadduma a tattao. Kinapudnona, no adda ni Jehova iti dasigtayo, apay koma a pagamkantayo dagiti kakaduatayo?

F. H., Estonia

Dua a tawenen nga agbasbasaak iti Agriingkayo!, ket ita pay laeng a napikapik ken naparegtaak idi nabasak daytoy nga artikulo. Nariknak a kas man la naisurat nga agpaay kaniak. Pagyamanan unay iti naintiempuan nga impormasion.

T. C., Estados Unidos