Pannakailadawan Dagiti Kangrunaan a Kalidad ti Maysa a Narelihiosuan a Grupo

Kas paset ti ad-adalenna a geograpia iti haiskul, natudingan ti 15 ti tawenna a ni Philip nga agsirarak ken agreport maipapan iti aniaman a grupo iti isports, politika, kultura, wenno relihion iti pagnanaedanna a siudad ti Sydney, Australia. Pinili ni Philip ti agreport maipapan iti kongregasion dagiti Saksi ni Jehova iti lugarda a nakaikamenganda a sangapamiliaan. Naibilin kadagiti estudiante a makisaritada iti 20 a miembro ti grupo a napilida, tapno iladawan dagitoy “dagiti kangrunaan a kalidad ti grupoda.”

Kalpasan a ginupgop ni Philip dagiti resulta ti pannakisaritana, kastoy ti insuratna: “Ti kongregasion dagiti Saksi ni Jehova [iti lugarmi] ket maysa a narelihiosuan nga organisasion nga agtataripnong a nangnangruna tapno adalenda ti Biblia. Kabayatan dagitoy a gimong, adda dagiti paset ti Biblia a mabasa ken kalpasanna mailawlawag. Panggep met dagitoy a gimong nga isuro kadakami no kasano ti kasayaatan a panangisuromi kadagiti sabsabali maipapan iti Biblia. Maar-aramid daytoy babaen ti panagbalaybalay tapno makasaritami dagiti tattao iti pagtaenganda, a sadiay a komportableda unay. Amin a miembro ti kongregasion ket regular a makipaspaset iti daytoy a trabaho, iti agduduma a kasansan, sigun iti kasasaadda. Malaksid iti panagadalda iti Biblia a mismo ken panangisuroda iti sabsabali maipapan iti dayta, agibumbunong met ti kongregasion kadagiti makaisuro ken kabaruan a pagiwarnak a Ti Pagwanawanan ken Agriingkayo! nga aglaon iti adu a makapainteres nga artikulo maipapan iti nakaparsuaan, historia, agraman kadagiti sangalubongan ken lokal nga isyu. Ikagkagumaanmi met a saranayen dagiti marigrigatan a tattao kalpasan dagiti nakaro a didigra, kas iti napasamak idi Setiembre 11, ken agipabpablaakkami iti adu a makatulong a publikasion maipapan kadagiti tema a kas iti panagasawa, biag ti pamilia, ken agtutubo.”

Gapu iti kalidad ti panagsirarak ken ti panangiparangna iti dayta, nakaawat ni Philip iti kangatuan a grado para iti reportna. No kayatmo a maammuan ti ad-adu pay maipapan iti trabaho dagiti Saksi ni Jehova, makisaritaka kadakuada inton sumaganad a sumarungkarda wenno makiumanka kadakuada babaen ti address a kaasitgan kenka a nailista iti panid 5.

[Ladawan iti panid 16]

Ni Philip

[Ladawan iti panid 16]

Italia

[Ladawan iti panid 16]

Australia

[Ladawan iti panid 16]

Brazil

[Ladawan iti panid 16]

Netherlands