Dakkel ti Epekto ti Reportna

Naaddaan iti gundaway ni Ginny, maysa kadagiti Saksi ni Jehova idiay Estados Unidos a mangilawlawag iti relihionna bayat ti maudi a tawen ti panageskuelana. Kinunana: “Imbaga ti maestrak a masapul nga agaramidkami iti term paper tapno makagraduarkami. Imbagak kenkuana a kayatko nga isurat ti pakasaritaan dagiti Saksi ni Jehova nga adda idi iti kampo konsentrasion dagiti Nazi.”

Pinatgan ti maestra nga isurat ni Ginny ti topikona. Inamin ni Ginny: “Agnernerbiosak idi dimteng ti tiempo nga isumitekon ti term paper ken iparangko dayta iti klase. Diak ammo no ania ti makuna dagiti kaklasek wenno mabalin a rabakendak.”

Rinugian ni Ginny ti palawagna babaen ti saludsod nga: “Adda kadi makaammo no siasino ti nagisuot iti Bituen ni David iti kampo konsentrasion dagiti Nazi?” Simmungbat ti amin, “Dagiti Judio.” Kalpasanna, dinamagna no adda makaammo no siasino dagiti nagisuot iti lila a trianggulo. Awan ti simmungbat. “Imbagak kadakuada a dagiti Saksi ni Jehova,” kinuna ni Ginny.

Nasdaaw ti maestra ken ti klase iti impakaammo ni Ginny. “Nasdaaw ken rinaemda idi naammuanda a mabalin a nawayawayaan koman dagiti Saksi ni Jehova no pinirmaanda ti papel a mangibagbaga a tallikudandan ti pammatida,” kuna ni Ginny. “Idi agangay, imbaga ti dadduma a kaklasek a rabrabakenda idi dagiti Saksi ni Jehova ngem inton adda manen Saksi nga umay idiay balayda, dumngegdanto.”

Nakagun-od ni Ginny iti uppat a kangatuan a marka gapu iti report ken presentasionna. “Saanak laeng a nakagun-od iti nangato a grado,” kinunana, “no di ket naaddaanak pay iti naisangsangayan a gundaway a mangilawlawag iti pammatik!”

[Ladawan iti panid 19]

Adu kadagiti Saksi ni Jehova ti nawayawayaan no la koma ta pinirmaanda daytoy a dokumento a mangibagbaga a tallikudandan ti pammatida

[Credit Line]

Impaay ti United States Holocaust Memorial Museum