Kalpasan Dagiti Kanalbuong

BABAEN TI MANNURAT TI AGRIINGKAYO! IDIAY ECUADOR

 NAKATALTALINAAY idi nga aldaw ti Nobiembre 20, 2002, iti Riobamba a siudad ti Ecuador. Asul ti langit, ken kasla nakalamlamuyot dagiti puraw nga ulep iti tangatang. Nagpintas a retratuen tapno aramiden a postcard dagiti naabbungotan iti niebe a bulkan iti aglawlaw. Ar-aramiden idi ti 124,000 nga umili nga agnanaed sadiay dagiti kadawyan a trabahoda, iti agarup 2,700 a metro ti kangatona a kabambantayan ti Andes. Ngem dida ammo a dandanin mariribuk daytoy natalna a kasasaad. Kellaat nga iti natalinaay a malem, adda makasisileng a kanalbuong! Nangrugin nga aggunggon dagiti tawa ken suelo. Nangrugin a makita ti mamarpartaan ken nagpartak ti panagsaknapna a kasla uong nga ulep.

Iti las-ud ti sangapulo a minuto, rimsua ti maikadua a kanalbuong. Napakuyogan dayta iti napigsa a panaggunggon a nangbuong kadagiti tawa ken nanglikkiat kadagiti ridaw iti bisagrada. Kalpasanna, nagparang ti agal-alikuno nga ulep ti apuy ken asuk a dakdakkel pay ngem ti immuna nga ulep. Kalpasanna, nagsasarunon dagiti kanalbuong ken panaggilap.

Nasuroken nga 60 ti tawen ti agassawa a da José ken Ana. Agpadada a Saksi ni Jehova ken agnanaedda iti agarup 400 a metro manipud iti nakapasamakan ti kanalbuong. Naidaramudomda iti suelo gapu iti pigsa ti kanalbuong. Nakatakder idi ni Ana iti asideg ti makinsango a ridaw idi naikkat dagiti bisagra ti rikep sa naipuruak iti makinlikud a diding. Idi nagdardaras a nagtaray ti napabutngan nga agassawa iti likudan ti balayda, nangrugin a marsuod ti bobida kadakuada. Nupay kasta, nabaelanda ti simrek iti bassit a makinlikud a beranda, a nagkamanganda sada rinugianen ti nagkararag. Naimbag laengen ta 15 a minuto kalpasanna, simmangpet ti baroda nga addaan iti kotse tapno ipanna ida iti natalged a lugar.

Nadangran ti dadduma. Adda panaglagaw kalpasan dagiti kanalbuong. Adu a tattao ti nagnagna a pimmanaw. Gapu iti arimbangaw, naikaglis ti dadduma ket natumbada kadagiti nabuong a sarming a naiwaris iti bangketa. Nakaam-amak ti kapartak dagiti kotse, bus, ken trak a rimmuar iti siudad. Dadduma ti nagturong iti di umiso a direksion kadagiti kalsada a di mabalin a pagsabatan ti lugan! Adu a pimmanaw a naggapu kadagiti eskuelaan wenno pagtrabahuanda ti di nakaammo iti kasasaad wenno ayan dagiti pamiliada iti las-ud ti dandani 24 nga oras.

Ania ti makagapu kadagitoy amin a riribuk? Ti uram iti pagipempenan ti armas iti uneg ti daga iti asideg a kampo ti militar ti nakaigapuan ti adu nga agsasaruno a kanalbuong dagiti bimtak a granada, tangke, ken bala ti kanyon. Bayat a nagtultuloy dagiti kanalbuong, inyanunsio ti adu a lugan dagiti polis babaen kadagiti trompa a masapul a pumanaw ti amin a tattao iti siudad ken umadayoda iti agarup 15 a kilometro.

Di nagbayag napanawanen ti Riobamba. Rinibu nga umili ti adda kadagiti haywey iti ruar ti siudad, a sangkakuyoganda iti sidong ti makapaketter nga angin iti rabii. Adu ti awanan sueter wenno diaket. Kalpasan ti sumagmamano nga oras bimmassiten dagiti kanalbuong. Gapu iti makaketter a lamiis, siaannad dagiti umili a nangrugin a nagsubli iti siudad. Kabigatanna, idi nalawagen, nakita ti adu a tattao a nakaro ti pannakadadael dagiti tawa, ridaw, atep, bobida, ken diding ti balbalayda. Nasarakan ti maysa a pamilia ti kasla imuko ti sukogna a sarming a naipalok iti kutson ti kama. Dadduma ti nakasarak kadagiti awang a bala iti uneg ken aglawlaw dagiti pagtaenganda.

Nailista iti damo a report a di kumurang a 7 ti natay, 538 ti nasugatan, ken 18,000 ti pagtaengan a nadadael. Kadagiti 950 a Saksi ni Jehova iti dayta a lugar, awan ti natay, nupay dua ti naagasan gapu kadagiti nakaro a sugatda.

Tulong Kadagiti Nadidigra

Iti agsapa kalpasan ti kanalbuong, rinugianen nga inammo dagiti panglakayen iti  lokal a kongregasion dagiti Saksi ni Jehova ti kasasaad dagiti Kristiano a kakabsatda. Kamalmanna, nakipagkita ti agdaldaliasat a manangaywan dagiti Saksi ni Jehova kadagiti panglakayen iti 13 a lokal a kongregasion ken dagiti kabangibangda tapno ammuenna dagiti nadadael ken nasugatan. Pinaregtana dagiti panglakayen nga aywananda ti emosional ken naespirituan a kasapulan dagiti nakalasat. Nakapatpateg ti pannakigimong uray iti sidong dagita a kasasaad! (Hebreo 10:24, 25) Iti kasta, inaramid dagiti lokal a kongregasion ti regular a panaggigimongda iti rabii kalpasan ti didigra.

Iti Huebes ken Biernes, naurnongen ti detalyado a report dagiti nadadael a balay dagiti Saksi ket naipatulod iti lokal a sanga nga opisina dagiti Saksi ni Jehova idiay Guayaquil. Impakaammo ti report ti naganat a pannakatarimaan dagiti nadadael a tawa tapno masalakniban dagiti umili manipud iti lamiis. Iti sumagmamano la nga oras, nakagatangen ti sanga nga opisina kadagiti dadakkel a lukot ti nasaragasag a plastik, adu a rolyo ti tape, ken lansa ti semento, tapno temporario a matarimaan dagiti tawa.

Dimteng ti trak a nagkarga kadagiti suplay a naggapu iti sanga nga opisina iti alas 9:00 ti bigat iti Sabado. Adu a grupo dagiti lallaki ken babbai a Saksi ti tumultulongen kadagiti kapammatianda a mangdalus kadagiti nabuong a sarming ti balbalayda tapno maibaskagen dagiti plastik. Nagbalin a sentro ti panagtrabaho ti maysa a Kingdom Hall iti dayta a lugar. Namarkaan ti suelo tapno mabiit a marukod ti plastik. Babaen ti panangusarda iti rinukod dagiti grupo a tumultulong, nakartib dagiti umiso a kaatiddog ti plastik sa naitulod kadagiti agur-uray a grupo nga agibaskag.

Kastoy ti insalaysay ni José, a nadakamat itay: “Idi simmangpetkami idiay balaymi iti malem kalpasan ti kanalbuong, adda sadiayen dagiti kakabsat a mangdaldalus kadagiti nadadael. Iti Sabado, immay ti kaarrubak ket imbagana a nagsayaat ti pannakaibaskag ti plastik iti balayko sana dinamag, ‘Mano ti nagastom iti daytoy?’” Anian ti siddaaw ti kaarrubana idi naammuanna a naaramid dayta a libre!

Karabiian ti Sabado, ti dandani 200 a boluntario manipud kadagiti lokal a kongregasion naserraandan ti tawtawa ti 91 a balbalay dagiti Saksi. Adu met a saan a Saksi ti natulongan. Impablaak ti periodiko iti dayta a lugar ti retrato ti maysa a balay a tinarimaan dagiti Saksi sa impakaammona a kadagiti walo nga agnaed iti balay, maysa laeng ti Saksi ni Jehova.

Naipaay ti Emosional a Tulong

Gagangay laeng a makapadanag unay dagiti kanalbuong. Tapno maliwliwa dagiti Saksi iti dayta a lugar, naorganisar ti espesial a miting idi Lunes, Nobiembre 25, iti alas 5:00 ti malem. Naibaon dagiti pannakabagi ti lokal a sanga nga opisina a mangidaulo iti miting. Agsipud ta awan ti koriente, saan a mabalin a maangay ti miting iti rabii. Yantangay saan unay a kombiniente ti oras ti miting, adda laeng agarup 600 a manamnama nga umay. Nupay kasta, 1,421 a nakairamanan dagiti di Saksi a kaarruba ti nangpusek iti Assembly Hall ti Riobamba! Ti Salmo 4:8 ti kangrunaan a teksto a nausig iti programa: “Agpadpadanto nga agiddaak ken maturogak a sitatalna, ta sika laeng, O Jehova, pagnaedennak iti kinatalged.” Inyebkas ti amin a timmabuno ti kasta unay a panagyamanda iti makaliwliwa a naespirituan a programa.

Ginasut a kopia ti artikulo iti Agriingkayo! a “Didigra ti Nakaparsuaan​—Panangtulong iti Anakyo a Mangsaranget” (Hunio 22, 1996) ti naibunong kadagiti nagannak kalpasan ti programa. Kuna ti maysa a parapo iti artikulo:

“Kuna ti Federal Emergency Management Agency (FEMA) ti E.U. a kalpasan la unay ti maysa a didigra, kadawyan a mabuteng dagiti ubbing a (1) mabatida nga is-isuda, (2) maisinada iti pamilia, (3) mapasamak manen ti didigra, ken (4) adda madangran wenno matay.” Maibatay iti daytoy nga artikulo, kastoy ti naiparegta kadagiti nagannak:

1. Ikagumaanyo nga agtalinaed ti pamilia a sangsangkamaysa.

2. Iwayaanyo nga ilawlawag ti kasasaad a sikakalma.

3. Paregtaenyo ti annakyo nga agsao.

4. Iramanyo dagiti ubbing iti panagisinup.

 Kalpasanna, nairanud dagiti nabati a kopia ti artikulo iti Agriingkayo! kadagiti kaarruba ken mayad-adalan iti Biblia.

Tallo a lawas kalpasan ti kanalbuong, nagatangen dagiti material a mausar iti naan-anay a panagtarimaan, agraman ti pannakaikabil dagiti baro a tawa, bobida, ken atep. Iti las-ud ti tallo pay a lawas, nairingpasen dagitoy a proyekto, agraman ti pannakatarimaan ti dua a Kingdom Hall. Nagadu ti nagyaman kadagitoy a naayat a probision.

Gagangayen ti nadumaduma a didigra kadagitoy “maudi nga aldaw.” (2 Timoteo 3:1-5) Nupay kasta, ti panangsaranay dagiti Saksi ni Jehova iti maysa ken maysa ken kadagiti kaarrubada ti mangpaneknek iti bileg ti pudno a Kristianidad. Nagsayaat ti panangyebkas ni José iti dayta idi kinunana: “Saan nga agtaktak ti organisasion ni Jehova a tumulong kadatayo no kasapulantayo.”

[Dagiti Ladawan iti panid 15]

Agarup 200 a Saksi ti nagboluntario a nagdalus. Narukod dagiti baro a tawa, naragadi, ken naikabil. Nasukatan dagiti atep