Libro Para Kadagiti Agtutubo

Adda estudiante iti unibersidad ti Arkhangelsk a nagsurat iti sanga nga opisina dagiti Saksi ni Jehova idiay Russia. Inlawlawagna nga adda nasabatna iti dalan a nangted kenkuana iti magasin nga impablaak dagiti Saksi. “Dayta ti namagpanunot kaniak maipapan iti biag ken no ania ti ammok maipapan iti Dios ken iti relihion,” insuratna. “Ita, kayatkon nga adalen ti Biblia. Kayatko a maammuan ti ad-adu pay maipapan iti daydiay dimi am-ammo a nangted iti biagna agpaay kadagiti basoltayo ken agpaay a pakaisalakanantayo.”

Intuloy a kinuna ti suratna: “Napateg unay ti trabaho nga ar-aramidenyo, nangruna ti panangilawlawagyo kadagiti ubbing ti nagdumaan ti naimbag ken dakes. Ngamin, kasda la espongha a mangagsep iti amin nga adda iti aglawlawda sada agbalbaliw tapno makitunos kadagitoy.” Ti estudiante ket addaan iti ading a lalaki ken babai, isu a nagkiddaw iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo. “Sapay koma ta makatulong dayta iti panageskuela ken panagbiagda,” kinunana.

Mabalinmo met ti maaddaan iti kastoy a libro, a nairanta a tumulong kadagiti agtutubo a mangrisut kadagiti parikut a sarsarangtenda iti kaaldawantayo. Suratam laeng ti naipakuyog a kupon ken ibusonmo dayta iti address a makita iti kupon wenno iti maitutop nga address a nailista iti panid 5 daytoy a magasin.

□ Kayatko ti maaddaan iti libro a Dagiti Saludsod nga Iyimtuod ti Agtutubo​—Dagiti Sungbat nga Epektibo.

□ Interesadoak iti libre a panagadal iti Biblia.