Manipud Kadagiti Agbasbasa

Korte Suprema Pagyamanan iti serye ti akkub a “Korte Suprema ti E.U. ken ti Wayawaya nga Agsao.” (Enero 8, 2003) Impakita dagitoy nga artikulo no kasano a pasaray maibilang a husto ti panangidumduma ti kaaduan. Kaaduan ti agkuna a mabalin latta a patiem ti aniaman a kayatmo ngem saan a mabalin nga iranudmo dayta. Kalpasan a nabasak dagitoy nga artikulo, naregregtaakton a mangiranud kadagiti narelihiosuan a patpatiek iti sabsabali.

S. O., Japan

Ti kaso idiay Stratton, Ohio ket pudno a panagballigi ti wayawaya nga agsao. Dayta a makaay-ayo a desision ket mabalin a makatulong iti dadduma a paset ti lubong, kas ditoy Pilipinas. Ngamin, iti dadduma a lugar, dagiti Saksi ni Jehova ket pawpawilan dagiti sekular nga autoridad a mangkalikagum a rumbeng a mangalada iti permiso a mangasaba iti balaybalay. Agyamankami iti daytoy nagpateg a panagballigi.

N. E., Pilipinas

Gura Naimpusuan nga agyamanak kadakayo gapu iti kapadasan ni José Gomez, a naisalaysay iti artikulo a “Nawayawayaan iti Biag a Napno iti Gura.” (Enero 8, 2003) Adu a tawen a nagsagabaak met iti naulpit a pannakatrato. Ita, awanen ti asinoman a kagurak. Agaplikar met kaniak ti kinuna ni José, “Ania koma ti nagmamaayak ita no saan a gapu iti kinamanangngaasi ni Jehova?” Pagyamanan iti daytoy nagsayaat a kapadasan no kasano a naparmekna ti gura.

N. T., Japan

Nataltalged a Panagsikog Kayatko ti agyaman gapu iti artikulo a “Panamagbalin a Nataltalged ti Panagsikogmo.” (Enero 8, 2003) Babaen iti daytoy nga artikulo, limmawag ti panangmatmatko iti panagsikog. Agtawenak iti 32, ket talaga a kasapulak daytoy nga artikulo. Maawatak itan no ania ti rumbeng nga aramidek tapno nataltalged ti panagsikogko ken maipakitak ti panangapresiarko iti daytoy nagsayaat a sagut.

B. C., Italia

Dakamaten daytoy nga artikulo a ti maysa a babai ket mabalin a maeksamen para iti group B streptococcus iti 26 agingga iti 28 a lawas. Ti agdama a maisingasing a tiempo ti panangeksamen ket iti nagbaetan ti 35 ken 37 a lawas ti pannakayinaw saan ketdi a 26 agingga iti 28 a lawas. Dagiti agbasbasa iti daytoy nga artikulo ket mabalin nga agdamag kadagiti doktorda no apay a dida maeksamen iti nagbaetan ti 26 ken 28 a lawas. Ti Agriingkayo! ket mabalin a saan nga ibilang dagiti doktorda a kas mapagtalkan a gubuayan ti impormasion para kadagiti pasienteda.

L. S., Estados Unidos

Sungbat ti “Agriingkayo!”: Adu a bulan a nasaksakbay a maisagana dagiti magasinmi tapno adda tiempo a maipatarus iti nasurok a 80 a lenguahe. Idi maisursurat ti artikulo maipapan iti nataltalged a panagsikog, 26 agingga iti 28 a lawas ti akseptaren ti adu a maitutop a tiempo ti panangeksamen. Ngem idi Agosto 2002, nangiruar ti American Academy of Pediatrics iti kabaruan nga impormasion nga impaay kadakuada ti Centers for Disease Control ti E.U. Ita, kas iti siuumiso a dinakamat ti agbasbasa, ti maisingasing a tiempo ti panangeksamen ket iti 35 agingga iti 37 a lawas.

Iti panid 13, kuna ti footnote a ti iron ken folic acid ket adda iti dalem ken kadagiti nuez. Nupay kasta, ti dalem ket aduan iti bitamina A​—a mabalin a makadangran iti maladaga kas iti kinuna ti artikuloyo.

B. J., Britania

Sungbat ti “Agriingkayo!”: Pagyamanan iti dayta a pakdaar.

Panangimpluensia ti Kakadua Maysaak a balasitang nga agtawen iti 15. Marigatanak a mangsaranget iti panangimpluensia ti kakaduak. Naragsakanak unay a nangbasa iti artikulo nga “Agimtuod Dagiti Agtutubo . . . Kasano a Sarangtek ti Panangimpluensia Dagiti Kakaduak?” (Disiembre 22, 2002) Ti pannakabasak maipapan iti dadduma nga agtutubo nga addaan iti kasta met laeng a parikut ti nangipanamnama a saan la a sisiak ti kasta. Kabaelanmi a sarangten ti panangimpluensia ti kakaduami babaen ti tulong ti maymaysa ken kakaisuna a Mannakabalin-amin a Dios. Pagyamanan unay iti daytoy nga impormasion a dimteng iti umiso a tiempo.

K. R., Australia

[Picture Credit Line iti panid 30]

Rinetrato ni Josh Mathes, Koleksion ti Korte Suprema ti Estados Unidos