Natimbeng a Panangmatmat iti Uso
Natimbeng a Panangmatmat iti Uso
KUNA ti Biblia a ‘tunggal banag inaramid ti Dios a napintas iti tiempona.’ (Eclesiastes 3:11) Makitatayo ti kinapintas iti sadinoman ditoy lubong a pagbibiagantayo. Madlawtay met dayta kadagiti tattao.
Kayat dagiti diseniador iti uso a papintasendatayo babaen kadagiti kawestayo. Ngem kas naipakita iti immuna nga artikulo, binalbaliwan met ti industria ti uso ti depinasion ti kinapintas. Kuna ni Ruth Striegel-Moore a propesor iti sikolohia: “Nairuamtayon a makakita kadagiti nakaraprapis a babbai. Pampanunotentayo a dagitoy ti pagwadan iti kinapintas.”
Nabatad a di nainsiriban no agpaimpluensiatayo a mangtulad iti pagarupen ti lubong ita a napintas. Iti libro ni Doris Pooser nga Always in Style, impatuldona a “saan a nasken a balbaliwan dagiti babbai itatta ti pigurada no rumsua ti baro a ‘pagwadan’ a langa.” Kinapudnona, apay koma nga ituloktayo nga idiktar ti media ti partikular
a pangkaaduan a panangiladawanna iti langa? “Nasaysayaat nga amang ti riknatayo no kontentotayo iti kinatao ken kababalintayo imbes a padasentayo a balbaliwan ti itsuratayo,” kinuna ni Pooser.Ti Manayon a Kinapintas
Ti panagtalek iti bagi ken ti pannakapnek iti biag ket saan laeng nga agpannuray iti napintas a langa. “Agtaud iti kinataotayo ti pudpudno a kinaragsak,” kuna ni Judy Sargent a dati nga addaan iti anorexia. “Saan a magun-odan dayta babaen iti panagpakuttongmo.” Nabagbagas pay ti komento ti Biblia. “Ti kinapintasmo,” kuna ni apostol Pedro, “isu koma ti agpaypayso a makin-uneg a kinataom, ti manayon a kinapintas ti naemma ken naulimek nga espiritu, a daytat’ kapatgan iti imatang ti Dios.”—1 Pedro 3:4, Today’s English Version.
Ti manayon a kinapintas a tuktukoyen ni Pedro artapanna ti pisikal a kinapintas gapu iti kinapermanente ken kinapategna iti imatang ti Dios. Kinuna ti masirib nga ari adu a siglo ti napalabasen: “Ti kayaw mabalin nga ulbod, ken ti kinalibnos mabalin nga ubbaw; ngem ti babai nga agbuteng ken Jehova isu ti makagun-od iti dayaw maipaay iti bagina.”—Proverbio 31:30.
Nupay ad-adda a makaallukoy ita ti pisikal a kinapintas, adu a tattao ti agraem pay laeng iti tao a mangipakpakita kadagiti Nakristianuan a kalidad. Binagbagaan ni apostol Pablo dagiti Colosas 3:10, 12.
Kristiano: “Kawesanyo ti bagbagiyo iti baro a personalidad, . . . kadagiti kinalailo ti pannakipagrikna, kinamanangngaasi, kinapakumbaba iti panagpampanunot, kinaalumamay, ken mabayag a panagitured.”—Gagangay nga agbaliwbaliw ti uso. Papintasennatayo man ti kaudian a moda, saan nga agbayag daytoy. Ngem dagus nga agkupas ti aniaman a kinapintastayo no di maibagay ti langatayo iti personalidadtayo. Laglagipentayo, a “ti bunga ti espiritu”—agraman dagiti kalidad nga ayat, rag-o, talna, mabayag a panagitured, kinamanangngaasi, kinaimbag, pammati, kinaalumamay, panagteppel—ket saan a pulos nga agkupas.—Galacia 5:22, 23; 1 Timoteo 2:9, 10.
Nupay kasta, talaga a rumbeng nga asikasuentayo ti panagkawkawestayo. Inamin ni Aline a taga Francia, a narigat ti agbalin a kanayon a natimbeng iti daytoy a banag. “Idi tin-edyerak,” kinunana, “kaay-ayok dagiti kawes. Kayatko a tuladen dagiti kabaruan nga uso tapno maaddaanak iti panagtalek iti bagik. Ket nasaysayaat pay nga amang no makagatangak kadagiti kawes a nalatak ti etiketada.
“Ngem idi nataenganakon,” kinuna ni Aline, “masapul a sursuruek a suportaran ti bagik, ket rinugiak metten a busbosen ti ad-adu a tiempok iti Nakristianuan a ministerio. Naamirisko a no kayatko ti agbiag sigun iti kabaelak, saanakon a kanayon a tumulad iti uso. Nangrugin a gumatangak iti kawesko no adda baratilio wenno gumatangak kadagiti tiendaan a nalaka ti lakoda. Natakuatak a napintas latta dagiti kawesko—ngem kakapat laengen ti presioda. Ti sekreto ket agpannuray iti panaggatang iti praktikal ken maibagay kenka, maibagay iti addan a kawesmo, ken saan a dagus a maawan nga uso. Imbes a palubosak ti uso a mangidiktar iti rumbeng a gatangek, panunotek itan no ania a moda ti maibagay kaniak. Diak ibagbaga a saanen a napateg ti kawes kaniak ngem ti kinapategko saan laengen nga agpannuray a nangnangruna iti langak.”
Iti kagimongan a mangipangpangruna iti langa ngem kadagiti kalidad, nasayaat a laglagipen dagiti Kristiano ti nakapatpateg a palagip ti Biblia: “Amin a banag nga ipaay ti lubong, amin a mangpennek iti tarigagay wenno makaawis kadagiti mata, amin a makaallukoy iti biagna, saan nga agtaud iti Ama, no di ket agtaud iti nadangkes a lubong. Ket ti lubong aglabas agraman ti amin a pangallukoyna, ngem daydiay agaramid iti pagayatan ti Dios agtalinaed iti agnanayon.”—1 Juan 2:16, 17, The New English Bible.
[Ladawan iti panid 9]
Ti agpaypayso a kinapintas agtaud iti kinataom, saan nga iti kawesmo
[Ladawan iti panid 10]
Agpilika kadagiti kawes a praktikal ken maibagay iti addan a kawesmo