“Itultuloymo nga Aramiden ti Naimbag”

“Kayatko a maammuanyo a dagiti panagregget ken kinagagetyo ket nadlaw dagiti tattao a maseknan iti kinapintas ti Ilitayo ken no kasano ti itsura dayta kadagiti aglabas a biahero. Iparangarang ti pasdekyo nga ipatpategyo ti aglawlaw ken ti Ili a mismo.”

Dagitoy a pammadayaw ket naggapu iti mayor iti ili ti Halton Hills, nga ayan ti sanga nga opisina dagiti Saksi ni Jehova idiay Canada. Kalpasanna, inted ti mayor ti plake para iti sanga nga opisina. Nailanad iti dayta ti “panangapresiar kadagiti panagregget ken kinapasnek[na] a mangitandudo ken mangpapintas iti kalidad ti panagbiag ti amin nga agnanaed iti Halton Hills.”

Paneknekan ti kasta a komendasion manipud kadagiti agtuturay iti gobierno ti kinaagpayso ti Roma 13:3, a kunana: “Itultuloymo nga aramiden ti naimbag, ket maidayawkanto iti dayta.” Ngem maitutop la unay nga amin a dayaw ket maipaay ken Jehova, ti Soberano iti uniberso.