Komunikasion a Mangiturong iti Biag

KADAGITI amin a parsua ditoy daga, dagiti laeng tattao ti saan a mapnek iti basta panagsasarita. Aniaman ti nasionalidad, kasasaad iti kagimongan, sekso, wenno adalda, nainkasigudan kadakuada ti tarigagay a makisarita iti kangatuan a persona nga isu ti Dios.

Maysa laeng aya a minamaag nga an-anito dayta? Sigurado a saan! Kas nadakamaten iti kalkalpas nga artikulo, pinarsua ti Dios ti tattao a kaladladawanna. Inikkannatayo iti pannakaawat kadagiti naespirituan a banag. Mairaman iti daytoy ti tarigagaytayo a makikomunikar kenkuana kas ti nailangitan nga Amatayo. (Genesis 1:27; Mateo 5:3) Kinapudnona, matmatan ti Dios a nakapatpateg ti pannakikomunikar kenkuana ta isut’ matuktukoy a “Managdengngeg iti kararag.”​—Salmo 65:2.

Anian a dayaw ti agkararag iti Mannakabalin-amin! Ibilang ti kaaduan a tattao a pribilehio ti pribado a pannakisarita iti katan-okan nga agturay, kas iti presidente wenno primero ministro. Nupay kasta, ni Jehova a Dios ti katan-okan a persona iti uniberso! Ket saan a masapul nga umuna a makitulagtayo kenkuana tapno makasaritatayo. Mabalintayo ti agkararag iti aniaman a tiempo, ken iti sadinoman a lugar. Mabalin pay a siuulimek nga agkararagtayo a naimpusuan iti Dios. (1 Samuel 1:12-15) Nupay kasta, pudno a kalikaguman ni Jehova a napasnek ken natulnogtayo nga umimdeng kenkuana. (Mikias 6:8; Mateo 6:5-13) Ngamin, amin a naimbag a komunikasion ket panagsarita ti dua a persona, saan kadi?

Dumdumngegka Aya iti Dios?

Kasano a dumngeg ti maysa a tao iti Dios? Kangrunaanna babaen ti panagbasa ken panangyaplikarna kadagiti pannursuro a masarakan iti naisurat a Sao ti Dios nga isu ti Nasantuan a Biblia. (2 Timoteo 3:16; 2 Pedro 1:20, 21) ‘‘Ti tao agbiag . . . iti tunggal sao a rumrummuar iti ngiwat ni Jehova,” kinuna ni Jesus. (Mateo 4:4) Dumdumngegka aya iti Dios babaen ti panangbasam ken panangyaplikarmo iti naisurat a Saona?

Dagidiay kanayon a makikomunikar ken Jehova ket makagun-odda ti anamongna ken sagrapenda “ti talna ti Dios a mangringbaw iti isuamin a panunot.” (Filipos 4:6, 7; Proverbio 1:33) Addaanda met iti namnama nga agbiag nga agnanayon iti paraiso a daga, nga awanan iti amin a pakadanagan ken panagsagaba a mapaspasarantayo itatta. (Salmo 37:29; Juan 17:3) Anian a nakaskasdaaw dagiti masagraptayo a gunggona no ikagumaantayo nga usaren iti kasayaatan a pamay-an ti milagro ti pannakikomunikar dagiti adda panunotda a parsua!

[Ladawan iti panid 10]

Ti pannakikomunikar iti Dios ramanenna ti panagbasa iti Biblia ken panagkararag