“Tawen ti Biblia”

Idiay Alemania, Austria, Francia, ken Switzerland, naituding ti tawen 2003 a “Tawen ti Biblia.” Kastoy ti kinuna ti Aleman a periodiko a Frankfurter Allgemeine Zeitung: “Kas iti damo ken ti kaudian a pannakaselebrarna idi 1992, kalat [dagiti relihion] nga ad-adda a pagbalinenda nga interesado dagiti tattao iti daytoy ‘libro ti biag’ ken ipaganetget ti kinapateg dagiti Nasantuan a Kasuratan iti kultura.”

Sigun iti Hunio 2002 a Bibelreport, dagiti paset ti Biblia ket naipatarusen iti 2,287 a lenguahe. Sigun kadagiti pattapatta, agarup lima a bilion a Biblia ti naibunongen. Dagita a nagdadakkel a panagregget ti nalawag a mangipakita iti panangipateg ti tattao iti daytoy a libro.

Iti kaaldawantayo, mabalin a di patien ti kaaduan a tattao a praktikal ti Biblia. Kinapudnona, adu ti mamati a dagiti pagalagadan iti Biblia ket inuugma ken din maibagay kadagiti agdama a kasasaad ti biag. Ngem babaen ti Tawen ti Biblia, namnamaen dagiti relihion idiay Alemania a dua ti magapuananda​—maparegtada ti tattao nga ad-adda nga agbiag a maitunos iti Biblia ken maparayrayda ti interes dagidiay immikay iti relihionda.

Ti panangungpot iti Biblia ket naisangsangayan a gapuanan, ngem sigurado nga epektibo dayta tapno maawatantayo dagiti kangrunaan a kababagas ti Kasuratan. Nupay kasta, no kayat ti maysa a tao ti mabenepisiaran unay iti Biblia, rumbeng a laglagipenna ti nadakamat iti 2 Timoteo 3:16, 17: “Amin a Kasuratan impaltiing ti Dios ken makagunggona iti panangisuro, iti panangtubngar, iti panangpalinteg iti bambanag, iti panangdisiplina iti kinalinteg, tapno ti tao ti Dios naan-anay koma a makabael, naan-anay a nakabalan maipaay iti tunggal naimbag nga aramid.”

Kastoy ti nasao ti Aleman a dumadaniw a ni Johann Wolfgang von Goethe (1749-1832): “Patiek nga ad-adda a makapainteres ken makaay-ayo ti Biblia no ad-adda a maawatan ti maysa a tao.” Kinapudnona, iti laeng Sao ti Dios a maammuantayo ti nainkalintegan a pannakailawlawag ti nagtaudantayo, no apay nga addatayo ditoy, ken no ania ti masakbayantayo!​—Isaias 46:9, 10.

[Picture Credit Line iti panid 31]

Manipud iti libro a Bildersaal deutscher Geschichte