Manipud Kadagiti Agbasbasa

Panagbalangkantis ti Ubbing Kurang ti sasao tapno mayebkasko ti panagyamanko gapu iti serye a “Panagbalangkantis ti Ubbing​—Nakalkaldaang a Kinapudno.” (Pebrero 8, 2003) Imbutaktak daytoy a serye a naan-anay a makarimon dayta a parikut. Patiek a rumbeng a mayimprenta manen dayta kadagiti nakomersialan a pagimprentaan tapno maammuan ti ad-adu a tattao ti kaadda daytoy a kita ti panangadipen.

M. K., Czech Republic

Siria Pagyamanan iti artikulo a “Siria​—Ikallingagna ti Makapainteres a Napalabas.” (Pebrero 8, 2003) Kinapudnona, saanak a pulos nga interesado iti historia. Ngem nakatulong kaniak daytoy nga artikulo tapno mailadawanko ti nadumaduma a dalan ken siudad a napanan idi ni apostol Pablo. Makatulong kadakami ti impormasion a kas iti dayta tapno lumawa ti pannakaammo ken pannakaawatmi kadagiti kasasaad a masapul a sarangten idi dagiti adipen ti Dios.

T. S., Estados Unidos

Panagtalinaed a Nasalun-at Kayatko ti agyaman iti amin a singasingyo maipapan iti panagehersisio ken panagpakuttong a naipablaak iti “Panangmatmat iti Lubong.” Ti kangrunaan nga apresiarek isut’ ababa a damagna a “Panagtalinaed a Nasalun-at.” (Pebrero 8, 2003) Naammuak a makatulong uray ti apagbiit a panagehersisio tapno sumalun-at ti maysa a tao. Makaparegta daytoy kaniak agsipud ta nagbiitak a mabannog gapu iti agas a tomtomarek isu nga agehersisioak laeng iti apagbiit. Pagyamanan iti daytoy a singasing maipapan iti kinasalun-at.

G. P., Estados Unidos

Dagiti Crossword Puzzle Kayatko ti agsurat iti ababa tapno agyaman unay kadakayo gapu iti panangimaldityo kadagiti crossword puzzle iti magasinyo. Talaga a magustuak unay ida! Makapainteres, makaisuro, ken makatulong kaniak nga agrelaks iti ngudo ti aldaw.

J. G., Estados Unidos

Kaay-ayok a sungbatan dagiti crossword puzzle, ket idi rinugianyo nga impablaak dagitoy iti Agriingkayo!, segseggaakon dagitoy. Idi damo, nasken a kitaek ti kaaduan a teksto, ngem masungbatakon ti adu a diak aramiden ti kasta! Nagbanaganna, nagadun ti nasursurok a teksto ken karakter iti Biblia.

E. G., Estados Unidos

Pakaammo ti “Agriingkayo!”: Iti dadduma a lenguahe, ti pannubok nga ‘Ammoyo Kadi?’ ti sandi ti crossword puzzle.

Panagisem Isem ti birngas idi kaniak ti pamiliak ken gagayyemko. Inikkandak pay ketdi iti retratok a nasuratan iti: “No adda makitam a saan a nakaisem, isemam man.” Nupay kasta, talaga a nagleddaangak gapu kadagiti trahedia a nabiit pay a napasamak iti pamiliak. Ti artikulo a “Ti Bileg ti Isem” (Enero 22, 2003) ti nangbalbaliw iti panangmatmatko. Ita, mabalinko manen a paragsaken dagiti tattao babaen ti panagisemko. Agyamanak ken Jehova ta us-usarenna daytoy nga artikulo tapno tulongannak a mangbalbaliw iti panangmatmatko.

O. F., Nigeria

Basura Iti serye a “Basura​—Gaburannatayto Aya?” (Agosto 22, 2002), dinakamatyo ti pattapatta ti maysa nga asosasion idiay Italia a maseknan iti aglawlaw maipapan iti kapaut ti pannakarunot ti nadumaduma a banag a maibasura iti baybay. Patiek a di umiso ti pattapattada a 500 a tawen ti kasapulan sakbay a marunot dagiti lata. Iti naambal a danum ti Pelican Island National Wildlife Refuge idiay Florida, napaliiwko nga adu nga aluminum ken lata ti marunot ken agbalin a pulbo no baddekak dagitoy babaen iti sapatosko. Agsangapulo a tawen pay laeng dagitoy a lata​—nalabit ab-ababa pay. Kas iti ammo ti asinoman nga addaan iti aluminum a barangay, ti naapgad a danum runawenna ti aluminum.

S. S., Estados Unidos

Sungbat ti “Agriingkayo!”: Agpayso a kalkalainganna nga amang ti dadduma a pattapatta. Nupay kasta, sigun iti “Elements of Marine Ecology,” da R. V. Tait ken F. A. Dipper, mabalin a 80 agingga iti 100 a tawen ti kasapulan sakbay a marunot ti aluminum ken 50 agingga iti 100 a tawen kadagiti lata. Mabalin a nabibiit a marunot dagiti maang-anginan a metal a lata ngem kadagidiay adda laeng iti uneg ti danum.