Manipud Kadagiti Agbasbasa

Malnutrision Interesadoak unay a nangbasa iti serye a “Malnutrision​—‘Ti Di Madmadlaw a Pakarigatan’” (Pebrero 22, 2003) Ditoy Japan, saanmi unay a parikut dayta isu a nasdaawak unay iti nabasak. Sapay koma ta ad-adda pay a maikasaba ti naimbag a damag ti Pagarian ti Dios iti ad-adu a tattao nga agsagsagaba iti kastoy a parikut.

Y. T., Japan

Dagiti Music Video No dadduma, makaawatak kadagiti magasinyo manipud iti am-ammok a maysa kadagiti Saksi ni Jehova. Nagsayaat ti pannakaisurat ti artikulo nga “Agimtuod Dagiti Agtutubo . . . Rumbeng Aya nga Agbuyaak Kadagiti Music Video?” (Pebrero 22, 2003) Talaga nga espesipiko ken impalgakna dagiti nalmeng a peggad iti moderno a musika.

M. M., Japan

Idi naawatko ti artikulo, dagus a binasak dayta. Nagadu a gagayyemko ti agbuybuya kadagiti music video, ket kaay-ayoda a pagsasaritaan dagita. Nakatulong kaniak ti artikulo tapno diak masulisog nga agbuya kadagitoy. Sangapulo ket dua ti tawenko, ket dimteng ti artikulo iti umiso a tiempo.

K. W., Estados Unidos

Talaga a nagustuak ti artikulo. Maysaak nga amin-tiempo nga ebanghelisador ket ammok a nasken nga agbalinak a mapagwadan iti dadduma pay nga agtutubo. Isu a no damagendak dagiti agtutubo no apay a diak binuya ti maysa a music video, mabalinko itan nga ibaga a diak ngamin kayat a dadaelen ti relasionko ken Jehova. Pangngaasiyo ta itultuloyyo ti agimaldit kadagiti makaisuro a serye ti “Agimtuod Dagiti Agtutubo . . .”

R. B., Estados Unidos

Dandanin 21 ti tawenko ket kaay-ayok ti agbuya kadagiti music video. Nupay kasta, husto ti imbagayo a makaimpluensia dagitoy a video kadagiti agbuybuya. Masansan a kaay-ayo dagiti agtutubo a denggen ti maysa a kita ti musika gapu iti tono wenno kompasna ngem dida an-anagen dagiti lirikona, nangruna no ganggannaet ti lenguahena. Masansan nga ipalgak dagiti video ti mensahe a talaga nga iyallatiw ti musika. No dadduma, maklaatak a mangbuya iti video ti maysa a kanta nga impagarupko idi a napintas! No adda mabuyak a naalas a video, iyakarko iti sabali a channel ket pulos a diakton denggen dayta a kanta.

T. G., Francia

Dagiti Wildebeest Talaga a nagustuak ti artikulo a “Ti Naisangsangayan nga Iyaakar.” (Pebrero 22, 2003) Kaay-ayok dagiti animal, ket no dumteng ti baro a ruar ti Agriingkayo!, ti umuna nga aramidek ket basaek dagiti artikulo maipapan kadakuada. Nasdaawak a nangbasa a no agpeggad ti kabaian a wildebeest, kabaelanna nga itantan ti panagpasngayna sananto ituloy iti nataltalged nga oras ken disso! Pangngaasiyo ta itultuloyyo ti agipablaak kadagitoy nagpipintas nga artikulo.

K. R., Italia

Di Mapakawan a Basol Agyamanak unay ken Jehova ken kadakayo gapu iti artikulo a “Ti Panangmatmat ti Biblia: Adda Aya Di Mapakawan a Basol?” (Pebrero 8, 2003) Nabayagen nga agbirbirokak iti kasta nga impormasion. Ikagkagumaak idi a tarusan ti Hebreo 10:26, ket impagarupko no agaplikar laeng dayta iti 144,000, a mapan idiay langit. Pagyamanan iti panangilawlawagyo iti daytoy.

R. A. P., Ghana

Siria Talaga nga apresiarek ti nagpaiduma nga estilo ti pannakaisurat ti artikulo a “Siria​—Ikallingagna ti Makapainteres a Napalabas.” (Pebrero 8, 2003) Gapu ta interesadoak unay iti historia ken geograpia, natakuatak a makapainteres nga inaig dagiti teksto ti Biblia iti eksakto a lugarna iti mapa. Sapay koma ta agipablaakkayo iti dadduma pay nga artikulo a kas iti dayta.

M. P., Francia

[Picture Credit Line iti panid 30]

UN/DPI Rinetrato ni Eskinder Debebe