Panangdaer Kadagiti Layus Idiay Caucasus

I-PLAY

Panangdaer Kadagiti Layus Idiay Caucasus

BABAEN TI MANNURAT TI AGRIINGKAYO! IDIAY RUSSIA

ITAY napan a tawen iti makin-amianan a rehion ti Caucasus sadi Russia, dua laeng nga aldaw nga imbayakabakna ti gagangay nga itudona koma iti tallo a bulan. Immapaw ti adu a karayan. Immapres met unay uray ti babassit a waig a nangyanud iti amin nga adda iti pagayusanda. Nadadael dagiti dam, ket narba ti nagadu a balbalay ken dadduma pay nga estruktura. Kellaat a naawanan iti balbalay ti rinibu nga umili. Natay ti adu kadagiti saan a dagus a nakapanaw kadagiti balayda. Dadduma ti awanan gaway a nangbuya lattan iti pannakayanud dagiti ay-ayatenda kadagiti napegges nga ayus.

Iti siudad ti Nevinnomyssk, inkagumaan ti maysa a pamilia ti pumanaw babaen ti traktorada. Nupay kasta, adda nagdakkel a dalluyon a nangiburang-it iti traktora, isu a natay ti intero a pamilia. Natay ti dadduma bayat nga al-alawenda ti sabsabali pay. Sigun kadagiti opisial a pattapatta, 335,000 a tattao ti naapektaran kadagiti layus. Kadagitoy, nasurok a 200 ti natay ken adu ti saanen a nasarakan pay.

Nalipus ti pinullo a ribu a balbalay. Nadadael dagiti tubo ti danum ken kanal. Gapu iti naapres a layus, nakurukor uray ti nakaitabonan dagiti bangkay, agraman dagiti animal a natay gapu iti anthrax isu a timpaw dagitoy. Mapattapatta nga agarup 16 a ribu a milion a ruble, wenno agarup 500 a milion a doliar ti E.U., ti nadadael gapu iti layus.

Nakalkaldaang a buyaen daytoy nagpintas ken nadam-eg idi a daga, a masansan a mayaramidan kadagiti kanta ken daniw! Nupay kasta, ti didigra dina dinadael ti pudno nga ayat iti pada a tao.

Dagus a Naipaay ti Tulong

Idi damo, awan ti danum nga inumen, koriente, gas, wenno telepono. Awan ti komunikasion dagiti tattao. Nasurok a 3,000 a Saksi ni Jehova ti agnanaed iti naapektaran a lugar, nasurok a 700 idiay Nevinnomyssk ken iti asidegna. Isu nga idi nagsaknap ti damag maipapan iti layus, nangbuangay dagiti Saksi kadagiti espesial a pang-emerhensia a komite a mangasikaso kadagiti naapektaran. Nagtrabaho dagitoy a komite uray pay sakbay a dimteng dagiti para alaw ti gobierno.

Iti bassit nga ili ti Orbelyanovka, agarup 60 a kilometro iti abagatan a daya ti Nevinnomyssk, kellaat a naglayus. Walo a tattao, agraman ti dua a babbai a Saksi ti nagkamang iti tapaw ti bassit a turod. Ngem kasta met ti inaramid dagiti babassit nga animal ken adu nga uleg. Nagbanaganna, agpatnag nga inkagumaanda a paksiaten dagiti kumagat nga uleg.

Kabigatanna, impamuspusan dagiti Saksi iti dayta a lugar nga alawen ti dua a Kristiano a kakabsatda a babbai. Kamaudiananna, sakbay a mumalem, adda nasarakanda a bassit a goma a bilog. Ngem sakbay nga inalawda dagiti kakabsat a babbai, inusar dagiti Saksi ti bilog tapno alawenda ti maysa a paralisado a lakay. Kalpasanna, bayat nga al-alawenda dagiti kakabsat a babbai, dimteng ti maysa a helikopter a nangalaw iti dadduma pay a tattao iti turod.

Idi mumalmalemen, agal-alaw pay laeng dagiti Saksi iti dadduma pay babaen ti bilog. Idi sinaludsod dagiti Saksi, “Am-ammodakami aya?” simmungbat dagiti tattao: “Siempre, taga Ministry of Emergency Situations-kayo.” Nasdaawda ta saan gayam.

Gimmatang dagiti Saksi idiay Nevinnomyssk iti mayakar-akar a kosina a nangisaganaanda iti kalluto a taraon para kadagiti agkasapulan. Saan laeng a taraon ti intulodda no di ket uray met ti danum, kawes, ken agas. Dinalusan met ti adu a grupo dagiti Saksi a boluntario ti balbalay sada dinalusan ti nagadu a wara kadagiti arubayan.

Inusar ti negosiante a Saksi nga agassawa idiay Zelenokumsk ti luganda tapno maibiaheda ti danum, taraon, ken kawes, a pinakiawda iti tiendaan. Idi dinamag dagiti am-ammo ti asawa a babai no pangtedanna kadagiti ginatangna, inlawlawagna nga itedna dayta kadagiti nadidigra a kapammatianna. Gapu ta natignayda iti asina, kayatda met ti tumulong. Maysa a negosiante a babai ti nangted iti sangasako a pansit, adda nangted iti dakkel a sangapakete a sabon, ken sinako nga asukar ti inted ti dadduma.

Tulong a Naggapu Kadagiti Adayo a Lugar

Gapu ta kayat a maammuan ti adu a Saksi idiay Russia no kasano a matulonganda dagiti biktima ti layus, adda nayurnos nga espesial a pondo tapno maipatulod ti tulong kadagiti agkasapulan. Timmulong uray dagiti boluntario a trabahador iti Sentro Administratibo dagiti Saksi ni Jehova idiay Russia, nga adda iti asideg ti St. Petersburg. Gimmatang ti dadduma kadagiti baro nga aruaten para kadagiti biktima ti layus. Kastoy ti inlawlawag ti maysa kadakuada: “Intedko dagiti kasayaatan nga aruatek agsipud ta addaanak, idinto ta dagiti kakabsattayo ket awananda iti aniaman.”

Sinuratan met ti Sentro Administratibo ti agarup 150 a kongregasion dagiti Saksi ni Jehova idiay St. Petersburg ken Moscow. Nailawlawag no kasano a makapagdonar dagiti kakabsat iti kuarta, taraon, ken kawes. Nupay saan unay a narang-ay ti ekonomia ti Russia ken saan a nabaknang ti kaaduan kadagiti Saksi, nagdonarda a sipaparabur. Dayta ti mangipalagip iti kinamanagparabur dagiti napanglaw a Kristiano idiay Macedonia kadagiti agkasapulan idi a kakabsatda idiay Judea.—2 Corinto 8:1-4.

Kalpasan a naklaseklase dagiti naidonar a banag kadagiti sentro a pagurnongan, nailugan dagitoy iti adu a trak sada naipan iti lugar a nadidigra. Malaksid kadagitoy naidonar a banag, gimmatang ti Sentro Administratibo iti sangapulo a tonelada a taraon, 500 a set ti kubrekama, ken produkto a pagdalus, agraman dagiti remienta ken pagtrabaho a kawkawes a mausar iti panagdalus kalpasan ti didigra. No dagupen, innem a saglilimapulo a tonelada a trak ti nangitulod kadagiti pangsaranay a suplay iti makin-amianan a rehion ti Caucasus.

Nangipaay iti Pammaneknek ti Kinamanagparabur

Nakadkadlaw ti trabaho dagiti Saksi kabayatan ti panagdalus iti lugar a nadidigra. Usigem ti maysa a kasasaad iti napintas a pagayuyangan idiay siudad ti Kislovodsk, nga ayan ti nasurok a 300 a Saksi. Nagboluntarioda a tumulong iti administrasion ti siudad isu a naibaonda nga agdalus iti maysa a lugar.

Idi Hunio 28 iti alas otso ti agsapa, agarup 150 a Saksi, agraman dagiti intero a sangapamiliaan, ti nangitugot kadagiti pagdalusda sada nagtataripnong sakbay a nagtrabahoda. Dadduma ti nagbakasion manipud iti trabahoda uray no awan sueldoda, tapno tumulongda iti panagdalus. Di nagbayag, adda simmangpet a kotse, sa rimmuar ti umuna a bise mayor. “Asino dagitoy a tattao?” inyimtuodna.

“Saksi ni Jehova-da,” naibaga kenkuana. “Immayda tapno dalusanda ti siudad kalpasan ti didigra.”

Gapu ta nasdaaw iti nakitana a kinaadu ti tao, kinuna ti bise mayor, “Nagsayaat man! Pagyamanan! Nagsayaat daytoy nga ar-aramidenyo!”

Kalpasanna, sakbay unay ti pangngaldaw, adda simmangpet a sabali pay nga opisial ti siudad. Rimmuar iti luganna, sana inasitgan dagiti Saksi. “Palpaliiwenmi ti trabahoyo, ket talaga a masmasdaawkami,” kinunana. “Ita pay laeng a nakakitakami kadagiti tattao nga agtartrabaho a kas iti ar-aramidenyo. Nagadun ti naaramidanyo!”

Agarup iti isu met la nga oras, nagsardeng ti maysa a magmagna a baket sana inyimtuod, “Apay a sisasaet nga agtartrabaho dagitoy a tattao?” Idi naibaga kenkuana a dagiti Saksi ni Jehova ket tumultulong iti siudad, uray la a nakalua. “Dakayo dagiti pudno a manamati,” kinunana. “Agminar ti pudno a kinatao no dumteng ti didigra.” Kinuna ti maysa pay a babai: “Nagsayaat ketdin ti ar-aramidenyo! Nabayagen a diak nakakita iti kasta.”

Kabigatanna, pinadayawan ti periodiko a Na Vodakh iti dayta a lugar dagiti Saksi ni Jehova babaen ti panangipadamagna nga inikkat dagiti Saksi ti nasurok a 100 a tonelada a lan-ak manipud iti siudad. Dagiti Saksi ni Jehova ket sinuratan dagiti opisial iti siudad ti Kislovodsk tapno agyamanda. Kastoy ti kinunada: “Pimmintas manen ti siudad gapu iti di magatadan a tulongyo . . . Sigurado a ti panagyaman ti nagadu a sangaili iti siudadtayo ti kasayaatan a gunggonayo.”

Nupay nagadu ti napukaw ken nadadael gapu iti natural a didigra a nangapektar iti makin-amianan a rehion ti Caucasus, naragsakan dagiti Saksi ni Jehova a nangipakita iti ayat kadagiti kapammatian ken padada a tattao. Dayta ti nangyeg a nangnangruna iti rag-o kadakuada agsipud ta ammoda a dagita a pakakitaan ti panagayat ket pakaidayawan ti Namarsua kadatayo a ni Jehova.

[Dagiti Mapa iti panid 16]

(Para iti aktual a pannakaurnosna, kitaem ti publikasion)

Black Sea

CAUCASUS MOUNTAINS

Nevinnomyssk

Orbelyanovka

Zelenokumsk

Kislovodsk

Caspian Sea

[Credit Line]

[Ladawan iti panid 17]

Ginatang dagiti Saksi daytoy mayakar-akar a kosina sada nangisaganaan iti taraon para kadagiti agkasapulan

[Ladawan iti panid 17]

Inusar daytoy a Saksi ti lugan ti pamiliana a pagitulod iti taraon ken suplay

[Ladawan iti panid 18]

Dagiti opisial ti Kislovodsk kinomendaranda dagiti Saksi gapu ta timmulongda a nangpapintas manen iti siudadda

AGRIINGKAYO!