Ti Kadakkelan a Bukel iti Lubong

Adu a tawen ti napalabasen, idi adda naisangsangayan a dakkel a bukel a naisadsad iti isla ti Maldives ken Indonesia, naginteresan unay dagiti tattao daytoy. Nagwaras dagiti sarsarita maipapan iti nagtaudanna. Impagarup ti dadduma a nagtaud dayta iti kayo nga adda iti uneg ti baybay. Dayta ti gapuna a napanaganan iti Coco-De-Mer, wenno niog iti baybay. Namatida pay a dayta ti naiparit a bunga a kinnan ni Adan iti minuyongan ti Eden. Ngem naammuan met la ti kinapudno idi ngalay ti maika-18 a siglo. Daytoy misterioso a bukel ket naggapu iti maysa a kita ti palma a masarakan laeng iti Seychelles a maysa a bassit a grupo dagiti isla iti Taaw Indiano.

Masarakan ti kaaduan a Coco-De-Mer iti Vallée de Mai, iti isla ti Praslin. Mabalin nga agtayag pay dagitoy a palma iti 30 a metro ket mapattapatta nga agbiag iti ginasgasut a tawen. Makapainteres a maammuan nga adda kalalaki ken kababai kadagiti Coco-De-Mer. Tapno agbalin a nabunga ti kababai, masapul nga adda kalalaki a Coco-De-Mer. Isu a masapul nga adda kalalaki ken kababai iti gagangay a pagtubuanda tapno agbiagda.

Talaga a naisalsalumina ti bunga ti kababai a Coco-De-Mer. No adda iti kayo, kasla nagdakkel ken berde a sinan-puso. Ngem iti unegna, adda dakkel a singin a bukel a mabalin nga agtimbang agingga iti 20 a kilo. Saan a maymaysa ti bukel ti dadduma a bunga. Di ngarud pakasdaawan a naipablaak ti Coco-De-Mer iti The Guinness Book of Records nga addaan kadakkelan a bukel iti intero a lubong.

Masdaawka la ketdi iti daytoy nakaskasdaaw a parsua no matmatam dagiti rinaay a bungana a kasla dakkel a bato. Mabalin met nga agpeggad ti maysa a tao iti dayta. Mabalin nga agtimbang iti 180 a kilo dagitoy a rinaay. Ngem nakaskasdaaw ta awan pay ti naipadamag a natay gapu ta natupakan iti bungana. Kaskasdi, nainsiriban no dika agpasiar idiay Vallée de Mai no panagbabagyo. Nasaysayaat nga apresiaren daytoy naisangsangayan a bunga no nasayaat ti paniempo.