Umayyo Denggen ti Palawag Publiko a “Siasino Ita Dagiti Mangidaydayaw iti Dios?”

Kadagiti relihioso, nalabit nakaskasdaaw ti mismo a kapanunotan maipapan iti panangidaydayaw iti Dios. Saan kadi a ti Dios ti Kangatuan a Soberano iti uniberso? Kasano ngarud a mabalin nga idaydayaw ti maysa nga awanan gaway a tao? Posible dayta, ta idagadag kadatayo ti Biblia nga “agbutengkayo iti Dios ket idayawyo.” (Apocalipsis 14:7) Ti maysa a pamay-an a maaramidtayo daytoy ket babaen ti ‘panagdengngegtayo iti sao ti Dios ken panangsalimetmet iti dayta.’ (Lucas 11:28) Kinapudnona, babaen ti panagadaltayo iti Biblia ken panangannurot kadagiti prinsipiona, maidaydayawtayo ti Autorna a ni Jehova a Dios.

Ngem siasino ita dagiti mangidaydayaw iti Dios iti kastoy a pamay-an? Binilion ti agkunkuna a relihiosoda, ngem umdas kadin dayta? Kasanotay a masigurado a makaay-ayo iti Dios ti pamay-an ti panagdayawtayo ken agpaay a pakaidayawanna? Dagitoy a saludsod ket masungbatan iti mamagpanunot a palawag a “Siasino Ita Dagiti Mangidaydayaw iti Dios?” Maidiskurso daytoy a palawag publiko kadagiti kombension distrito dagiti Saksi ni Jehova a mangrugi inton sumaganad a bulan. Ginasut a kasta a kombension ti maangay iti intero a lubong. Tapno maammuanyo ti lugar nga asideg iti pagtaenganyo, makiumankayo kadagiti Saksi ni Jehova iti lugaryo, wenno agsuratkayo kadagiti nangipablaak iti daytoy a magasin.