Langis​—Maibusto Ngata?

“No awan [ti enerhia], saan a makapagandar ti industria . . . Awan dagiti maaramid a kotse, trak, tren, barko wenno eroplano . . . No awan ti enerhia, saan a naimeng ken nalawag ti balbalay, saan a maluto dagiti taraon. . . . No awan dagiti pagtaudan ti enerhia, talaga nga agsublitayo iti tiempo idi un-unana a nagusar dagiti tattao kadagiti alikamen ken igam a naaramid iti bato.”​—Manipud iti “U.S. Geological Survey World Petroleum Assessment 2000.”

KUNAEN dagiti eksperto a mabalin a maibus ti suplay ti langis inton agangay. Pattapattaen ti dadduma a ti langis a reserba ti lubong ket agpaut laengen iti 63 agingga iti 95 a tawen. Kabayatanna, mataktakuatan dagiti baro a pagtaudan ti enerhia, a sumagmamano kadagitoy ti maus-usar iti adun a dekada. Adtoy dagiti pagarigan ti enerhia a mapabaro wenno masukatan a dagus: enerhia nga aggapu iti init, angin, dalluyon, koriente a patauden ti danum, ken nabara nga angin iti taaw. Ngem ti panangpataud ken panangiwaras kadagitoy ti kangrunaan pay laeng a parikut agingga ita.

Talaga a nakalkaldaang a panunoten a sadanto la isardeng ti panangusar iti mapabaro nga enerhia inton naibusen ti di mapabaro a pagtaudan ti enerhia. Sidadaan dagiti kompania ti langis a manggundaway iti limitado kanon a tiempo a pinattapattada a panagpaut ti suplay. Daksanggasat ta adda dagiti pamkuatantayo a mangekspektar nga agpaut pay dagiti parikut iti kagimongan ken iti aglawlaw a nainaig iti langis a kas iti panagpaut ti suplayna. Ngem saan a ti langis a mismo ti ramut dagitoy a parikut. Ti kinaagum ti tao ken ti panagtarigagayna iti pannakabalin ti makagapu a dakes ti pakasarsaritaan ti langis.

Makaparagsak ta ti masakbayan ti langis​—ken kinapudnona, ti amin a pagtaudan ti enerhia​—​ket saan nga agpannuray kadagiti nasion. Kamaudiananna, agpannurayto dayta iti Namarsua ken Manangaywan iti daga a ni Jehova a Dios. Inkarina nga asidegen a mapukaw ti amin a parikut iti aglawlaw ken iti kagimongan a mainaig iti panagusar ken aglablabes a panagusar kadagiti gameng ti daga. (Apocalipsis 4:11) Kas kuna ti Biblia, asidegen a ‘dadaelen ti Dios dagidiay mangdaddadael iti daga.’ Ti nalinteg a panangituray ti Dios agbanagto iti “baro a langit ken baro a daga,” a maysa a lubong nga awan ti managimbubukodan a pananggundaway ken panangirurumen, nga awanan agum a mausar dagiti gameng ti daga nga agpaay a pakabenepisiaran ti intero a natulnog a sangatauan.​—Apocalipsis 11:18; 21:1-4.

[Dagiti Ladawan iti panid 12]

Karaman dagiti alikamen a mangurnong iti enerhia ti init ken makina a paandaren ti angin kadagiti dadduma a pagtaudan ti enerhia