Manipud Kadagiti Agbasbasa

Dagiti Nakaskasdaaw a Sentido Agtawenak iti 15 ken basbasaek dagiti magasinyo sipud pay idi nasursurok ti agbasa. Agyamanak kadagiti serye a “Dagiti Nakaskasdaaw a Sentido iti Biag​—Apresiarem Aya Dagitoy?” (Marso 8, 2003) Nagpintas dagiti artikulo. Pagyamanan iti kinagaget ken panagsirarakyo para iti tunggal ruar ti Agriingkayo! Segseggaak a basaen ti sumaganad a ruar!

H. S., Estados Unidos

Daytoy a serye ti talaga a nangipaamiris kaniak no kasano ti kinakomplikadotayo. Nasdaawak a nakaammo a madlaw ti murdong ti ramay ti tao ti tulnek a tallo laeng a mikrometro ti kapuskolna! Talaga a maseknan ni Jehova kadagiti pinarsuana ta diniseniona a naimbag dayta bassit a banag.

E. R., Australia

Kastila a Martir Naimpusuan nga agyamanak iti artikulo a “Maysa a Lalaki nga Inkeddengna ti Agserbi iti Dios.” (Marso 8, 2003) Nagustuak a binasa no kasano a nagtalinaed a natarnaw ni Antonio Gargallo, nga agtawen laeng idi iti 19 ken nabiit pay a nabautisaran kas maysa a Kristiano, idi kellaat a rumbeng a mangaramid iti nagpateg a desision. Dayta ti nangipaamiris kaniak no kasano a pabilgen ken ikkannatayo ni Jehova iti talna ti panunot no determinadotayo a mangaramid iti pagayatanna.

M. T., Italia

Pagyamanan unay iti daytoy ababa ngem makapikapik a kapadasan. Nakasangitak idi binasak dayta. Nangnangruna a natukayak iti insurat ni Antonio Gargallo ken ni nanang ken adingna sakbay a napapatay. Pangngaasiyo ta itultuloyyo ti agsurat maipapan kadagiti Kristiano a nangtaginayon iti kinatarnawda ken Jehova uray no naipasangoda ken patay tapno mapabileg ti pammatimi.

R. O., Nigeria

Dagiti Sapatos Pagyamanan iti artikulo a “Talaga Aya a Komportable Dagiti Sapatosmo?” (Marso 8, 2003) Nasuroken a 30 a tawen nga agsaksakit dagiti sakak ken namin-adun a naopera dagiti ramay ti sakak nupay saan met ketdi a grabe. Natakuatak met laengen a medio dakdakkel gayam ti maysa a sakak ngem iti maysa. Gapu ta adun a tawen a saan nga umiso ti rukod dagiti us-usarek a sapatos, kasapulan itan nga agsapatosak iti nadisenio nga agpaay kadagiti adda depekto ti tulang ken susuopda.

R. G., Estados Unidos

Nagsayaat dayta nga artikulo. Nupay kasta, saanyo a dinakamat a no mumalemen ti kasayaatan nga oras ti pananggatang iti sapatos, ta kadawyanna a dimmakkelen dagiti saka.

A. W., Canada

Sungbat ti Agriingkayo!: Pagyamanan iti kapaliiwanyo. Pangngaasiyo ta kitaenyo ti ababa a padamag iti “Panangmatmat iti Lubong” a napauluan iti “Saksakit a Nainaig Kadagiti Sapatos,” iti ruarmi nga Agosto 8, 1999.

Panagkusit Kayatko ti agyaman iti artikulo nga “Agimtuod Dagiti Agtutubo . . . Ania ti Pagdaksan ti Panagkusit?” (Enero 22, 2003) Maysaak nga estudiante iti unibersidad ken nairuamak nga agkusit sipud pay idi addaak iti maikalima a grado. Kanayon idi a pampanunotek no husto met laeng ti agkusit, ngem awan ti masarakak a sungbat. Talaga a nakapatpateg daytoy nga artikulo. Agbalbaliwakon mangrugi iti sumaganad nga eksamenko a madama ita a reprepasuek.

S. Y., Ukraine

Panagbalangkantis ti Ubbing Pagyamanan iti serye a “Panagbalangkantis ti Ubbing​—Nakalkaldaang a Kinapudno.” (Pebrero 8, 2003) Nangruna a nagustuak ti kinapudno a nupay nasaem ti topiko, naikkan iti namnama dagiti biktima. Dagiti nailanad a kapadasanda ti nangyanninaw iti mismo a kapadasak. Ipakitana nga uray iti daytoy daan a sistema, mabalin nga aglunit dagiti sugat ti nakaro a pannakadidigra babaen ti tulong ni Jehova.

P. R., Alemania