Minilion ti Tumabuno​—Addakayto Aya Sadiay?

◼ SADINO? Iti maysa kadagiti “Idayawyo ti Dios” a Kombension Distrito a maang-angay iti ginasut a lugar iti intero a lubong. Ti tallo nga aldaw a programa nga inyurnos dagiti Saksi ni Jehova ket naisagana a tumulong iti amin a mangay-ayat iti Dios nga agbiag iti wagas a makaipaay iti dayaw a maikari iti Namarsua kadakuada.

Ti umuna nga aldaw ti kombension ket naipamaysa iti tema a “Maikarika Jehova, . . . nga Umawat iti Dayag.” (Apocalipsis 4:11) “Dagiti Parsua Ipaduyakyakda ti Dayag ti Dios” ti paulo ti palawag a makatulong kadatayo a mangtarus no kasano a dagiti kalidad ni Jehova ket “silalawag a makita,” wenno ‘matarusan babaen iti bambanag a naaramid.’ (Roma 1:20) Ti makaparegta a pannakatema a palawag a “Dagiti Nadayag a Naimpadtuan a Sirmata Gutugotendatayo!,” ti manggutugot kadatayo amin a manglaglagip a kanayon kadagiti nakapatpateg a pasamak a naipadto iti Sao ti Dios nga agpaay iti kaaldawantayo. “Ti Padto ni Amos​—Ti Mensahena Para iti Kaaldawantayo” ti paulo ti nagkatlo a paset a simposium a mangipaganetget iti kinapateg ita dagidi a pakdaar ni Amos. “‘Ti Nasayaat a Daga’​—Panirpatan iti Paraiso” ti mangpauneg iti panangapresiartayo iti lugar nga inted ni Jehova iti ilina idi un-unana.

Ti maikadua nga aldaw ti kombension ket natemaan iti “Ti Dayagna Ideklarayo Kadagiti Nasion,” a naibasar iti Salmo 96:3. Ti simposium a napauluan iti “Iyanninawtayo ti Dayag ni Jehova a Kasla Kadagiti Sarming” ket karaman kadagiti maitampok. Daytoy nagkatlo a paset a presentasion ti mangilawlawag no kasano a sieepektibo a maitungpaltayo ti ministeriotayo. Ti palawag a “Magurgura nga Awan Gapgapuna” ket sarunuen ti palawag ti dedikasion ken bautismo​—a paset iti amin a kombension dagiti Saksi ni Jehova. Iti malem, ti palawag nga “Agannadkayo iti ‘Timek Dagiti Ganggannaet’” ti mangted iti naintiempuan a pammagbaga maipapan kadagiti “ulbod a mannursuro” a mangpadpadas a mangallilaw iti ili ti Dios babaen kadagiti “parparbo a sasao.” (2 Pedro 2:1, 3) “Dagiti Annaktayo​—Napateg a Tawid” ti mangserra iti programa iti dayta a malem. Naragsakto dayta nga okasion kadagiti nagannak agraman kadagiti ubbing.

Ti maudi nga aldaw ti kombension ket natemaan iti “Aramidenyo ti Amin a Bambanag a Maipaay iti Dayag ti Dios.” (1 Corinto 10:31) Adda agsasaruno nga interbiu a naipakuyog iti palawag a napauluan iti “No Kasano nga Idaydayaw Dagiti Agtutubo ni Jehova.” Nairaman met iti sesion iti agsapa ti 45 a minuto a drama a napauluan iti “Situtured a Panangsaksi iti Laksid ti Ibubusor.” Yantangay ti relihion ket masansan a linaon ti damdamag, ti palawag publiko ti mangsungbat iti saludsod a, “Siasino Ita Dagiti Mangidaydayaw iti Dios?” Ti palawag nga “‘Agtultuloykayo a Mangpataud iti Adu a Bunga’ a Pakaidayawan ni Jehova” ti mangipaay iti makaparegta a panagngudo iti kombension.

Dagitoy ti sumagmamano laeng kadagiti makaparegta a presentasion a mangngegan iti “Idayawyo ti Dios” a Kombension Distrito dagiti Saksi ni Jehova. Sigurado a kayatyonto a tabunuan ti amin a tallo nga aldaw. No kayatyo a maammuan ti kombension nga asideg kadakayo, makiumankayo iti Kingdom Hall dagiti Saksi ni Jehova iti lugaryo wenno agsuratkayo kadagiti mangipabpablaak iti daytoy a magasin.