Ti Panangmatmat ti Biblia

No Saanmo a Kapammatian Dagiti Ay-ayatem

SIGUN iti maysa a pattapatta, adda nasurok a 10,000 a relihion ken sekta iti lubong. Iti maysa a pagilian, agarup 16 a porsiento kadagiti nataengan ti immakar iti sabali a relihion iti maysa a tiempo iti panagbiagda. Di ngarud pakasdaawan nga agsusupadi dagiti narelihiosuan a pammati ti agkakabagian ken aggagayyem. No dadduma, maapektaran dagiti relasion gapu iti dayta. Isu a ti saludsod ket, Kasano ti maiparbeng a panangtrato dagiti Kristiano kadagiti ay-ayatenda a dida kapammatian?

Naisangsangayan a Relasion

Usigem kas pagarigan ti ibagbaga ti Biblia maipapan iti naisangsangayan a relasion dagiti nagannak ken annakda. Saan a limitado a tiempo ti ipasimudaag ti bilin iti Exodo 20:12 a “dayawem ni amam ken ni inam.” Kinapudnona, idi sarsaritaen ni Jesus daytoy a bilin, a naisurat iti Mateo 15:4-6, nabatad a tuktukoyenna ti dayaw nga ipaay dagiti nataengan nga annak kadagiti dadakkelda.

Mamakdaar ti libro ti Biblia a Proverbio maipapan iti di panagraem kadagiti nagannak. Mamalakad  ti Proverbio 23:22 a rumbeng a “saanmo nga umsien ni inam gapu laeng ta bimmaketen.” Nalawag nga ipakdaar ti Proverbio 19:26 a daydiay “mangirurumen iti ama [ken] mangabug iti ina ket maysa nga anak nga agtigtignay a nakababain ken nakaal-alas.”

Nabatad nga ibagbaga dagiti Kasuratan a rumbeng a ditay baybay-an ti dadakkeltayo. Saan a mawaswas ti relasiontayo kadagiti dadakkeltayo uray no dida akseptaren ti relihiontayo. Agaplikar met dagitoy a prinsipio iti Biblia iti dadduma pay a kabagian agraman iti asawa ti maysa a tao. Nalawag nga adda moral ken Nainkasuratan a rebbengen dagiti Kristiano nga ayatenda ti kakabagianda.

Nasken ti Kinanainkalintegan

Siempre, mamakdaar ti Biblia maibusor iti dakes a pannakitimpuyog, ket mabalin nga agtaud daytoy kadagiti asideg a kabagian. (1 Corinto 15:33) Adu a matalek nga adipen ti Dios idi un-unana ti nangitandudo iti umiso nupay kimmontra ti dadakkelda. Nabatad a kastoy ti napasamak kadagiti annak ni Kore. (Numeros 16:32, 33; 26:10, 11) Rumbeng a di ikompromiso dagiti Kristiano ti pammatida tapno maay-ayoda laeng ti sabsabali, uray pay no kabagianda ida.​—Aramid 5:29.

Iti dadduma a kasasaad, busoren unay dagiti nagannak wenno dadduma nga ay-ayaten ti pammati ti maysa a Kristiano. Dadduma ti agbalin pay ketdi a kabusor ti pudno a Kristianidad. Kadagita a kasasaad, agaramid dagiti Kristiano kadagiti nainkalintegan a pamuspusan tapno masalakniban ti espiritualidadda. Maitutop a kinuna ni Jesus: “Dagiti kabusor ti maysa a tao isudanto dagiti tattao iti bukodna a sangakabbalayan. Ti addaan dakdakkel a panagayat iti ama wenno ina ngem kaniak saan a maikari kaniak; ket ti addaan dakdakkel a panagayat iti anak a lalaki wenno anak a babai ngem kaniak saan a maikari kaniak.”​—Mateo 10:36, 37.

Ngem kaaduanna, saan nga aglak-am dagiti Kristiano iti nakaro nga ibubusor kadagiti ay-ayatenda. Naiduma la ngamin ti pannakaawat ti kakabagianda kadagiti pannursuro ti Biblia. Ti Nasantuan a Kasuratan parparegtaenna dagiti pasurot ni Kristo a tratuenda dagiti di manamati “buyogen ti kinaalumamay” ken “nauneg a panagraem.” (2 Timoteo 2:25; 1 Pedro 3:15) Maitutop ti balakad ti Biblia: “Ti adipen ti Apo saan a kasapulan a makiapa, no di ket kasapulan nga agbalin a naalumamay kadagiti isuamin.” (2 Timoteo 2:24) Binalakadan met ni apostol Pablo dagiti Kristiano “a saanda nga agsao iti makadangran iti asinoman, saanda a mannakiringgor, nga agbalinda a nainkalintegan, nga ipakitada ti isuamin a kinaalumamay kadagiti amin a tattao.”​—Tito 3:2.

Makikomunikarka a Kanayon ken Iyebkasmo ti Panagayatmo

Iti 1 Pedro 2:12, kastoy ti naiparegta kadagiti Kristiano: “Taginayonenyo a nasayaat ti kababalinyo iti tengnga dagiti nasion [dagiti di manamati] tapno . . . dayawenda koma ti Dios iti aldaw a panangsukimatna kas bunga ti nasayaat nga ar-aramidyo nga isuda ti saksi kadagita.” Masansan a makita dagiti ay-ayatentayo a ditay kapammatian ti panagbalbaliw nga inaramid ti Biblia iti biagtayo. Laglagipem nga adu ti nangbalbaliw iti panunotda nupay saanda idi nga interesado wenno bumusbusorda pay ketdi iti Biblia. Para iti dadduma, mabalin a kasapulanda ti adu a tawen a panangpaliiw a naimbag iti nasayaat a kababalin ti asawa wenno anakda sakbay a matignayda nga agsukimat no ania ti makagapu iti kasta a kababalin. No saan nga awaten dagiti tattao ti kinapudno ti Biblia, saan koma a gapu ta binaybay-an ida ti kabagianda a maysa a Kristiano.

Nalawag a nadumaduma ti kasasaad dagiti Kristiano a Saksi nga adayo kadagiti dadakkelda. Mabalin a dida kanayon a masarungkaran ida. Ngem ti panagsurat, panagtelepono, wenno kanayon a pannakikomunikar iti nadumaduma a pamay-an ti mangipasigurado kadagiti ay-ayatentayo nga ipatpategtayo ida. Adu a saan a pudno a Kristiano ti mangay-ayat kadagiti dadakkelda ken iti dadduma a kabagianda ken regular a makikomunikarda kadakuada aniaman ti nakaikamenganda a relihion. Saan kadi a rumbeng a kasta met ti aramiden ti maysa a Kristiano a Saksi?

[Ladawan iti panid 26]

Ti pannakikomunikar a kanayon kadagiti ay-ayatem ti mangipasigurado kadakuada nga ipatpategmo ida