Tultuladen ti Tao ti Disenio ti Namarsua

Kasano a madaeran dagiti narasi a bombilia ti napigsa a puersa no maikabit wenno maipuesto dagitoy iti pakaisaadanda? Sigun iti libro a How in the World?, ti sungbat ket agpannuray a nangnangruna iti sukog ti bombilia a naibasar iti sukog ti itlog. Nupay nakaing-ingpis ti ukis dagiti itlog, saan a mabuong dagitoy iti dagsen ti kabaian no ukopanna dagiti itlog. Ngamin, ti sukog ti itlog ti mangpalagda iti estrukturana tapno makadaer iti puersa. (No napuspuskol ti ukis dagiti itlog, nalabit marigatan ti piek a rummuar.) Babaen ti panangtulad iti disenio ti Namarsua, arimbukelen ti sukog dagiti bombilia, tapno no maiggaman, ‘maiwaras ti puersa iti amin a direksion manipud iti paset a maiggaman babaen ti kurba ti sarming.’ Gapuna, kas iti itlog, saan unay a matalmegan ti aniaman a paset isu a saan a mabuong ti bombilia. Adu ti nasursuro ti tao manipud iti panangadalna iti nakaparsuaan!