Ti Panangmatmat ti Biblia

Kasano a Maiwaksim Dagiti Dakes a Tarigagay?

“No kayatko nga aramiden ti umiso, ti dakes ti adda kaniak.”​—ROMA 7:21.

NALABIT a nangnangruna ngem iti asinoman nga apostol, inkagumaan ni Pablo nga itandudo dagiti nangato a prinsipio ti Kristianidad. (1 Corinto 15:9, 10) Nupay kasta, inaminna a mismo ti nadakamat iti ngato. Kanayon idi nga aglaban ti panunot ken dagiti dakes a tarigagayna. Nariknam met kadin ti napasaran ni apostol Pablo? Kinapudnona, kas imperpekto a parsua, asino kadatayo ti saan a nakapasar iti panaglaban ti panunot ken dakes a tarigagay?

Para iti adu, marigatanda unay a mangparmek kadagiti dakes a tarigagayda. Agpakarigat ti dadduma gapu iti tarigagayda nga agpennek iti seksual nga imoralidad. Naadikto met ti dadduma iti panagsugal, panagsigarilio, panagdroga, wenno panagbartek. No matutuoktayo kadagita a makadangran ken narugit a tarigagay, kasanotay a maliklikan ida? Ania a tulong ti magun-odan? Agpatingganto pay aya ti pannakidangadang kadagiti dakes a tarigagay?

Ayat​—Ti Tulbek iti Panangiwaksi Kadagiti Dakes a Tarigagay

Impatuldo ni Jesus ti dua a kangrunaan a bilin iti Mosaiko a Linteg. Ti umuna isu daytoy: “Masapul nga ayatem ni Jehova a Diosmo buyogen ti intero a pusom ken buyogen ti intero a kararuam ken buyogen ti intero a panunotmo.” (Mateo 22:37) No ay-ayatentayo ti Dios kas iti imbaga ni Jesus a rumbeng nga aramidentayo, saan aya a ti panangparagsak Kenkuana ti kangrunaan a tarigagaytayo? No kasta, dayta a nalinteg a tarigagay ti makatulong kadatayo a mangiwaksi kadagiti nagdakes a tarigagaytayo! Saan la a teoria daytoy a narigat a tungpalen. Kada aldaw, minilion a Kristiano ti sibaballigi a mangiwakwaksi kadagiti dakes a tarigagayda. Kasanom a mapatanor  ti kasta a nasinged a pannakirelasion iti Dios? Babaen ti panangmennamenna buyogen ti panangapresiar iti kinaimbagna kas makita kadagiti pinarsuana, iti Biblia, ken iti pannakilangenna kadatayo a mismo.​—Salmo 116:12, 14; 119:7, 9; Roma 1:20.

Ti maikadua a kangrunaan a bilin a dinakamat ni Jesus ket: “Masapul nga ayatem ti padam a tao a kas iti bagim.” (Mateo 22:39) Imbaga ni apostol Pablo a dayta nga ayat “saanna a sapulen dagiti bukodna a pagimbagan.” Ti kasta nga awanan agum nga ayat ti makatulong ngarud kadatayo a mangliklik iti aniaman nga aramid a makapasakit iti sabsabali. (1 Corinto 13:4-8) Kasano a mapatanor dayta? Babaen ti panangisaadtayo iti bagitayo iti sasaaden ti sabsabali ken sipapasnek nga ikabilangantayo ti rikna ken agnanayon a pagimbaganda.​—Filipos 2:4.

Ania a Tulong ti Magun-odan?

Agsipud ta ammo ti Dios a marigatantayo nga agaramid iti umiso, nangipaay iti tulong iti nadumaduma a pamay-an. Babaen ti naisurat a Saona a ti Biblia, isursuronatayo a manggura iti dakes ken mangpatanor iti nauneg a panagraem kenkuana. (Salmo 86:11; 97:10) Ti Biblia ket addaan kadagiti pudno a pakasaritaan iti biag a mangipakita iti makadidigra a pagbanagan ti itutulok kadagiti dakes a tarigagay. Kasta met nga imbaga ni Jesus nga ipaay kadatayo ti Dios ti nasantuan nga espirituna, ti kangrunaan a puersa iti uniberso, no kiddawentayo dayta. (Lucas 11:13) Dayta ti mangpabileg iti determinasiontayo a mangaramid iti umiso. Ti sabali pay a probision isut’ panagtitinnulong ken panagpipinnaregta a masagraptayo iti sabsabali a Kristiano a mangikagkagumaan met a mangiwaksi kadagiti dakes a tarigagay. (Hebreo 10:24, 25) Bayat a dagitoy a nasayaat nga impluensia ti mangsukát kadagiti dakes a tarigagay, matulongantayo a mangikagumaan a mangaramid iti umiso. (Filipos 4:8) Talaga aya nga epektibo daytoy a pamay-an?

Panunotem ni Fidel, nga agdinamag idi a mammartek iti lugarna. No nabartek, agsigarilio, agsugal, ken makiapa. Ti panagadalna iti Biblia ken pannakitimpuyogna kadagiti Saksi ni Jehova ti nakatulong kenkuana a mangparmek kadagita a bisio. Ita, nasaysayaaten nga amang ti biagna a kadua ni baketna ken ti dua nga annakna.

Nalabit adda mangyimtuod, ‘Kasano ngay no adda latta tiempo a makaaramidak iti dakes?’ Nagsurat ni apostol Juan maipapan iti dayta a posibilidad. Kinunana: “Annakko, isursuratko kadakayo dagitoy a banag tapno saankayo a makaaramid iti basol. Ket kaskasdi, no ti asinoman makaaramid iti basol, addaantayo iti katulongan iti Ama, ni Jesu-Kristo, daydiay nalinteg. Ken isu ket pangikappia a sakripisio maipaay kadagiti basoltayo, ngem saan a maipaay kadatayo laeng no di ket maipaay met iti intero a lubong.” (1 Juan 2:1, 2) Wen, ti sakripisio ni Jesus ti mangabbong kadagiti basol ti maysa a tao nga agbabawi ken sipapasnek nga ikagkagumaanna ti agbalbaliw tapno maay-ayona ti Dios. Gapu iti dayta nga urnos, adda aya nainkalintegan a rason ti asinoman tapno sumardeng iti pannakidangadang nga agaramid iti umiso?

Maparmekton Dagiti Dakes a Tarigagay

No patanorentayo ti panagayattayo iti Dios ken iti padatayo a tao ken aprobetsarentayo ti tulong ti Dios, uray pay itan makapagballigitayo iti pannakidangadangtayo kadagiti dakes a tarigagay. Kanayonanna, ipasigurado kadatayo ti Sao ti Dios a saan nga agnanayon daytoy a pannakidangadang. Dagidiay mangipatpateg kadagiti probision ti Dios ket asidegen a maagasan a naan-anay iti pisikal ken naespirituan a wagas. (Apocalipsis 21:3-5; 22:1, 2) Mawayawayaandanto iti dagensen ti basol ken ti bungana nga ipapatay. (Roma 6:23) Iti sabali a bangir, maipuera kadagita a bendision dagidiay mangigagara a mangitultuloy kadagiti narugit ken makadangran a tarigagayda.​—Apocalipsis 22:15.

Anian a makaliwliwa a maammuan a saan nga agnanayon a makidangadangtayo kadagiti dakes a tarigagay. Dagitoy ket naan-anay ken permanente a maikkatton. Makapabang-ar la ketdi dayta a tiempo!