Manipud Kadagiti Agbasbasa
Manipud Kadagiti Agbasbasa
Panagdroga Nagustuak ti akkub iti ruar nga Abril 8, 2003, (“Panagdroga iti Pamilia—Ania ti Maaramidam?”). Iyad-adalak iti Biblia ti maysa a babai nga agnagan iti Linda. Adikto iti droga ti dua kadagiti annakna. Kabigatanna, detalyado nga inyadalko kenkuana ti tunggal parapo dayta a ruar. Dayta ti nangparegta ken nangpabileg unay kenkuana. Dimteng ti material iti umiso a tiempo.
C. M., Estados Unidos
Siak ti mangtartarawidwid iti maysa a pagkonsultaan nga organisasion a tumultulong kadagiti pamilia a mangtaming iti panagdroga ken alkoholismo. Nupay maysaak a Katoliko, nasaetak a managbasa iti Agriingkayo! Kayatko ti agyaman gapu iti serye maipapan iti panagdroga iti pamilia. Nagagaranak a nangbasa iti dayta ta matulongannak iti trabahok a panangtarawidwid kadagiti agtutubo.
H. C., Ecuador
Panagkammet Binasak ti artikulo a “Panagkammet” iti ruar nga Abril 8, 2003. Sangapulo ti tawenko ket pinadasko ti nagkammet iti naipapudot a pikadilio a baka. Narigat ngem nakaay-ayat ken naimas ti pannanganko. Pagyaman iti daytoy nga artikulo! Itay nabiit, itugtugotko ti Agriingkayo! idiay eskuelaan ken basbasaek dayta no recess.
M. T., Japan
Pannubok a Naibasar iti Biblia Kayatko a maammuanyo a kaay-ayok dagiti crossword puzzle nga ipabpablaakyo. Adu ti masursurok kadagita.
R. N., Estados Unidos
Insurok ti Biblia kadagiti annakko sipud pay idi ubbingda. Ita ta dadakkeldan, narigrigaten a parayrayen ti interesda kadagiti naespirituan a banag. Isu nga agsapsapulak kadagiti pamay-an tapno matulongak ida. Idi naawatko ti ruar nga Abril 8 ken sinukimatko ti “Ammoyo Kadi?,” adda napanunotko. Insigida nga imbagayko dagiti saludsod para kadagiti annakko, nagaramidak kadagiti pagpilianda, ken impaskilko iti diding dagita a saludsod. Idi damo, saanda nga interesado, ngem di nagbayag, rinugiandan a sungbatan dagiti saludsod. Ita, us-usarenmin dagiti saludsod kas topiko ti panagsasaritami a sangapamiliaan.
R. M., Japan
Sungbat ti “Agriingkayo!”: Ti pannubok a naibasar iti Biblia nga “Ammoyo Kadi?” ket maipabpablaak iti dadduma a lenguahe a ruar ti “Agriingkayo!” nga awanan iti crossword puzzle.
Dagiti Niog Talaga a nagustuak ti artikulo a “Maysa Kadagiti Kaaduan ti Pakausaranna a Nuez Ditoy Daga,” iti ruar a Marso 22, 2003. Adda gayyemko a kaduak nga agar-aramid iti sabon kas pagesmanmi. Us-usarenmi ti lana ti niog iti ar-aramidenmi a sabon, ta nasayaat dayta iti kudil ken nakalablabutab. Kalpasan a nabasami daytoy nga artikulo, ad-addan nga apresiarenmi ti niog.
C. B., Canada
Wayawaya nga Agsao Kabasbasak ti serye a “Korte Suprema ti E.U. ken ti Wayawaya nga Agsao.” (Enero 8, 2003) Agkakanat ti nariknak gapu iti dayta nga artikulo—panagsiddaaw ta agtultuloy pay laeng ti debate maipapan iti daytoy nga isyu idiay Estados Unidos, panagraem no kasano a sisisigo nga impakaammo dagiti Kristiano a kakabsattayo ti panangmatmattayo, ken nauneg a panangapresiar a dagiti nainkalintegan a desision ket mabalin nga ipaulog uray iti daytoy dakes a lubong. Maragsakanak unay a mangitultuloy iti trabaho a panangikasaba iti naimbag a damag. Dagita nga artikulo ti mangpaadu iti pannakaammomi.
O. S., Belarus
Kinapribado Nakatulong kaniak ti serye a “Mabibiangan Aya ti Kinapribadom?” (Enero 22, 2003) no kasano nga ad-adda a maawatak ti kaipapanan ti panangraem kadagiti kalintegan ti sabsabali. Kinapudnona, ti pannakibiang iti kinapribado ti sabsabali ket maysa a kita ti panagtakaw a dakes dagiti pagbanaganna. Kas Kristiano, gagangay laeng a nasingedtayo iti maysa ken maysa. Ngem mabalin a nalakatay a malipatan nga adda dagiti limitasion a ditay labsingen.
T. M., Czech Republic